Anupam Kher as Jatayu in Ramayana: భారతీయ ఇతిహాసం రామాయణం ఆధారంగా తెరకెక్కుతున్న ప్రతిష్ఠాత్మక చిత్రం ‘రామాయణ’. నితీశ్‌ తివారీ దర్శకత్వంలో రూపొందుతున్న రామాయణలో రాముని పాత్రలో రణ్‌బీర్‌ కపూర్, సీతగా సాయి పల్లవి, రావణుడిగా యశ్ నటిస్తున్నారు. రెండు భాగాలుగా రానున్న ఈ చిత్రాన్ని నమిత్‌ మల్హోత్రా, యశ్ సంయుక్తంగా నిర్మిస్తున్నారు. దీపావళి 2026 కానుకగా నవంబరు 5న ప్రపంచ వ్యాప్తంగా థియేటర్లలోకి రానుంది. సినిమా విడుదలకు సమయం దగ్గరపడుతున్న నేపథ్యంలో రామాయణ నుంచి వరుస అప్‌డేట్స్ వస్తున్నాయి. ఈరోజు మరో ఆసక్తికరమైన అప్‌డేట్ వచ్చింది.
రామాయణ సినిమాలో ప్రముఖ నటుడు అనుపమ్ ఖేర్ ‘జటాయువు’ పాత్రలో కనిపించనున్నారు. తాజాగా విడుదల చేసిన పోస్టర్‌లో జటాయువు రూపం ఆకట్టుకుంటోంది. భారీ రెక్కలు విప్పి ఎగురుతున్న జటాయువుతో పాటు వెనుకభాగంలో కనిపిస్తున్న భారీ పక్షి ముఖం పోస్టర్‌కు ప్రత్యేక ఆకర్షణగా నిలిచాయి. రామాయణంలో జటాయువుకు ఎంతో ప్రాధాన్యం ఉంది. సీతాదేవిని రావణుడు అపహరించి తీసుకెళ్తున్న సమయంలో జటాయువు అతడిని అడ్డుకునేందుకు ధైర్యంగా పోరాడుతుంది. విజయం సాధిస్తాననే ఆశతో కాకుండా.. ధర్మం కోసం నిలబడిన వీరుడిగా జటాయువు పాత్ర నిలిచిపోతుంది. తాజాగా విడుదలైన పోస్టర్‌తో ఈ పాత్రను సినిమాలో ఎలా చూపించబోతున్నారనే ఆసక్తి ప్రేక్షకుల్లో పెరిగింది. ‘జటాయువు: ది వింగ్స్ ఆఫ్ ధర్మ’ అనే ట్యాగ్‌లైన్‌తో ఈ పాత్రను పరిచయం చేసింది.
మాన్‌స్టర్ మైండ్ క్రియేషన్స్ రామాయణ ప్రాజెక్టుతో అనుబంధమై ఉంది. భారతీయ ఇతిహాసాన్ని భారీ స్థాయిలో వెండితెరపై ఆవిష్కరించేందుకు చిత్ర బృందం ప్రయత్నిస్తోంది. తాజాగా జటాయువు పోస్టర్ విడుదల కావడంతో సినిమాపై ప్రేక్షకుల్లో ఆసక్తి మరింత పెరిగింది. హిందీ, కన్నడ, తెలుగు, తమిళం, మలయాళ భాషల్లో సినిమాను ప్రేక్షకుల ముందుకు తీసుకురానున్నారు. ఐమాక్స్‌తో పాటు ఇతర ప్రీమియం ఫార్మాట్లలోనూ ఈ చిత్రాన్ని వీక్షించే అవకాశం ఉంటుందని పోస్టర్ వెల్లడిస్తోంది. అడ్వాన్స్ బుకింగ్స్ మరో ఎనిమిది రోజుల్లో ప్రారంభం కానున్నట్లు చిత్ర బృందం ప్రకటించింది.