ఎయిరిండియా విమానం హైజాక్ కలకలం రేపింది. ఇటీవల ఫ్లైదుబాయ్, బ్రిటిష్ విమానాల మాదిరిగా ఎయిరిండియా నుంచి ఎమర్జెన్సీ కోడ్ స్క్వాక్ 7500 వెలువడింది. జర్మనీలోని ఫ్రాంక్‌ఫర్ట్ నుంచి ఢిల్లీకి వస్తున్న ఎయిరిండియా విమానంలో ఈ ఘటన చోటుచేసుకుంది. దీంతో అధికారులు అప్రమత్తం అయ్యారు. విమానాన్ని రాజస్థాన్‌లోని జైపూర్ విమానాశ్రయంలో అత్యవసరంగా ల్యాండింగ్ చేసినట్లు వార్తలు వస్తున్నాయి.
బుధవారం విమానం నుంచి వచ్చిన అలర్ట్‌ను అహ్మదాబాద్ ఎయిర్ ట్రాఫిక్ కంట్రోల్ (ATC) గుర్తించినట్లు నివేదికలు పేర్కొన్నాయి. అనంతరం విమానాన్ని సురక్షితంగా జైపూర్ అంతర్జాతీయ విమానాశ్రయంలో దించారు. ల్యాండింగ్ అనంతరం విమానాన్ని భద్రతా తనిఖీల కోసం ప్రత్యేక ప్రాంతానికి తరలించినట్లు సమాచారం. అయితే విమానం నుంచి ఆ కోడ్ ఎందుకు ప్రసారమైంది? ఏదైనా సాంకేతిక సమస్య కారణమా? లేక ఇతర కారణాలున్నాయా? అనే విషయాలపై వెంటనే స్పష్టత రాలేదు. ఈ ఘటనపై దర్యాప్తు కొనసాగుతున్నట్లు నివేదికలు తెలిపాయి.
స్క్వాక్ 7500 అంటే ఏమిటి?
విమానయాన రంగంలో స్క్వాక్ 7500 అనేది హైజాక్ లేదా విమానంపై చట్టవిరుద్ధ జోక్యం జరిగినప్పుడు పైలట్లు ఎయిర్ ట్రాఫిక్ కంట్రోల్‌కు రహస్యంగా సమాచారం అందించేందుకు ఉపయోగించే అంతర్జాతీయ ట్రాన్స్‌పాండర్ కోడ్. ఈ కోడ్ ప్రసారమైనట్లు సమాచారం రావడంతో విమానంలో ఉన్న ప్రయాణికుల్లోనూ ఆందోళన నెలకొన్నట్లు తెలుస్తోంది. అయితే కోడ్ ప్రసారమైనంత మాత్రాన విమానం నిజంగానే హైజాక్‌కు గురైందని నిర్ధారించలేం. అసలు అలర్ట్‌కు కారణమేంటన్నది దర్యాప్తులో తేలాల్సి ఉంది.
ఇటీవల దుబాయ్ నుంచి టెల్ అవీవ్‌కు వస్తున్న ఫ్లైదుబాయ్ విమానంలో హైజాక్ కలకలం రేపింది. పైలట్ స్మిత్ మచ్చర్‌పై కో-పైలట్ దాడికి యత్నించి విమానాన్ని హైజాక్ చేసేందుకు ప్రయత్నించడంతో అనూహ్యంగా స్మిత్ కాక్‌పిట్ డోర్ తెరవడంతో ప్రయాణికులు విమానాన్ని నియంత్రించారు. అనంతరం సేఫ్‌గా విమానం ల్యాండ్ చేశారు. అంతా ఊపిరి పీల్చుకున్నారు.