Pawan Kalyan: ఒక హీరో తెరపైకి వచ్చినప్పుడు అభిమానులు అరవడం సహజం. కానీ ఒక హీరో తెరపై కనిపించగానే ఒక తరం తనను తాను అందులో చూసుకోవడం మాత్రం చాలా అరుదు. తెలుగు సినిమా చరిత్రలో పవన్ కల్యాణ్ ప్రయాణం అలాంటి అరుదైన కథగానే చెప్పుకుంటారు. 1971 సెప్టెంబర్ 2న బాపట్లలో కొణిదెల వెంకట్రావు, అంజనాదేవి దంపతులకు జన్మించిన కొణిదెల కల్యాణ్ బాబు.. ఈరోజు పవన్ కల్యాణ్గా 55వ పుట్టినరోజు జరుపుకుంటున్నారు. సాధారణంగా పుట్టినరోజు అంటే వయసు పెరిగిన రోజుగా మాత్రమే చూస్తాం. కానీ పవన్ కల్యాణ్ విషయంలో సెప్టెంబర్ 2 అంటే మూడు దశాబ్దాలుగా ఒక హీరో తన చుట్టూ సృష్టించుకున్న ప్రత్యేకమైన ప్రపంచాన్ని గుర్తు చేసుకునే రోజు.
చిన్నప్పటి నుంచే ఆయనకు సినిమా ఒక్కటే ప్రపంచంగా ఉండేది కాదు. చదువును మధ్యలోనే ఆపేసిన కల్యాణ్ బాబు మార్షల్ ఆర్ట్స్ వైపు మొగ్గుచూపారు. కరాటేలో శిక్షణ తీసుకున్నారు. 1997లో మార్షల్ ఆర్ట్స్ ప్రదర్శన సందర్భంగా ఇషిన్ ర్యూ కరాటే అసోసియేషన్ నుంచి పవన్ అనే పేరు పొందారు. ఆ తర్వాత అదే పేరు ఆయన సినీ జీవితంలో ఒక గుర్తింపుగా మారింది. 1996లో అక్కడ అమ్మాయి ఇక్కడ అబ్బాయి సినిమాతో వెండితెరకు వచ్చినప్పుడు ప్రేక్షకుల ముందున్నది మరో కొత్త హీరో. కానీ ఆ కొత్త హీరోలో ఏదో భిన్నమైనది ఉందని ఆ తర్వాత వచ్చిన సినిమాలు క్రమంగా చెప్పడం మొదలుపెట్టాయి. ‘గోకులంలో సీత’, ‘సుస్వాగతం’, ‘తొలిప్రేమ’, ‘తమ్ముడు’, ‘బద్రి’, ‘ఖుషి’ వరుసగా వచ్చినప్పుడు పవన్ కల్యాణ్ అనే పేరు కేవలం హీరో పేరు కాకుండా యువతరానికి ఒక భావోద్వేగంగా మారిపోయింది.
అక్కడే పవన్ కల్యాణ్ స్టార్డమ్కు అసలు రూపం వచ్చింది. ఆయన హీరోయిజం కోసం పెద్దగా ప్రయత్నిస్తున్నట్టు కనిపించేది కాదు. ఒకసారి నడిచే తీరు, ఒకసారి తల తిప్పే విధానం, ఒకసారి చేతిని మెడపై పెట్టే స్టైల్, ఇంకోసారి సింపుల్గా చెప్పిన డైలాగ్.. ఇవే థియేటర్లో హంగామా సృష్టించేవి. తెరపై పవన్ కనిపించినప్పుడు కథ కాసేపు ఆగిపోయి ప్రేక్షకుల చూపంతా అతనిపైనే నిలిచిపోయే స్థాయి ఏర్పడింది. పవర్ స్టార్ అనే పేరు అక్కడి నుంచి అభిమానుల నోట్లో పుట్టింది. అది ప్రచారంతో వచ్చిన పేరు కాదు. థియేటర్లలో పుట్టిన పేరు.
