Whale Graveyard : హిందూ మహాసముద్రంలోని ఆస్ట్రేలియా పశ్చిమ తీరంలో శాస్త్రవేత్తలు ప్రపంచంలోనే అత్యంత పెద్దదైన, లోతైన ‘తిమింగలాల శ్మశానాన్ని’ (Whale Graveyard) కనుగొన్నారు. ‘డైమంటినా ఫ్రాక్చర్ జోన్’ (Diamantina Fracture Zone) లో సముద్ర మట్టానికి దాదాపు 7 కిలోమీటర్ల లోతులో, 1,200 కిలోమీటర్ల మేర ఈ ప్రాంతం విస్తరించి ఉంది. చైనీస్ అకాడమీ ఆఫ్ సైన్సెస్ పరిశోధకులు ‘ఫెండౌఝే’ (Fendouzhe) అనే సబ్మెర్సిబుల్ ద్వారా ఇక్కడ దాదాపు కోటి (10 మిలియన్లు) కి పైగా తిమింగలాల అస్థిపంజరాలు ఉన్నట్లు అంచనా వేశారు. ఇందులో 53 లక్షల సంవత్సరాల క్రితం నాటి పురాతన శిలాజాలతో పాటు, ‘స్టెరోసెటస్ డైమంటినే’ అనే అంతరించిపోయిన అరుదైన తిమింగలం జాతి ఎముకలను కూడా గుర్తించారు. ఈ జలాంతర్గామి 2023 సంవత్సరమంతా మొత్తం 32 లోతైన డైవ్లను నిర్వహించింది. వాటి ఫలితాలను ఇప్పుడు బయట ప్రపంచంతో పంచుకున్నారు శాస్త్రవేత్తలు.
ఈ ప్రాంతంలోనే ఇన్ని తిమింగలాలు అస్థిపంజరాలు పేరుకుపోవడాన్ని చూసి సైంటిస్ట్ లు కూడా ఆశ్చర్యపోయారు. ఈ సముద్ర భాగం ఒకప్పుడు తిమింగలాలకు ప్రధాన ఆహార కేంద్రంగా ఉండటంతో ఇక్కడ వాటి సంచారం ఎక్కువగా ఉండేది. చనిపోయిన తిమింగలాల శరీరాలను ఇక్కడి ‘V’ ఆకారపు లోయలు ఒక సర్కిల్ లాక్కుంటూ ఒకే చోటికి చేర్చాయి. అంతటి లోతులో మట్టి పేరుకుపోయే ప్రమాదం చాలా తక్కువగా ఉండటం, అలాగే సముద్రపు నీటిలోని రసాయనాలు ఎముకలపై ఒక రక్షణ పొరలా ఏర్పడటం వల్ల.. ఇవి కుళ్ళిపోకుండా మిలియన్ల సంవత్సరాల పాటు భద్రంగా ఉన్నాయి.
అయితే ఈ వింత శ్మశానం కేవలం ఎముకల కుప్పగా మిగిలిపోకుండా, సముద్ర గర్భంలోని జీవకోటికి జీవనాధారంగా (Whale Falls) మారింది. చనిపోయిన తిమింగలాల శరీరాల నుండి విడుదలయ్యే భారీ పోషకాల వల్ల.. అక్కడ ఎముకలను తినే పురుగులు, అరుదైన జెల్లీఫిష్లు, స్టార్ ఫిష్లు వంటి సైన్స్కు కొత్తగా తెలిసిన వింత జీవులు జీవిస్తున్నాయి. అంతేకాకుండా ఈ మిలియన్ల కొద్దీ తిమింగలాల అస్థిపంజరాలు దాదాపు 67 లక్షల టన్నుల కార్బన్ను సముద్ర గర్భంలోనే బంధించి ఉంచడం ద్వారా పర్యావరణ సమతుల్యతకు కూడా ఎంతో సహాయపడుతున్నాయి.