Congress Councillors: ఉమ్మడి మహబూబ్‌నగర్ జిల్లా కాంగ్రెస్‌లో అంతర్గత విబేధాలు ఒక్కసారిగా భగ్గుమన్నాయి. సొంత పార్టీ సీనియర్ నేతలు, మంత్రుల తీరుపై తీవ్ర అసంతృప్తితో ఏకంగా ఏడుగురు కౌన్సిలర్లు మూకుమ్మడిగా పార్టీ ప్రాథమిక సభ్యత్వానికి రాజీనామా చేయడం ఉమ్మడి జిల్లా రాజకీయాల్లో పెను దుమారం రేపుతోంది. మంత్రి జూపల్లి కృష్ణారావు, క్రమశిక్షణ కమిటీ చైర్మన్ మల్లు రవిలు బీఆర్ఎస్ నాయకులకు కొమ్ముకాస్తున్నారంటూ వారు బాహాటంగానే ఆరోపణలు గుప్పిస్తూ తిరుగుబాటుకు దిగారు. జోగులాంబ గద్వాల జిల్లాలోని ఐజా మున్సిపాలిటీకి చెందిన ఏడుగురు కాంగ్రెస్ కౌన్సిలర్లు ఈ అనూహ్య నిర్ణయం తీసుకున్నారు.
కాంగ్రెస్ అధికారంలో ఉన్నప్పటికీ నియోజకవర్గంలో బీఆర్ఎస్ నాయకుల పెత్తనమే నడుస్తోందని, దీనికి మంత్రి జూపల్లి కృష్ణారావుతో పాటు పార్టీ క్రమశిక్షణ కమిటీ చైర్మన్ మల్లు రవి పూర్తి సహకారం అందిస్తున్నారని వారు తీవ్రస్థాయిలో ధ్వజమెత్తారు. కష్టపడి పార్టీని గెలిపించిన కార్యకర్తలను, కౌన్సిలర్లను కాదని.. ప్రతిపక్ష బీఆర్ఎస్ నేతలకు మద్దతుగా నిలుస్తుండటాన్ని నిరసిస్తూ తాము కాంగ్రెస్ పార్టీకి గుడ్‌బై చెబుతున్నట్లు స్పష్టం చేశారు. తమ రాజీనామా పత్రాలతో పాటు, స్థానిక పరిస్థితులను వివరిస్తూ టీపీసీసీ చీఫ్ బొమ్మ మహేష్ కుమార్ గౌడ్‌కు ఆ ఏడుగురు కౌన్సిలర్లు ఘాటుగా లేఖ రాశారు. సీనియర్ నాయకుల వ్యవహార శైలి వల్ల నియోజకవర్గంలో పార్టీ క్యాడర్ నైతిక స్థైర్యం దెబ్బతింటోందని, పార్టీ కోసం పనిచేసేవారికి గుర్తింపు లేకుండా పోయిందని ఆ లేఖలో ఆవేదన వ్యక్తం చేశారు. అధికార పార్టీకి చెందిన ఏడుగురు కౌన్సిలర్లు ఒకేసారి మూకుమ్మడిగా రాజీనామా బాట పట్టడంతో స్థానిక రాజకీయం ఒక్కసారిగా వేడెక్కింది. అధిష్ఠానం ఈ వ్యవహారంపై ఎలా స్పందిస్తుందోనన్న ఉత్కంఠ సర్వత్రా నెలకొంది.