Bangladesh vs Australia: ఆస్ట్రేలియాలోని డార్విన్ వేదికగా జరిగిన తొలి టెస్టులో బంగ్లాదేశ్ 9 వికెట్ల తేడాతో ఆస్ట్రేలియాను చిత్తు చేసి చారిత్రాత్మక విజయాన్ని నమోదు చేసుకుంది. ఈ విజయంతో రెండు మ్యాచ్ల టెస్టు సిరీస్లో బంగ్లాదేశ్ 1–0 తేడాతో ఆధిక్యంలో నిలిచింది. 2003లో ఆస్ట్రేలియా గడ్డపై తొలిసారి టెస్టు మ్యాచ్ ఆడిన బంగ్లా, అక్కడ తమ మొదటి విజయాన్ని సొంతం చేసుకోవడానికి ఏకంగా 23 ఏళ్ల పాటు వేచి చూడాల్సి వచ్చింది. తొలి ఇన్నింగ్స్లో ఆసీస్ ను 198 పరుగులకే పరిమితం చేసిన బంగ్లాదేశ్, తమ మొదటి ఇన్నింగ్స్లో 426 రన్స్ స్కోరు సాధించి 228 పరుగుల కొండంత ఆధిక్యాన్ని పొందింది. ఆ తర్వాత రెండో ఇన్నింగ్స్లో కంగారుల జట్టు 284 పరుగులకు ఆలౌట్ కాగా, బంగ్లాదేశ్ 57 రన్స్ తేలికపాటి లక్ష్యాన్ని ఈజీగా ఛేదించి చరిత్ర సృష్టించింది.
తొలి రోజే మ్యాచ్ పోయింది.. సాకులు చెప్పను: ప్యాట్ కమిన్స్
సొంతగడ్డపై ఎదురైన ఈ సంచలన పరాభవంపై ఆస్ట్రేలియా కెప్టెన్ ప్యాట్ కమిన్స్ స్పందిస్తూ, తొలి రోజు తమ బ్యాటింగ్ వైఫల్యమే ఓటమికి ప్రధాన కారణమని ఒప్పుకున్నాడు. మ్యాచ్కి ముందు సన్నాహాలు పక్కాగా సాగాయని, అందువల్ల తమ ఓటమికి ఎలాంటి సాకులు చెప్పలేనని స్పష్టం చేశాడు. తొలి రోజు వికెట్ పేస్కు సహకరిస్తున్న సమయంలో తమ బ్యాటర్లు మరికొంత సమయం క్రీజులో నిలబడి ఆడాల్సింది అని అభిప్రాయపడ్డాడు. బౌలింగ్లో కూడా ప్రత్యర్థిపై ఒత్తిడి చేయలేకపోయామని, బంగ్లాదేశ్ ఆటగాళ్లు అన్ని విభాగాల్లోనూ అద్భుతంగా రాణించి ఈ అర్హత కలిగిన విజయాన్ని దక్కించుకున్నారని కమిన్స్ కొనియాడాడు.
బంగ్లాదేశ్ టెస్టు క్రికెట్లో ఇది బిగ్గెస్ట్ ఛేంజ్: కెప్టెన్ శాంటో
డార్విన్ టెస్ట్ విజయంపై బంగ్లాదేశ్ కెప్టెన్ నజ్ముల్ హొస్సేన్ శాంటో చాలా ఆనందం వ్యక్తం చేశాడు. జట్టు సభ్యుల కష్టానికి దక్కిన ఫలితమే ఈ విజయం అని పేర్కొన్నాడు. ఐదారు ఏళ్ల క్రితం బంగ్లాదేశ్లో తగినన్ని అవకాశాలు లేకపోవడంతో పేస్ బౌలర్లు టెస్టు క్రికెట్ ఆడేందుకు పెద్దగా ఆసక్తి చూపించేవారు కాదని, కానీ గత రెండుమూడేళ్లుగా ఎక్కువ టెస్టులు ఆడుతుండటంతో ప్లేయర్లు రెడ్ బాల్ ఫార్మాట్కు ఎంతో ప్రాధాన్యత ఇస్తున్నారని పేర్కొన్నాడు. తాము కూడా ప్రపంచస్థాయి ఆటగాళ్లుగా నిరూపించుకోవాలనే పట్టుదలతో ఆడుతున్నామని, ఈ గెలుపు బంగ్లా టెస్టు చరిత్రలోనే అతిపెద్ద మార్పుకు సంకేతమని శాంటో సంతోషం వ్యక్తం చేశాడు. ఇరు జట్ల మధ్య రెండో టెస్టు మ్యాచ్ ఆగస్టు 22 నుంచి 26వ తేదీ వరకు మెక్కే (MacKay) వేదికగా జరగనుంది.
🔴PAT CUMMINS BLAMES THE PITCH FOR AUSTRALIA’S LOSS 🤯
Cummins🎙️: The pitch was rock hard with a bit of grass, so we thought the first hour might be tough. But after that, it felt like a pretty good batting track.
We expected it to crack up in the heat and spin on Days 4 and 5,… pic.twitter.com/BJmiDYGe2L
— Sam (@cricsam02) August 16, 2026