స్టాక్ మార్కెట్ ఎప్పుడు.. ఎలా ఉంటుందో ఎవరికీ తెలియదు. ఒక్కరోజు ఒక్కోలా ఉంటుంది. కొన్ని షేర్లు పెట్టుబడిదారులకు ఊహించని స్థాయిలో రాబడులను అందిస్తుంటాయి. అలాంటి మల్టీబ్యాగర్ స్టాక్స్లో క్యుపిడ్ (Cupid) షేర్ కూడా ఒకటిగా నిలిచింది. కండోమ్ తయారీ సంస్థ క్యుపిడ్ షేర్ ధర గత కొంతకాలంగా భారీగా పెరుగుతోంది. కంపెనీ ప్రమోటర్ అదిత్య కుమార్ హల్వాసియా తన వాటాను పెంచుకోవడంతో ఈ షేర్ మరోసారి ఇన్వెస్టర్ల దృష్టిని ఆకర్షించింది. కేవలం ఐదేళ్లలోనే ఈ స్టాక్ దాదాపు 12,150 శాతం రాబడిని అందించింది.
ప్రమోటర్ వాటా పెంపు
క్యుపిడ్ చైర్మన్, మేనేజింగ్ డైరెక్టర్ అదిత్య కుమార్ హల్వాసియా రెండు విడతల్లో కంపెనీ షేర్లను కొనుగోలు చేశారు. స్టాక్ ఎక్స్ఛేంజ్కు కంపెనీ ఇచ్చిన సమాచార ప్రకారం.. ఆగస్టు 17న ఓపెన్ మార్కెట్ లావాదేవీల ద్వారా 13,95,538 క్యుపిడ్ షేర్లను కొనుగోలు చేశారు. ఇవి కంపెనీలో 0.10 శాతం వాటాకు సమానం. అదే విధంగా ఆగస్టు 18న మరో 8,03,000 షేర్లను.. అంటే 0.06 శాతం వాటాను కొనుగోలు చేశారు. ఈ కొనుగోళ్లతో కంపెనీలో అదిత్య కుమార్ హల్వాసియా వ్యక్తిగత వాటా 33.45 శాతానికి పెరిగింది. ప్రమోటర్, ప్రమోటర్ గ్రూప్ కలిపి క్యుపిడ్లో మొత్తం వాటా 46.40 శాతంగా ఉంది.
ఒక్క నెలలోనే 36 శాతం పెరిగిన షేర్
ప్రమోటర్ వాటా పెంచుకోవడంతో క్యుపిడ్ షేర్పై ఇన్వెస్టర్ల ఆసక్తి పెరిగింది. గత ఒక్క నెలలోనే ఈ షేర్ ధర 36 శాతానికి పైగా పెరిగింది. గత వారం ఈ స్టాక్ 52 వారాల గరిష్ఠ స్థాయిని కూడా తాకింది. గురువారం క్యుపిడ్ షేర్ ఇంట్రాడేలో రూ.286.80 దగ్గర గరిష్ఠాన్ని తాకింది. ఇది గత ముగింపు ధరతో పోలిస్తే దాదాపు 0.9 శాతం పెరుగుదల. అయితే వరుసగా రెండు రోజుల ర్యాలీ తర్వాత అధిక స్థాయిల దగ్గర ఇన్వెస్టర్లు లాభాల స్వీకరణకు దిగడంతో షేర్ ధర కొంత వెనక్కి వచ్చింది.
5 ఏళ్లలో 12,000 శాతానికిపైగా రిటర్న్స్
క్యుపిడ్ షేర్ దీర్ఘకాలికంగా అద్భుతమైన రాబడులను అందించింది. 2026 ఆగస్టు 14న ఈ షేర్ బీఎస్ఈలో రూ.298.95 దగ్గర 52 వారాల గరిష్ఠాన్ని నమోదు చేసింది. గత మూడు నెలల్లో క్యుపిడ్ షేర్ 137 శాతం పెరిగింది. ఆరు నెలల్లో ఏకంగా 233 శాతం ఎగబాకింది. ఏడాది కాలంలో దాదాపు 750 శాతం పెరిగింది. ఇక మూడు సంవత్సరాల్లో ఈ స్టాక్ 8,742 శాతం రాబడిని అందించింది. అత్యంత ఆశ్చర్యకరంగా.. గత ఐదేళ్లలో క్యుపిడ్ షేర్ ధర దాదాపు 12,150 శాతం పెరిగింది. అంటే ఈ కాలంలో ఈ షేర్ మల్టీబ్యాగర్ రిటర్న్స్ అందించినట్లైంది.
ప్రస్తుతం షేర్ ధర ఎంత?
మధ్యాహ్నం 1:25 గంటల సమయంలో క్యుపిడ్ షేర్ బీఎస్ఈలో 0.70 శాతం నష్టంతో రూ.282.30 దగ్గర ట్రేడ్ అయింది. ప్రమోటర్ వరుస కొనుగోళ్లు, భారీ గతకాలపు రాబడుల నేపథ్యంలో ఈ స్టాక్ మరోసారి మార్కెట్లో హాట్ టాపిక్గా మారింది.