ఆయుర్వేదంలో ఉదయాన్నే నిద్రలేవగానే నీళ్లు తాగడాన్ని ‘ఉషఃపానం’ అంటారు. రాత్రి వేళ రాగి పాత్రలో ఉంచిన నీటిని ఉదయం పరిగడుపున తాగడం గుండెకు చాలా మంచిది. ఇది శరీరంలోని టాక్సిన్స్ (వ్యర్థాలు) బయటకు పంపడానికి సహాయపడుతుంది. రక్తం సాఫీగా ప్రవహించేలా చేసి, రక్తపోటు (బీపీ) కంట్రోల్లో ఉండటానికి ఇది దోహదపడుతుంది. గుండె మీద అనవసరమైన ఒత్తిడి పడకుండా ఉండాలంటే ఉదయాన్నే నీళ్లు తాగడం అలవాటు చేసుకోవాలి. ఇలాంటి మరికొన్ని ఉదయం అలవాట్లను చూద్దాం ..
బ్రహ్మ ముహూర్తంలో నిద్రలేవడం, ధ్యానం: సూర్యోదయానికి ముందే, అంటే బ్రహ్మ ముహూర్తంలో నిద్రలేవడం వల్ల గుండెకు ఎంతో మేలు జరుగుతుంది. ఆ సమయంలో లభించే స్వచ్ఛమైన గాలి గుండెకు మంచి ఆక్సిజన్ను అందిస్తుంది. ఇక లేచిన తర్వాత ఒక 10 నిమిషాలు ప్రశాంతంగా కూర్చుని ధ్యానం లేదా ప్రాణాయామం చేయడం వల్ల స్ట్రెస్ హార్మోన్లు తగ్గుతాయి. ఇక నేటి కాలంలో గుండె జబ్బులకు ప్రధాన కారణం మానసిక ఒత్తిడే. కాబట్టి ప్రశాంతమైన మనస్సు గుండెను ఆరోగ్యంగా ఉంచుతుంది.
ఆయిల్ పుల్లింగ్ (నోటి శుభ్రత): ఉదయాన్నే బ్రష్ చేయడానికి ముందు ఒక చెంచా నువ్వుల నూనె లేదా కొబ్బరి నూనెను నోట్లో పోసుకుని కాసేపు పుక్కిలించడాన్ని ‘గండూషం’ లేదా ఆయిల్ పుల్లింగ్ అంటారు. నోటి ఆరోగ్యానికి, గుండె ఆరోగ్యానికి చాలా దగ్గర సంబంధం ఉందని ఆయుర్వేదంతో పాటు ఆధునిక సైన్స్ కూడా చెబుతోంది. ఇక నోట్లోని హానికరమైన బ్యాక్టీరియా రక్తంలోకి చేరి గుండె రక్తనాళాలను దెబ్బతీయకుండా ఉండటానికి ఈ అలవాటు అద్భుతంగా పనిచేస్తుంది.
ఇక ఆయుర్వేదం చెప్పే ఈ ఉదయపు అలవాట్లు కేవలం గుండెనే కాదు, మొత్తం శరీరాన్ని రోగాల బారిన పడకుండా కాపాడతాయి. పైసా ఖర్చు లేని ఈ చిన్న చిన్న మార్పులను మన బిజీ లైఫ్లో భాగం చేసుకుంటే, గుండె పదిలంగా ఉంటుంది. మెరుగైన జీవనశైలి, ప్రశాంతమైన మనస్సే ఆరోగ్యకరమైన గుండెకు అసలైన రహస్యం.
గమనిక: పైన ఇచ్చిన సమాచారం కేవలం మీ అవగాహన కోసం మాత్రమే అందించబడింది. మీకు ఇప్పటికే ఏదైనా గుండె సంబంధిత సమస్యలు లేదా ఇతర ఆరోగ్య సమస్యలు ఉంటే, ఈ అలవాట్లను ప్రారంభించే ముందు ఖచ్చితంగా మీ వైద్యుడిని లేదా ఆయుర్వేద నిపుణులను సంప్రదించడం మంచిది.
The post ఉదయం చేసే ఈ అలవాట్లు గుండెను కాపాడతాయా? appeared first on Manalokam – Latest Telugu News & Updates.