KL Rahul: శ్రీలంకతో రేపటి (ఆగస్టు 15, శనివారం ) నుంచి ప్రారంభం కానున్న గాలే టెస్టులో భారత వైస్ కెప్టెన్ కేఎల్ రాహుల్ సరికొత్త చరిత్ర సృష్టించేందుకు రెడీ అవుతున్నాడు. ప్రస్తుత టీమిండియా హెడ్ కోచ్ గౌతమ్ గంభీర్ సాధించిన ఒక రికార్డును బ్రేక్ చేసేందుకు రాహుల్ అత్యంత సమీపంలో ఉన్నాడు. గాలే టెస్టులో రాహుల్ గనుక మరో రెండు పరుగులు చేస్తే చాలు, తన కోచ్ గంభీర్ను వెనక్కి నెట్టి అత్యధిక టెస్టు పరుగులు చేసిన భారత బ్యాటర్ల జాబితాలో ముందుకు దూసుకెళ్తాడు.
కోచ్ గంభీర్ వర్సెస్ వైస్ కెప్టెన్ రాహుల్:
గౌతమ్ గంభీర్ తన సుదీర్ఘ టెస్ట్ కెరీర్లో 58 మ్యాచ్లు ఆడి 4,154 పరుగులు (9 సెంచరీలు, 22 హాఫ్ సెంచరీలు) సాధించాడు. కాగా, కేఎల్ రాహుల్ ఇప్పటి వరకు 68 టెస్టుల్లో 4,153 పరుగులు (12 సెంచరీలు, 20 హాఫ్ సెంచరీలు) చేశాడు. అంటే మరో 2 పరుగులు సాధిస్తే గంభీర్ టెస్ట్ పరుగులను కేఎల్ రాహుల్ అధిగమిస్తాడు. ఇక్కడే మరో ఆసక్తికరమైన విషయమేమిటంటే.. 2016లో కేఎల్ రాహుల్ గాయం నుంచి కోలుకుని భారత జట్టులోకి వచ్చినప్పుడే, గంభీర్ ప్లేయింగ్ ఎలెవన్ లో చోటు కోల్పోవాల్సి వచ్చింది. ఇప్పుడు అదే గంభీర్ హెడ్ కోచ్గా ఉన్న సమయంలో రాహుల్ ఆయన రికార్డునే దాటబోతుండటం గమనార్హం.
వైస్ కెప్టెన్గా మళ్లీ పునరాగమనం:
2014లో టెస్ట్ క్రికెట్లోకి అరంగేట్రం చేసిన కేఎల్ రాహుల్, ప్రస్తుత జట్టులోని అత్యంత సీనియర్ ఆటగాళ్లలో ఒకరిగా నిలిచాడు. 2022లో వైస్ కెప్టెన్గా బాధ్యతలు చేపట్టినప్పటికీ, 2023లో ఫామ్ లేమితో జట్టులో చోటుతో పాటు వైస్ కెప్టెన్సీని కూడా కోల్పోయాడు. అయితే పట్టుదలతో రీఎంట్రీ ఇచ్చిన రాహుల్, జూన్లో మళ్లీ లీడర్షిప్ గ్రూప్లోకి వచ్చి, ప్రస్తుతం శుభ్మన్ గిల్ సారథ్యంలోని భారత జట్టుకు వైస్ కెప్టెన్గా కీలక బాధ్యతలు నిర్వర్తిస్తున్నాడు.
అత్యధిక టెస్ట్ రన్స్ చేసిన టాప్-5 భారత బ్యాటర్లు:
ర్యాంక్ ఆటగాడు మ్యాచ్లు పరుగులు
1 సచిన్ టెండూల్కర్ 200 15,921
2 రాహుల్ ద్రవిడ్ 164 13,265
3. సునీల్ గవాస్కర్ 125 10,122
4. విరాట్ కోహ్లీ 113 9,230
5. వీవీఎస్ లక్ష్మణ్ 134 8,781