Ajit Agarkar Controversy: విరాట్ కోహ్లీ టెస్ట్ క్రికెట్‌కు వీడ్కోలు పలకడం అప్పట్లో క్రికెట్ ప్రపంచాన్ని ఆశ్చర్యానికి గురిచేసింది. ఈ నిర్ణయం వెనుక అప్పటి బీసీసీఐ చీఫ్ సెలెక్టర్ అజిత్ అగార్కర్ నేతృత్వంలోని సెలక్షన్ కమిటీ వ్యవహారశైలి కూడా ఒక కారణమై ఉండొచ్చనే చర్చ జరిగింది. కోహ్లీ ముందస్తుగా టెస్ట్ క్రికెట్ నుంచి తప్పుకోవడంపై తాజాగా మాజీ భారత బ్యాటర్ వసీం జాఫర్ కీలక వ్యాఖ్యలు చేశాడు.
భారత క్రికెట్ దిగ్గజాలు విరాట్ కోహ్లీ, రోహిత్ శర్మ వారం రోజుల వ్యవధిలో టెస్ట్ క్రికెట్‌కు రిటైర్మెంట్ ప్రకటించారు. దీంతో గతేడాది ఇంగ్లండ్ పర్యటనకు ముందు భారత జట్టు భారీ మార్పులను ఎదుర్కోవాల్సి వచ్చింది. ఐపీఎల్ 2025 సమయంలో రోహిత్ శర్మ తన రిటైర్మెంట్ నిర్ణయాన్ని ప్రకటించగా, కొద్ది రోజులకే కోహ్లీ కూడా టెస్ట్ క్రికెట్ నుంచి తప్పుకుంటున్నట్లు వెల్లడించాడు.
అయితే కోహ్లీ నిర్ణయం అభిమానులకు మరింత షాక్ ఇచ్చింది. ఎందుకంటే ఐపీఎల్ ముగిసిన వెంటనే భారత్ ఐదు మ్యాచ్‌ల టెస్ట్ సిరీస్ కోసం ఇంగ్లండ్ పర్యటనకు వెళ్లాల్సి ఉంది. ఇలాంటి సమయంలో కోహ్లీ టెస్ట్‌లకు వీడ్కోలు పలకడం అనేక ప్రశ్నలకు దారితీసింది.
అజిత్ అగార్కర్‌పై ఎందుకు విమర్శలు..?
కోహ్లీ రిటైర్మెంట్ వెనుక అజిత్ అగార్కర్ నేతృత్వంలోని సెలక్షన్ కమిటీ వ్యవహరించిన తీరు కూడా కారణమై ఉండొచ్చని అప్పట్లో వార్తలు వచ్చాయి. దీంతో అప్పటి బీసీసీఐ చీఫ్ సెలెక్టర్ అగార్కర్‌పై విమర్శలు వెల్లువెత్తాయి. ఇప్పుడు మాజీ భారత బ్యాటర్ వసీం జాఫర్ కూడా కోహ్లీ టెస్ట్ రిటైర్మెంట్‌పై తన అభిప్రాయాన్ని వెల్లడించాడు. తన యూట్యూబ్ ఛానల్‌లో మాట్లాడిన జాఫర్.. కోహ్లీ సెలక్షన్ కమిటీ వ్యవహరించిన తీరుపై అసంతృప్తితోనే టెస్ట్ క్రికెట్‌కు వీడ్కోలు పలికి ఉండొచ్చని అభిప్రాయపడ్డాడు.
“విరాట్ పట్ల వ్యవహరించిన తీరుపై అతడు కొంత అసంతృప్తిగా ఉన్నట్లు అనిపించింది. విరాట్ లాంటి ఆటగాడు మైదానానికి ప్రేక్షకులను రప్పించగలడు. అతడికి అంతటి ఫాలోయింగ్ ఉంది. అతడు మరిన్ని టెస్ట్ మ్యాచ్‌లు ఆడే అవకాశం ఖచ్చితంగా ఉంది. అయితే విరాట్ స్వయంగా చెప్పే వరకు అసలు కారణం ఏమిటో మనకు తెలియదు. అతడు ఇంగ్లండ్ పర్యటనకు సిద్ధమవుతున్నాడు” అని వసీం జాఫర్ పేర్కొన్నాడు.
కోహ్లీకి ఇంకా ఎన్నో రికార్డులు సాధించే ఛాన్స్ ఉండేది..
కోహ్లీ 125 టెస్ట్ మ్యాచ్‌ల మార్కును చేరుకోవడానికి కేవలం రెండు మ్యాచ్‌ల దూరంలో రిటైర్ అయ్యాడు. 125 టెస్టులు ఆడి ఉంటే సునీల్ గవాస్కర్‌తో సమానంగా మ్యాచ్‌లు ఆడిన ఆటగాడిగా నిలిచేవాడు.
టెస్ట్‌ల్లో 10 వేల పరుగుల మైలురాయిని చేరుకోవడానికి కోహ్లీకి మరో 770 పరుగులు మాత్రమే అవసరమయ్యాయి. ఆ ఘనత సాధించి ఉంటే సునీల్ గవాస్కర్, సచిన్ టెండూల్కర్, రాహుల్ ద్రవిడ్ తర్వాత టెస్ట్‌ల్లో 10 వేల పరుగులు సాధించిన నాలుగో భారత బ్యాటర్‌గా నిలిచేవాడు.
అలాగే మరో ఐదు సెంచరీలు సాధించి ఉంటే టెస్ట్ క్రికెట్‌లో 35 సెంచరీలు చేసిన ప్రపంచంలోని ఎనిమిదో బ్యాటర్‌గా కోహ్లీ నిలిచేవాడు.
చివరి టెస్ట్ సిరీస్‌లో కోహ్లీ పేలవ ప్రదర్శన..
భారత్ తరపున కోహ్లీ చివరి టెస్ట్ సిరీస్ 2025 ఆరంభంలో జరిగిన ఆస్ట్రేలియా పర్యటనలో జరిగింది. ఆ సిరీస్‌లో ఐదు టెస్ట్ మ్యాచ్‌లు ఆడిన కోహ్లీ మొత్తం 190 పరుగులు మాత్రమే చేశాడు. అతడి బ్యాటింగ్ సగటు 23.75గా నమోదైంది. ఈ సిరీస్ తర్వాతే కోహ్లీ టెస్ట్ క్రికెట్‌కు వీడ్కోలు పలకడం గమనార్హం.
మరిన్ని క్రీడా వార్తల కోసం ఇక్కడ క్లిక్ చేయండి..