IPL 2026 Career Ending Player: ఇండియన్ ప్రీమియర్ లీగ్ (IPL) అంటేనే ప్రతిభకు పట్టాభిషేకం. ఇక్కడ రాణించిన వారు రాత్రికి రాత్రే స్టార్లుగా మారిపోతారు. వైభవ్ సూర్యవంశీ, అన్షుల్ కాంబోజ్ వంటి యువ ఆటగాళ్లు తమ సత్తా చాటుతూ చరిత్ర సృష్టిస్తుంటే, మరికొందరు మాత్రం ఒత్తిడికి చిత్తవుతున్నారు. ముఖ్యంగా ఈ ఏడాది అరంగేట్రం చేసిన కొందరు ఆటగాళ్లు తమ ప్రదర్శనతో ఫ్రాంచైజీలను తీవ్రంగా నిరాశపరిచారు.
1. డానిష్ మలేవార్ (ముంబై ఇండియన్స్): విదర్భకు చెందిన 22 ఏళ్ల ఓపెనర్ డానిష్ మలేవార్ మీద ముంబై ఇండియన్స్ భారీ అంచనాలు పెట్టుకుంది. రోహిత్ శర్మ గాయపడటంతో బ్యాకప్ ఓపెనర్గా ఉన్న ఇతనికి అనూహ్యంగా అవకాశం దక్కింది. కానీ, గుజరాత్ టైటాన్స్తో జరిగిన డెబ్యూ మ్యాచ్లో కేవలం 2 పరుగులు మాత్రమే చేసి నిరాశపరిచాడు. ఆ తర్వాత చెన్నై సూపర్ కింగ్స్తో జరిగిన హై-వోల్టేజ్ మ్యాచ్లో గోల్డెన్ డక్ (సున్నా) అవుట్ అయ్యాడు. దీంతో ముంబై మేనేజ్మెంట్ ఇతనిపై నమ్మకం కోల్పోయింది. రాబోయే వేలంలో ఇతనికి అవకాశం దక్కడం దాదాపు అసాధ్యమే.
2. సాహిల్ పరాఖ్ (ఢిల్లీ క్యాపిటల్స్): 18 ఏళ్ల ఈ యువ బ్యాటర్ మహారాష్ట్ర తరపున దేశవాళీ క్రికెట్లో అదరగొట్టాడు. దీంతో ఢిల్లీ క్యాపిటల్స్ నిశాంకను తప్పించి మరీ ఇతనికి ఓపెనింగ్ ఛాన్స్ ఇచ్చింది. అయితే, రాయల్ ఛాలెంజర్స్ బెంగళూరుతో జరిగిన మ్యాచ్లో సీనియర్ పేసర్ భువనేశ్వర్ కుమార్ వేసిన వేగానికి సాహిల్ దగ్గర సమాధానం లేకపోయింది. కేవలం రెండు బంతులు ఎదుర్కొని డకౌట్ అయ్యాడు. ఐపీఎల్ లాంటి పెద్ద టోర్నీల్లో పదే పదే అవకాశాలు రావు. సాహిల్ కెరీర్కు ఇది పెద్ద ఎదురుదెబ్బగా మారింది.
3. కృష్ భగత్ (ముంబై ఇండియన్స్): పంజాబ్ నుంచి వచ్చిన 21 ఏళ్ల ఫాస్ట్ బౌలర్ కృష్ భగత్ పట్ల హార్దిక్ పాండ్యా జట్టు పెద్ద రిస్క్ తీసుకుంది. దీపక్ చాహర్ వైఫల్యంతో కృష్కు ప్లేయింగ్ ఎలెవన్లో చోటు దక్కింది. కానీ, తను ఆడిన మూడు మ్యాచ్ల్లోనూ దారుణంగా పరుగులు సమర్పించుకున్నాడు. 10.5 ఎకానమీ రేటుతో బౌలింగ్ చేస్తూ ఒక్క వికెట్ కూడా పడగొట్టలేకపోయాడు. ఒక ఫాస్ట్ బౌలర్గా కీలక సమయాల్లో వికెట్లు తీయలేకపోవడం ఇతని భవిష్యత్తును ప్రశ్నార్థకం చేసింది.
4. జార్జ్ లిండే (లక్నో సూపర్ జాయింట్స్): దక్షిణాఫ్రికా ఆల్ రౌండర్ జార్జ్ లిండే కథ కొంచెం భిన్నమైంది. వేలంలో అన్ సోల్డ్ గా మిగిలిపోయిన ఇతనికి హసరంగ స్థానంలో లక్నో జట్టులో అవకాశం దక్కింది. మూడు మ్యాచ్ల్లో అవకాశం ఇచ్చినా.. బ్యాట్తో కేవలం 31 పరుగులు, బౌలింగ్లో కేవలం ఒక వికెట్ మాత్రమే తీశాడు. 34 ఏళ్ల వయస్సులో ఉన్న లిండేకు, విదేశీ ఆటగాళ్ల కోటాలో ఇలాంటి ప్రదర్శన చేస్తే తదుపరి సీజన్లలో చోటు దక్కడం కష్టమే.
వచ్చిన అవకాశాన్ని అందిపుచ్చుకున్నవారే ఐపీఎల్ చరిత్రలో నిలుస్తారు. ఈ నలుగురు ఆటగాళ్లకు 2026 సీజన్ మొదటిది మరియు చివరిది అయ్యే అవకాశాలు ఎక్కువగా కనిపిస్తున్నాయి. వీరి స్థానంలో కొత్త టాలెంట్ కోసం ఫ్రాంచైజీలు వేట మొదలుపెట్టే అవకాశం ఉంది.
మరిన్ని క్రీడా వార్తల కోసం ఇక్కడ క్లిక్ చేయండి..