మీ ఇంట్లో LPG సిలిండర్ వాడుతున్నారా? అదే సమయంలో PNG (పైప్డ్ నేచురల్ గ్యాస్) కనెక్షన్ కూడా ఉందా? అయితే ఈ వార్త మీ కోసమే. కేంద్ర ప్రభుత్వం అత్యంత ప్రతిష్టాత్మకంగా “One Household, One Gas Connection” (ఒక ఇంటికి ఒకే గ్యాస్ కనెక్షన్) విధానాన్ని అమల్లోకి తెచ్చింది. దీని ప్రకారం, ఒకే ఇంట్లో రెండు రకాల గ్యాస్ కనెక్షన్లు ఉండటానికి వీల్లేదు. ఒకవేళ మీ ప్రాంతంలో PNG సౌకర్యం అందుబాటులో ఉంటే, మీరు తప్పనిసరిగా LPGని వదులుకోవాల్సి ఉంటుంది. ఇందుకు సంబంధించి కేంద్ర పెట్రోలియం శాఖ ఇప్పటికే స్పష్టమైన ఆదేశాలు జారీ చేసింది.
”Natural Gas and Petroleum Products Distribution Order, 2026″ కింద ఈ నిబంధనలను రూపొందించారు. దీని ప్రధాన ఉద్దేశ్యం గ్యాస్ పంపిణీలో పారదర్శకత తీసుకురావడం మరియు బ్లాక్ మార్కెటింగ్ను అరికట్టడం. ముఖ్యంగా PNG సౌకర్యం లేని మారుమూల ప్రాంతాల వారికి, పేద ప్రజలకు LPG సిలిండర్ల లభ్యతను పెంచడం కోసం ప్రభుత్వం ఈ నిర్ణయం తీసుకుంది. పట్టణ ప్రాంతాల్లో PNG కనెక్షన్ అందుబాటులోకి వచ్చిన తర్వాత కూడా చాలామంది భద్రత కోసమో లేదా ఇతర కారణాల వల్లనో LPG సిలిండర్లను కూడా దగ్గరే ఉంచుకుంటున్నారు. దీనివల్ల గ్యాస్ నిల్వలపై అనవసర ఒత్తిడి పెరుగుతోందని ప్రభుత్వం భావిస్తోంది.
ప్రభుత్వం విధించిన గడువు ప్రకారం, PNG అందుబాటులో ఉన్న ప్రాంతాల్లో నివసించే వారు 90 రోజుల లోపు ఏదో ఒక కనెక్షన్ను ఎంచుకోవాలి. ఈ గడువు జూన్ 30, 2026తో ముగియనుంది. ఈ లోపు నిర్ణయం తీసుకోని పక్షంలో అధికారులు క్షేత్రస్థాయిలో తనిఖీలు చేపట్టి, నిబంధనలు ఉల్లంఘించిన వారి కనెక్షన్లను నిలిపివేసే అవకాశం ఉంది. ఇప్పటికే దేశవ్యాప్తంగా అధికారులు అక్రమంగా రెండు కనెక్షన్లు వాడుతున్న ఇళ్లను గుర్తించే ప్రక్రియను వేగవంతం చేశారు.
PNG కనెక్షన్కు మారడం వల్ల వినియోగదారులకు పలు ప్రయోజనాలు ఉన్నాయి. ఇది LPG కంటే సుమారు 20-30% తక్కువ ధరకే లభిస్తుంది. సిలిండర్ బుక్ చేసుకోవడం, అది వచ్చే వరకు వేచి చూడటం వంటి ఇబ్బందులు ఉండవు. నిరంతరాయంగా గ్యాస్ సరఫరా జరుగుతుంది. ఈ మార్పును ప్రోత్సహించేందుకు ప్రభుత్వం విస్తృత ప్రచారం నిర్వహిస్తోంది. దీని ఫలితంగా ఒక్క మార్చి నెలలోనే దేశవ్యాప్తంగా 3.16 లక్షల కొత్త PNG కనెక్షన్లు నమోదయ్యాయి. వినియోగదారులు స్వచ్ఛందంగా ముందుకు వచ్చి తమ LPG కనెక్షన్లను సరెండర్ చేయాలని ప్రభుత్వం కోరుతోంది. ఇప్పటికే సుమారు 16,700 మందికి పైగా వినియోగదారులు తమ LPG కనెక్షన్లను వదులుకుని PNGకి మారారు.
ఒకవేళ మీరు PNG కనెక్షన్ తీసుకోవాలనుకుంటే ఆధార్ కార్డ్, నివాస ధృవీకరణ పత్రం (కరెంట్ బిల్లు లేదా రేషన్ కార్డ్) వంటివి అవసరమవుతాయి. అద్దె ఇళ్లలో ఉండేవారు యజమాని నుంచి నో అబ్జెక్షన్ సర్టిఫికేట్ (NOC) సమర్పించాల్సి ఉంటుంది. ముఖ్యంగా గుర్తుంచుకోవాల్సిన విషయం ఏమిటంటే, PNG కనెక్షన్ ఉన్నవారు ఇకపై కొత్త LPG కనెక్షన్ కోసం దరఖాస్తు చేసుకోవడానికి లేదా ఉన్న సిలిండర్ను రీఫిల్ చేసుకోవడానికి వీల్లేదు. నిబంధనలు కఠినతరం కావడంతో వినియోగదారులు సకాలంలో స్పందించి తమ కనెక్షన్ల స్థితిని సరిచూసుకోవడం ఉత్తమం. లేదంటే జూన్ 30 తర్వాత గ్యాస్ సరఫరా నిలిచిపోయి ఇబ్బందులు ఎదుర్కోవాల్సి రావచ్చు.