Mookuthi Amman 2 Teaser: నయనతార అభిమానులు ఎప్పటి నుంచో ఎదురుచూస్తున్న ‘మూకుతి అమ్మన్ 2’ నుంచి అదిరిపోయే అప్డేట్ వచ్చేసింది. వినాయక చతుర్థి సందర్భంగా ‘రైజ్ ఆఫ్ మహాశక్తి’ పేరుతో విడుదలైన టీజర్ సినిమాపై అంచనాలను ఒక్కసారిగా పెంచేసింది. మొదటి భాగానికి భిన్నంగా మరింత భారీ స్థాయిలో పౌరాణికం, ఫాంటసీ, యాక్షన్ ఎలిమెంట్స్ తో ఈ సినిమాను తెరకెక్కించినట్లు టీజర్ చూస్తే అర్థమవుతోంది.
టీజర్ మొదట్లోనే ప్రేక్షకులను మరో కాలంలోకి తీసుకెళ్లే ప్రయత్నం చేశారు మేకర్స్. ఒక పురాతన రాజ్యం శత్రువుల దాడితో అల్లకల్లోలంగా మారడం, ప్రజలు ప్రాణాల కోసం పోరాడటం వంటి సన్నివేశాలతో కథకు భారీ నేపథ్యాన్ని ఏర్పాటు చేశారు. ఆ తర్వాత కథ ఒక్కసారిగా ప్రజెంట్ కాలానికి మారుతుంది. ఇప్పటి ప్రపంచంలో కూడా ఏదో అర్థంకాని విపత్తు ప్రజల జీవితాలను తీవ్రంగా ప్రభావితం చేస్తున్నట్లు టీజర్లో చూపించారు.
భయం, గందరగోళం పెరిగిపోయిన సమయంలో ప్రజలు తమను కాపాడే దైవశక్తి కోసం ఎదురుచూస్తున్నట్లు సన్నివేశాలు కనిపిస్తాయి. అప్పుడే నయనతార మూకుతి అమ్మన్ అవతారంలో మరోసారి తెరపైకి వస్తారు. చేతిలో ఆయుధంతో, శక్తివంతమైన రూపంలో కనిపించే ఆమె పాత్ర ఈసారి కేవలం భక్తి కోణానికే పరిమితం కాకుండా భారీ సంఘర్షణకు కేంద్రంగా ఉండబోతున్నట్లు టీజర్ సూచిస్తోంది.
2020లో వచ్చిన ‘మూకుతి అమ్మన్’లో భక్తితో పాటు సామాజిక అంశాలు, వ్యంగ్యాన్ని కలిపి కథను నడిపించారు. అయితే రెండో భాగం మాత్రం పూర్తిగా మరో ప్రపంచాన్ని చూపించబోతున్నట్లు తెలుస్తోంది. మొదటి భాగానికి భిన్నంగా ‘డివైన్ ఫాంటసీ’ ప్రపంచాన్ని సరికొత్తగా చూపించబోతున్నట్లు మేకర్స్ గతంలోనే తెలిపారు.
ఈ సినిమాకు సుందర్.సి దర్శకత్వం వహిస్తున్నారు. మొదటి భాగాన్ని ఆర్జే బాలాజీ తెరకెక్కించగా, సీక్వెల్ బాధ్యతలను సుందర్.సి తీసుకున్నారు. నయనతారతో పాటు రెజీనా కసాండ్రా, ఊర్వశి, దునియా విజయ్, యోగిబాబు, అభినయ తదితరులు కీలక పాత్రల్లో నటిస్తున్నారు. హిప్హాప్ తమిళా సంగీతం అందిస్తున్న ఈ చిత్రాన్ని ఐశరి కె. గణేష్ నిర్మిస్తున్నారు.
ఇక సినిమా రిలీజ్ విషయానికి వస్తే.. ‘మూకుతి అమ్మన్ 2’ను దీపావళి సీజన్లో ప్రేక్షకుల ముందుకు తీసుకురావాలనే ఆలోచనలో మేకర్స్ ఉన్నట్లు తెలుస్తోంది. నవంబర్ 6 తేదీపై ప్రస్తుతం సినీ వర్గాల్లో ప్రచారం జరుగుతోంది. అయితే ఈ రిలీజ్ డేట్ను మేకర్స్ అధికారికంగా ప్రకటించాల్సి ఉంది.
టీజర్ చూస్తే ‘మూకుతి అమ్మన్ 2’ మొదటి భాగానికి కొనసాగింపుగా మాత్రమే కాకుండా మరింత భారీ విజువల్ ట్రీట్గా రూపొందినట్లు కనిపిస్తోంది. నయనతార మరోసారి దేవతగా కనిపించడంతో పాటు, ఈసారి ఆమె ముందున్న ప్రమాదం ఎంత పెద్దది, మహాశక్తి ఎలాంటి యుద్ధం చేయబోతోంది అనేది సినిమాపై ఆసక్తిని మరింత పెంచుతోంది. మరి థియేటర్లలో నయనతార మహాశక్తి అవతారం ఎలాంటి సంచలనం సృష్టిస్తుందో చూడాలి.