రాజస్థాన్‌లోని అజ్మీర్ జిల్లా కిషన్‌గఢ్‌లో న్యాయవాదిని చెంపదెబ్బ కొట్టిన డీఎస్పీ అంజు యాదవ్‌పై పోలీసు శాఖ చర్యలు తీసుకుంది. ముఖ్యమంత్రి ఆదేశాల మేరకు ఆమెను ఏపీఓగా నియమిస్తూ పోలీసు ప్రధాన కార్యాలయం ఉత్తర్వులు జారీ చేసింది. నేరాలు, శాంతిభద్రతల విషయంలో ఎలాంటి నిర్లక్ష్యాన్ని సహించేది లేదని ముఖ్యమంత్రి స్పష్టం చేశారు.
అసలు ఏం జరిగిందంటే.. అక్టోబర్ 9న కిషన్‌గఢ్‌లో రోడ్డు పక్కన పార్క్ చేసిన కారు విషయంలో న్యాయవాది బాబూలాల్ బగోరియా, ట్రాఫిక్ డీఎస్పీ అంజు యాదవ్ మధ్య వాగ్వాదం జరిగింది. ఈ క్రమంలో ఇద్దరి మధ్య మాటామాటా పెరిగి వివాదం తలెత్తింది. దీంతో అంజు యాదవ్ న్యాయవాదిని చెంపదెబ్బ కొట్టారు.
ఈ ఘటనతో న్యాయవాదులు ఆగ్రహం వ్యక్తం చేశారు. పెద్ద సంఖ్యలో న్యాయవాదులు ఓల్డ్ రైల్వే స్టేషన్ రోడ్డులోని ట్రాఫిక్ పోలీస్ అవుట్‌పోస్ట్‌కు చేరుకుని నిరసన చేపట్టారు. అనంతరం ప్రధాన కూడలికి వెళ్లి రహదారిని దిగ్బంధించారు. చివరకు అంజు యాదవ్ న్యాయవాది బాబూలాల్‌కు క్షమాపణ చెప్పడంతో అర్ధరాత్రి తర్వాత వివాదం సద్దుమణిగింది.
సోషల్ మీడియాలో వైరల్ వీడియో
న్యాయవాదిని చెంపదెబ్బ కొట్టిన వీడియో సోషల్ మీడియాలో వైరల్ కావడంతో ఈ ఘటనపై చర్చ మొదలైంది. ఈ క్రమంలో ఓ యూజర్ ఆ వీడియోపై కామెంట్ చేయగా, అంజు యాదవ్ స్పందిస్తూ.. “మీకు సమస్యలను ఎదుర్కోవడం అలవాటే.. మీకు అంత ధైర్యం ఉంది” అంటూ వ్యాఖ్యానించినట్లు సమాచారం. దీంతో వివాదం మరోసారి తెరపైకి వచ్చింది.
మరుసటి రోజు అంజు యాదవ్ క్షమాపణ చెబుతున్న వీడియో కూడా సోషల్ మీడియాలో కనిపించింది. అనంతరం న్యాయవాది బాబూలాల్ బార్ అసోసియేషన్‌కు ధన్యవాదాలు తెలిపారు. ఆమె క్షమాపణ చెప్పడంతో న్యాయవాదులు కొంత శాంతించారు.
ALSO READ : శివాలయం గర్భ గుడిలో బాలికపై అత్యాచారం
అజ్మీర్‌లోనూ న్యాయవాదుల నిరసన
ఈ ఘటనపై అజ్మీర్ బార్ అసోసియేషన్ కూడా స్పందించింది. సోమవారం బార్ అసోసియేషన్ అధ్యక్షుడు యోగేంద్ర ఓఝా నేతృత్వంలో న్యాయవాదులు నిరసన చేపట్టారు. అనంతరం జిల్లా ఎస్పీ హర్షవర్ధన్ అగర్వాలాను కలిసి, డీఎస్పీ అంజు యాదవ్‌పై తగిన చర్యలు తీసుకోవాలని డిమాండ్ చేశారు. చివరికి ముఖ్యమంత్రి ఆదేశాలతో పోలీసు ప్రధాన కార్యాలయం అంజు యాదవ్‌ను ఏపీఓగా నియమిస్తూ నిర్ణయం తీసుకుంది.