1947.. దేశానికి స్వాతంత్ర్యం వచ్చిన సంవత్సరమే మాత్రమే కాదు.. భారత చరిత్రలో ఎన్నటికీ మానని గాయాన్ని మిగిల్చిన కాలం కూడా. దేశ విభజన నేపథ్యంలో ఎన్నో కథలు తెరకెక్కినా.. ‘బట్వారా 1947’ ( Batwara 1947 ) మాత్రం మతం కంటే మానవత్వమే గొప్పదని చెప్పే ప్రయత్నం చేస్తుంది. సన్నీ డియోల్, రాజ్కుమార్ సంతోషి కాంబినేషన్ లో తెరకెక్కిన ఈ చిత్రం ప్రపంచ వ్యాప్తంగా థియేటర్లలోకి ఈ రోజు ( ఆగస్టు 14, 2026 ) ఎంట్రీ ఇచ్చింది. దాదాపు మూడు దశాబ్దాల తర్వాత మళ్లీ తెరపై వీరిద్దరి కాంబినేషన్ లో వచ్చిన ఈ సినిమాకు పబ్లిక్ టాక్ ఎలా ఉందో చూద్దాం..
కథేంటంటే?
ఈ సినిమా కథ1947 ఆగస్టు 15కు ముందు మీరట్లో మొదలవుతుంది. సికందర్ మిర్జా (సన్నీ డియోల్), భార్య హమీదా ( ప్రీతి జింటా), పిల్లలు జావేద్, తన్నో స్వాతంత్ర్య వేడుకలకు సిద్ధమవుతుండగానే అల్లర్లు చెలరేగుతాయి. పరిస్థితులు విషమించడంతో కుటుంబం లాహోర్కు వలస వెళ్తుంది. ప్రయాణంలో జావేద్ తప్పిపోవడంతో కథ మరింత భావోద్వేగంగా మారుతుంది.
లాహోర్లో సికందర్ కుటుంబానికి ఓ పెద్ద ఇల్లు కేటాయిస్తారు. కానీ అక్కడ అప్పటికే ఓ వృద్ధ హిందూ మహిళ మాయి (Shabana Azmi) నివసిస్తుంటుంది. తన ఇల్లు, తన నేల వదిలి వెళ్లేందుకు ఆమె నిరాకరిస్తుంది. తొలుత ఇది ఆస్తి గొడవలా కనిపించినా.. క్రమంగా మాయి, మిర్జా కుటుంబం మధ్య ఏర్పడే అనుబంధమే అసలు కథగా మారుతుంది.
మరోవైపు ఖాళీగా ఉన్న ఇళ్లను ఆక్రమించుకుంటున్న యాకూబ్ పహల్వాన్ (అభిమన్యు సింగ్) మాయిని బయటకు పంపేందుకు ప్రయత్నిస్తాడు. ఇక్కడే సినిమా మత విద్వేషం మధ్య మానవత్వాన్ని బలంగా ముందుకు తెస్తుంది. ఓ హిందూ వృద్ధురాలిని ముస్లిం కుటుంబం కాపాడటం, సిక్కులు ఓ ముస్లిం విద్యార్థికి సహాయం చేయడం వంటి సన్నివేశాలు హృదయాన్ని తాకుతాయి.
ఎవరెవరు ఎలా చేశారంటే.?
సన్నీ డియోల్ సికందర్ పాత్రలో తన సహజమైన గంభీరతను చూపించారు. అయితే కొన్ని చోట్ల ఆయన యాక్షన్ హీరో ఇమేజ్ కథపై కాస్త ఎక్కువగా పడినట్లు అనిపిస్తుంది. శబానా ఆజ్మీ మాత్రం సినిమాకు అసలైన బలం. మాయి పాత్రలో ఆమె చూపిన బలహీనత, మొండితనం, మమకారం అద్భుతం అని సినీ ప్రియులు అభిప్రాయపడుతున్నారు. ప్రీతి జింటా హమీదాగా ఆకట్టుకోగా.. అలీ ఫజల్ అతిథి పాత్రలోనూ తనదైన ముద్ర వేస్తారు. కరణ్ డియోల్ మాత్రం భావోద్వేగ సన్నివేశాల్లో మరింత మెరుగ్గా రాణించాల్సి ఉందన్న టాక్ వినిపిస్తోంది..
కొన్ని సన్నివేశాలు సాగదీతగా అనిపించినా, క్లైమాక్స్ సినిమాకు అసలు బలాన్ని ఇస్తుందన్న అభిప్రాయాన్ని ప్రేక్షకులు వ్యక్తం చేస్తున్నారు.. ‘బట్వారా 1947స’ చెప్పే అసలు మాట ఒక్కటే విభజన దేశాలను సృష్టించొచ్చు.. కానీ మానవత్వాన్ని విభజించలేం. మతం చూసే ముందు మనిషిని చూడాలని గుర్తుచేసే ఈ కథ, సాధారణ కమర్షియల్ సినిమాకు మించిన భావోద్వేగాన్ని అందిస్తుంది. మరి బాక్సాఫీస్ వద్ద ఎలాంటి రికార్డులు సృష్టిస్తుందో చూడాలి మరి.
దర్శకుడు రాజ్కుమార్ సంతోషి రూపొందించిన ఈ చిత్రాన్ని ఆమిర్ ఖాన్ ప్రొడక్షన్స్ నిర్మించారు. ఏఆర్ రెహమాన్ సంగీతం, జావేద్ అఖ్తర్ సాహిత్యం ఈ సినిమాకు ప్రత్యేక ఆకర్షణగా నిలుస్తున్నారు. మరి బాక్సాఫీస్ వద్ద ఎలాంటి రికార్డులు సృష్టిస్తుందో చూడాలి మరి.