హైదరాబాద్‌లోని ఉప్పల్ రాజీవ్ గాంధీ అంతర్జాతీయ క్రికెట్ స్టేడియంలో ఈ నెల 14న భారత్ – వెస్టిండీస్ జట్ల మధ్య జరగనున్న నాల్గవ టీ20 (4th T20) మ్యాచ్ టికెట్ల విక్రయాలపై తీవ్ర స్థాయిలో అయోమయం నెలకొంది. ఆన్‌లైన్ టికెటింగ్ పోర్టల్‌లో మ్యాచ్ టికెట్లన్నీ అప్పుడే ‘సోల్డ్ ఔట్’ (Sold Out) అయినట్లు చూపిస్తుండటంతో క్రికెట్ అభిమానులు తీవ్ర గందరగోళానికి గురవుతున్నారు. అయితే ఇప్పటివరకు కేవలం 12 వేల టికెట్లు మాత్రమే విక్రయించామని హైదరాబాద్ క్రికెట్ అసోసియేషన్ (HCA) వర్గాలు చెబుతుండగా, ఆన్‌లైన్ వెబ్‌సైట్ , యాప్‌లో మాత్రం టికెట్లన్నీ పూర్తయిపోయినట్లు ప్రత్యక్షమవ్వడం అనుమానాలకు తావిస్తోంది. టికెట్లు దొరక్క ఆన్‌లైన్‌లో ప్రయత్నిస్తున్న అభిమానులకు నిరాశే ఎదురవుతోంది.
‘జిని’ యాప్ జెన్యూన్ కాదంటూ అభిమానుల ఆందోళన
టికెట్ల విక్రయ బాధ్యతలను చేపట్టిన ‘జిని’ (Zini) యాప్ విశ్వసనీయతపై పలువురు క్రికెట్ అభిమానులు తీవ్ర అనుమానాలు వ్యక్తం చేస్తున్నారు. అసలు ఈ యాప్ జెన్యూన్ కాదని, టికెట్ల కేటాయింపులో తీవ్ర పారదర్శకత లోపించిందని కొందరు అభిమానులు ఆరోపిస్తున్నారు. టికెట్ల అమ్మకాలు ప్రారంభమైన కొద్ది నిమిషాల్లోనే ఆన్‌లైన్‌లో ‘సోల్డ్ ఔట్’ బోర్డులు దర్శనమివ్వడం వెనుక పక్కదోవ పట్టిన వ్యవహారం ఏదైనా ఉందా అనే సందేహాలు వ్యక్తమవుతున్నాయి. టికెట్ల బ్లాక్ మార్కెటింగ్ జరుగుతోందా లేదా యాప్ సాంకేతిక లోపమా అనే అంశంపై హెచ్‌సీఏ నిర్దిష్ట ప్రకటన చేయకపోవడం అభిమానుల ఆగ్రహానికి కారణమవుతోంది.
ప్రతిసారీ ఇదే తీరు.. తీరు మారని హెచ్‌సీఏ యాజమాన్యం
ఉప్పల్ స్టేడియంలో అంతర్జాతీయ మ్యాచ్‌లు జరిగిన ప్రతిసారీ టికెట్ల విక్రయాల విషయంలో హెచ్‌సీఏ వివాదాల్లో చిక్కుకోవడం పరిపాటిగా మారిందని క్రికెట్ ప్రేమికులు తీవ్ర అసహనం వ్యక్తం చేస్తున్నారు. గతంలో కూడా టికెట్ల విక్రయాల సమయంలో క్యూలైన్లలో త్రోపులాటలు, ఆన్‌లైన్ సైట్లు క్రష్ అవ్వడం, బ్లాక్ మార్కెటింగ్ ఆరోపణలు వెల్లువెత్తిన సంగతి తెలిసిందే. ఎన్ని మ్యాచ్‌లు మారినా హెచ్‌సీఏ యాజమాన్యం తీరు మాత్రం మారడం లేదని అభిమానులు మండిపడుతున్నారు. ఇప్పటికైనా తెలంగాణ ప్రభుత్వం, క్రీడా శాఖ జోక్యం చేసుకుని ఉప్పల్ టీ20 మ్యాచ్ టికెట్ల విక్రయాలపై స్పష్టత నిచ్చి, పారదర్శకంగా ఆన్‌లైన్‌లో టికెట్లను అందుబాటులోకి తీసుకురావాలని నగర క్రికెట్ అభిమానులు విజ్ఞప్తి చేస్తున్నారు.