AP Alliance Seat Sharing: ఆంధ్రప్రదేశ్‌లో స్థానిక సంస్థల వేళ కూటమి పార్టీల సీట్ల చర్చలపై అంతా ఆసక్తికరంగా ఎదురు చూస్తున్నారు.. సీట్ల సర్దుబాటు ఎలా ఉండబోతుందనే ఉత్కంఠ నెలకొనగా.. సమన్వయ సమావేశాలు కూడా సుదీర్ఘంగా జరగడంతో అంతా దానిపైనే ఫోకస్‌ పెట్టారు.. అయితే, కూటమి పార్టీల మధ్య సీట్ల సర్దుబాటుపై చర్చలు కొలిక్కి వచ్చాయని ఎమ్మెల్యే బొలిశెట్టి శ్రీనివాస్ తెలిపారు. అమరావతిలో నిర్వహించిన కూటమి సమన్వయ కమిటీ సమావేశం ముగిసిన అనంతరం ఆయన మాట్లాడారు. గతంలో వచ్చిన మెజార్టీ కంటే మెరుగైన మెజార్టీ సాధించడమే లక్ష్యంగా నిర్ణయాలు తీసుకున్నట్లు వెల్లడించారు. గెలుపే ప్రధానమని, ఎక్కడ కూటమి బలంగా ఉందో అక్కడ పోటీ చేయాలని జనసేన అధినేత పవన్ కల్యాణ్‌ సూచించినట్లు తెలిపారు.
రాష్ట్ర ప్రజలు కూటమిపై నమ్మకంతో ఓట్లు వేశారని, ఆ నమ్మకాన్ని నిలబెట్టుకునేలా నిర్ణయాలు తీసుకుంటామని బొలిశెట్టి శ్రీనివాస్ పేర్కొన్నారు. సీట్ల సర్దుబాటు విషయంలో కార్యకర్తల మనోభావాలు దెబ్బతినకుండా వ్యవహరిస్తామని చెప్పారు. కూటమి పార్టీల మధ్య చర్చలు ఒక కొలిక్కి వచ్చాయని, ఇకపై ఎలాంటి ఫ్రెండ్లీ కాంటెస్ట్ ఉండదని స్పష్టం చేశారు. ప్రతి స్థానంలోనూ కూటమి తరఫున ఒక్క అభ్యర్థి మాత్రమే పోటీలో ఉంటారని తెలిపారు. సీట్ల కేటాయింపులో ఎలాంటి పరిమితులు లేవని పేర్కొన్నారు.
మరోవైపు, కూటమి నుంచి అభ్యర్థుల ఉమ్మడి జాబితా త్వరలో విడుదల కానుందని వంశీ కృష్ణ యాదవ్ తెలిపారు. రేపో, ఎల్లుండో జాబితా ప్రకటించే అవకాశం ఉందని చెప్పారు. రెండు రోజుల్లో కూటమి తరఫున సింగిల్ లిస్ట్ విడుదలవుతుందని వెల్లడించారు. 2024లో జరిగిన ఎన్నికల ఫలితాల కంటే మెరుగైన ఫలితాలు సాధిస్తామని ధీమా వ్యక్తం చేశారు. రాష్ట్రంలో అభివృద్ధి జరగాలన్నదే కూటమి లక్ష్యమని నాయకులు పేర్కొన్నారు. సీట్ల సర్దుబాటు పూర్తయిన నేపథ్యంలో అభ్యర్థుల జాబితాపై రాజకీయ వర్గాల్లో ఆసక్తి నెలకొంది. అధికారిక జాబితా విడుదలైన తర్వాత ఏ పార్టీకి ఎన్ని స్థానాలు కేటాయించారు, ఎవరెవరికి అభ్యర్థులుగా అవకాశం కల్పించారనే అంశాలపై స్పష్టత రానుంది.