Dhruv Rathee: ప్రముఖ యూట్యూబర్ ధ్రువ్ రాఠీని పాత కేసులు వెంబడిస్తున్నాయి. ఆయన మరోసారి న్యాయపరమైన చిక్కుల్లో చిక్కుకున్నాడు. 8 ఏళ్ల నాటి కేసులో ఆయనకు కొత్తగా సమన్లు జారీ చేయాలని ఢిల్లీ సాకేత్ కోర్టు ఆదేశించింది. గురుగ్రామ్‌లోని ఆయన ఇంటి చిరునామాలో సమన్లను అందించాలని సూచించింది. ఈ కేసు తదుపరి విచారణ అక్టోబర్ 17న జరుగుతుంది. వికాస్ పాండే అనే వ్యక్తి గతంలో దాఖలు చేసిన పిటిషన్‌పై ఈ సమన్లు జారీ చేశారు.
ధ్రువ్ రాఠీ న్యాయపరమైన చిక్కుల్లో పడటం ఇదే తొలిసారి కాదు. ఆయనపై ఇతర కేసులు కూడా పెండింగ్‌లో ఉన్నాయి. బీజేపీ నాయకుడు సురేష్ కరమ్షి నఖువా, ధువ్ రాఠీపై సాకేత్ కోర్టులో రూ. 20 లక్షల పరువు నష్టం దావా వేశారు. జూలై 2024లో ధ్రువ్ రాఠీ అప్‌లోడ్ చేసిన ఒక వీడియోలో తనను ‘‘ హింసాత్మక, దూషణాత్మక ట్రోలర్’’ అని పిలిచాడని ఆరోపించాడు. ఈ కేసులో గతంలో కోర్టు సమన్లు జారీ చేసింది. హిందూ దేవీదేవతలపై, సనానత ధర్మంపై అనుచిత వ్యాఖ్యలు చేశారంటూ ధ్రువ్ రాఠీపై అమిత్ సచ్‌దేవ్ అనే వ్యక్తి ఫిర్యాదు చేశారు. భారత శిక్షాస్మృతిలోని సెక్షన్లు 196, 299 కింద ఎఫ్‌ఐఆర్ నమోదు చేయాలని ఆయన కోరారు.