బాలీవుడ్ హీరో, సీరియల్ కిస్సర్ ఇమ్రాన్ హష్మీకి త్రుటిలో ప్రమాదం తప్పింది. ‘గన్‌మాస్టర్ G9’ సినిమా కోసం ఓ భారీ యాక్షన్ సన్నివేశాన్ని చిత్రీకరిస్తుండగా ప్రమాదం చోటుచేసుకుంది. క్రేన్‌కు వేలాడదీసిన ఎస్‌యూవీ గాల్లో పల్టీలు కొడుతూ.. కింద పార్క్ చేసి ఉన్న వ్యాన్‌పై పడింది. ఆ కారు ఇమ్రాన్ హష్మీకి అత్యంత సమీపంలోకి వచ్చింది. దీనికి సంబంధించిన వీడియో ప్రస్తుతం సోషల్‌ మీడియాలో వైరల్ అవుతోంది. ఈ ఘటనపై చిత్ర యూనిట్ నుంచి అధికారిక ప్రకటన రావాల్సి ఉంది.
వైరల్ అవుతున్న వీడియోలో.. ముందుగా చిత్రబృందం స్టంట్‌కు సిద్ధమయింది. కౌంట్‌డౌన్ చెప్పగానే క్రేన్‌కు వేలాడదీసిన ఎస్‌యూవీ గాల్లో తిరుగుతూ తలకిందులుగా మారి కింద ఉన్న వ్యాన్ పైకప్పుపై బలంగా పడింది. ఈ వ్యాన్‌కు అతి సమీపంలోనే హీరో ఇమ్రాన్ హష్మీ ఉన్నట్లు సమాచారం. దీంతో చిత్ర బృందం వేంటనే అప్రమత్తమైంది. అయితే ఈ ప్రమాదంలో ఎవరికీ గాయాలు కాలేదని తెలుస్తోంది. అధికారిక ప్రకటన వచ్చే వరకు ఈ ఘటనకు సంబంధించిన పూర్తి వివరాలపై స్పష్టత వచ్చే అవకాశం లేదు.
ఆదిత్య దత్ దర్శకత్వంలో తెరకెక్కుతున్న గన్‌మాస్టర్ జీ9 విడుదలకు సిద్ధమవుతోంది. ఈ సినిమాలో ఇమ్రాన్ హష్మీతో పాటు జెనీలియా దేశ్‌ముఖ్, అపారశక్తి ఖురానా, అభిషేక్ సింగ్ కీలక పాత్రల్లో నటిస్తున్నారు. యాక్షన్, రొమాన్స్ అంశాలతో రూపొందుతున్న ఈ చిత్రాన్ని నవంబర్ 27న ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ ప్రకటించారు. ఆగస్టులో విడుదల చేసిన సినిమా ఫస్ట్ గ్లింప్స్‌లో హీరో పాత్రను పరిచయం చేశారు. ఇందులో ఆయన ఈశ్వర్ అనే డెయిరీ ఫామ్ యజమానిగా కనిపించనున్నారు. తాను ప్రేమించే మహిళను రక్షించేందుకు ఎంతటి సాహసానికైనా సిద్ధపడే వ్యక్తిగా ఆయన పాత్రను తీర్చిదిద్దినట్లు తెలుస్తోంది.