దివ్య దేశాలలో ఒకటైన కుంభకోణం 108 వైష్ణవ (తిరు కుడందై) అనేక ఆధ్యాత్మిక రహస్యాలకు, అద్భుత ఆలయాలకు నిలయం. తమిళనాడులోని ఈ పవిత్ర క్షేత్రంలో శ్రీమహావిష్ణువు శారంగపాణిగా, అమ్మవారు కోమలవల్లి తాయారుగా పూజలందుకుంటున్నారు. గర్భగుడి అచ్చం రథం ఆకారంలో ఉండే ఈ ఆలయంలో పాతాళ శ్రీనివాసుడి సన్నిధి ప్రధాన ఆకర్షణగా నిలుస్తుంది. భూమికి 10 అడుగుల లోతులో ఉండే ఆ స్వామి ప్రత్యేకత ఏంటో, ఈ క్షేత్ర విశేషాలేంటో ఇప్పుడు తెలుసుకుందాం.
పాతాళ శ్రీనివాసుడి అరుదైన సన్నిధి: ఈ ఆలయానికి వచ్చే భక్తులు తప్పక దర్శించుకునే అరుదైన క్షేత్రం ‘పాతాళ శ్రీనివాసుడి’ సన్నిధి. భూమి మట్టానికి దాదాపు 10 అడుగుల లోతున గర్భగుడి ఉండటంతో స్వామివారిని పాతాళ శ్రీనివాసుడిగా కొలుస్తారు. ఇక ఈ లోతైన సన్నిధిలోకి వెళ్లి స్వామివారిని దర్శించుకోవడం భక్తులకు ఒక ప్రత్యేకమైన ఆధ్యాత్మిక అనుభూతిని కలిగిస్తుంది.
సూర్యభగవానుడు తేజస్సు పొందిన ‘భాస్కర క్షేత్రం’: స్థల పురాణం ప్రకారం.. పూర్వం సూర్యభగవానుడు సుదర్శన చక్రంతో పోటీపడి తన తేజస్సును కోల్పోయాడు. దాంతో సూర్యుడు ఈ స్థలంలో శారంగపాణి స్వామిని తీవ్రంగా ఆరాధించి, ఆయన అనుగ్రహంతో తిరిగి తన కాంతిని పొందాడు. ఇక సూర్యుడి అభ్యర్థన మేరకే స్వామివారు ఇక్కడ వెలిశారని, అందుకే ఈ క్షేత్రానికి ‘భాస్కర క్షేత్రం’ అని పేరు వచ్చిందని చెబుతారు.
రథం ఆకారంలో గర్భగుడి.. ద్వారాల విశేషం: ఇక్కడి గర్భగుడి నిర్మాణం చాలా విచిత్రంగా, ఒక పెద్ద దివ్య రథం ఆకారంలో ఉంటుంది. ఇక ఈ ఆలయానికి ఉత్తర, దక్షిణ వాకిళ్లు ఉన్నాయి. ఇక సూర్యుడు ఉత్తరానికి మారే ఉత్తరాయణ పుణ్యకాలంలో మాత్రమే ఉత్తర వాకిలిని తెరిచి ఉంచడం ఇక్కడి మరొక ఆచార విశేషం.
ఆళ్వార్లు కీర్తించిన దివ్య ధామం: ఇంతటి మహిమాన్వితమైన క్షేత్రాన్ని వైష్ణవ సాంప్రదాయంలో ఎంతో ప్రాముఖ్యమున్న పెరియాళ్వార్, పేయాళ్వార్, పూదత్తాళ్వార్, నమ్మాళ్వార్, ఆండాళ్ మరియు తిరుమంగై ఆళ్వార్లు తమ దివ్య ప్రబంధాల్లో కీర్తించారు.
శారంగపాణి స్వామిని, పాతాళ శ్రీనివాసుడిని దర్శించుకోవడం వల్ల సమస్త పాపాలు నశించి, సకల శుభాలు, సుఖసంతోషాలు చేకూరుతాయని భక్తుల విశ్వాసం. ఇక కుంభకోణం వెళ్లేవారు ఈ అద్భుత క్షేత్రాన్ని దర్శించుకోవడం మర్చిపోవద్దు.
గమనిక :ఈ కథనంలో అందించిన వివరాలు ఆధ్యాత్మిక గ్రంథాలు, క్షేత్ర స్థలపురాణం మరియు ప్రచారంలో ఉన్న విశ్వాసాలపై ఆధారపడి అందించబడినవి మాత్రమే
The post పాతాళ శ్రీనివాసుడిని దర్శించారా..? కుంభకోణంలోని ఈ సన్నిధి ప్రత్యేకత ఇదే! appeared first on Manalokam – Latest Telugu News & Updates.