అయితే ఈ కథ మొత్తం విజయాలతోనే నడవలేదు. జానీతో దర్శకుడిగా అడుగుపెట్టిన ఆయనకు ఎదురుదెబ్బ తగిలింది. ఆ తర్వాత ‘గుడుంబా శంకర్’, ‘బాలు’, ‘బంగారం’, ‘అన్నవరం’ వంటి సినిమాలు ఆశించిన ఫలితాలను ఇవ్వలేదు. ఒక దశలో పవన్ కల్యాణ్ సినిమా కెరీర్లో వేగం తగ్గినట్టే కనిపించింది. కానీ ఆ నిశ్శబ్దం ఎక్కువ కాలం నిలవలేదు. జల్సాతో తిరిగి ఊపందుకున్న ఆయన, 2012లో ‘గబ్బర్ సింగ్’తో మరోసారి తన ప్రభావం ఏమిటో చూపించారు. ఆ తర్వాత ‘అత్తారింటికి దారేది’ ఆయనను మరోసారి అగ్రస్థానంలో నిలబెట్టింది. వరుస పరాజయాల తర్వాత కూడా ఒక హీరో ఇంతటి బలంతో తిరిగి రావడం ఆయన కెరీర్లోని ప్రత్యేకమైన అధ్యాయం.
ఇంతలో ఈ రంగుల ప్రపంచం నుంచి ఆయన మరో ప్రపంచాలోకి ప్రయాణం మొదలుపెట్టారు. 2014లో జనసేన పార్టీని స్థాపించి రాజకీయాల్లోకి అడుగుపెట్టారు. ఆ ప్రయాణం మొదటి అడుగులోనే విజయాల బాట పట్టలేదు. 2019 ఎన్నికల్లో రెండు స్థానాల్లో పోటీ చేసి ఓడిపోయారు. జనసేనకు కూడా తీవ్ర ఎదురుదెబ్బ తగిలింది. అయినా అక్కడితో ఆయన రాజకీయ ప్రయాణం ముగియలేదు. ఐదేళ్ల తర్వాత 2024లో పిఠాపురం నుంచి గెలిచి అసెంబ్లీలోకి అడుగుపెట్టారు. జనసేన పోటీ చేసిన 21 అసెంబ్లీ స్థానాల్లో విజయం సాధించింది. ఆ తర్వాత ఆంధ్రప్రదేశ్ ఉప ముఖ్యమంత్రిగా బాధ్యతలు చేపట్టారు.
ఒకప్పుడు థియేటర్లో ఆయన ఎంట్రీకి వేల గొంతులు ఒకేసారి గర్జించేవి. ఇప్పుడు అదే వ్యక్తి ప్రజల మధ్య నిలబడి నిర్ణయాలు తీసుకోవాల్సిన బాధ్యతలో ఉన్నారు. తెరపై ఒక హీరోకు అభిమానుల ప్రేమ ఉంటుంది. బయట జీవితంలో ఒక ప్రజాప్రతినిధికి ప్రజల అంచనాలు ఉంటాయి. ఈ రెండింటి మధ్య దూరం చాలా పెద్దది. పవన్ కల్యాణ్ ప్రయాణం ఆ దూరాన్ని దాటిన ప్రయాణం.
అందుకే 55వ పుట్టినరోజు సందర్భంగా పవన్ కల్యాణ్ను కేవలం ఒక నటుడిగా గుర్తు చేసుకోవడం సరిపోదు. కల్యాణ్ బాబుగా మొదలైన ప్రయాణం పవన్ కల్యాణ్గా మారింది. పవన్ కల్యాణ్ నుంచి పవర్ స్టార్గా ఎదిగింది. ఆ తర్వాత రాజకీయాల్లోకి వెళ్లి జనసేనానిగా మరో గుర్తింపును సంపాదించుకుంది. పేర్లు మారాయి, వేదికలు మారాయి, బాధ్యతలు మారాయి. కానీ తెరపై ఆయన కనిపించిన క్షణంలో ఒక తరం అనుభవించిన ఆ ఉత్సాహం మాత్రం ఇప్పటికీ అలాగే ఉంది. 55 ఏళ్ల వయసులోనూ పవన్ కల్యాణ్ కథ పూర్తయిన కథలా అనిపించకపోవడానికి కారణం అదే. అది ఇంకా ముందుకు కదులుతున్న కథ.