అప్పు కోసం పాక్ కొత్త డ్రామా.. మోస్ట్ వాంటెడ్ టెర్రరిస్ట్ మసూద్ అజార్‎పై రివార్డ్ పెంపు

ఇస్లామాబాద్: పాకిస్తాన్ మరోసారి తన కపట బుద్ధి బయటపెట్టింది. ఫైనాన్షియల్ యాక్షన్ టాస్క్ ఫోర్స్ (FATF) గ్రే లిస్ట్‌లోకి మళ్లీ వెళ్లకుండా కొత్త వ్యూహం పన్నింది. ఇందులో భాగంగా జైష్-ఎ-మహమ్మద్ చీఫ్, వరల్డ్ మోస్ట్ వాంటెడ్ టెర్రరిస్ట్ మసూద్ అజార్‎పై బౌంటీని రూ.70 లక్షలకు పెంచింది. ఈ మేరకు పాకిస్థాన్‌కు చెందిన ఫెడరల్ ఇన్వెస్టిగేషన్ ఏజెన్సీ ప్రకటించింది. కాగా, గతంలోనే మసూద్ అజార్‌ను పట్టించినవారికి పాకిస్తాన్ రూ.50 లక్షల రివార్డ్ ప్రకటించిన విషయం తెలిసిందే. తాజాగా దానిని మరో రూ.20 లక్షలు పెంచింది. 2026, అక్టోబర్‎లో జరగనున్న ఫైనాన్షియల్ యాక్షన్ టాస్క్ ఫోర్స్ ప్లీనరీ సమావేశానికి ముందే పాకిస్తాన్ తీసుకున్న ఈ నిర్ణయం టెర్రరిజంపై దాయాది దేశ ద్వంద్వ ప్రమాణాలకు నిదర్శమని విమర్శిస్తున్నారు అంతర్జాతీయ విశ్లేషకులు. 

పాక్‎కు గ్రే లిస్ట్ భయం:

ఫైనాన్షియల్ యాక్షన్ టాస్క్ ఫోర్స్ (FATF) ప్రపంచవ్యాప్తంగా మనీ లాండరింగ్, టెర్రరిస్ట్ ఫైనాన్సింగ్ వంటి చట్టవిరుద్ధమైన ఆర్థిక కార్యకలాపాలను పరిశీలిస్తుంది. ఆర్థిక నేరాల నియంత్రణలో విఫలమయ్యే లేదా ఉగ్రవాదానికి నిధులు సమకూర్చే దేశాలపై ఒత్తిడి తీసుకురావడానికి ఎఫ్‎ఏటీఎఫ్ బ్లాక్, గ్రే పేరిట రెండు జాబితాలను ప్రకటిస్తుంది. ఒక దేశం ఎఫ్‎ఏటీఎఫ్ బ్లాక్ లేదా గ్రే లిస్ట్‎లో చేరితే ఆ దేశ ఆర్థిక వ్యవస్థ, అంతర్జాతీయ ప్రతిష్ఠ తీవ్రంగా దెబ్బతినడంతో పాటు తీవ్ర ఆర్థిక ఆంక్షలు ఎదుర్కొవాల్సి ఉంటుంది. 

►ALSO READ | ఇండోనేసియాలో నౌక బోల్తా.. ఆరుగురు మృతి, 130 మంది గల్లంతు

ఎఫ్‎ఏటీఎఫ్ బ్లాక్ లేదా గ్రే లిస్ట్‎లో చేర్చిన దేశాలకు అంతర్జాతీయ ద్రవ్య నిధి (IMF), ప్రపంచ బ్యాంక్ (World Bank), ఆసియా అభివృద్ధి బ్యాంక్ (ADB) వంటి గ్లోబల్ సంస్థలు రుణాలు ఇవ్వవు. ఉగ్రవాదానికి పుట్టినిల్లుగా పేరుగాంచిన పాకిస్తాన్‎ను ఎఫ్‎ఏటీఎఫ్ గతంలో గ్రే లిస్ట్‏లో చేర్చింది. దీంతో దాయాది దేశం అంతర్జాతీయంగా అప్పులు పుట్టక తీవ్ర ఆర్థిక సంక్షోభంలో కూరుకుపోయింది. అష్టకష్టాల మీద గ్రే లిస్ట్ నుంచి బయటపడింది. 

2026, అక్టోబర్‎లో ఫైనాన్షియల్ యాక్షన్ టాస్క్ ఫోర్స్ ప్లీనరీ సమావేశం జరగనుంది. ఈ నేపథ్యంలోనే మోస్ట్ వాంటెడ్ టెర్రరిస్ట్ మసూద్ అజార్‎పై బౌంటీని పాకిస్తాన్ రూ.70 లక్షలకు పెంచింది. గ్రే లిస్ట్ భయంతోనే పాక్ ఈ డబుల్ గేమ్ ఆడుతోందని అంతర్జాతీయ విశ్లేషకులు పేర్కొంటున్నారు. ఉగ్రవాదులపై పాకిస్తాన్ కఠిన చర్యలు తీసుకుంటోందనే అభిప్రాయాన్ని కలిగించి అంతర్జాతీయ పరిశీలన నుంచి తప్పించుకోవడమే లక్ష్యంగా ఈ పాక్ కపట కుట్రకు తెరలేపింది.