Vicky Kaushal – Aditya Dhar : బాలీవుడ్‌లో విక్కీ కౌశల్ దూకుడుకు బ్రేకులు వేయడం ఎవరి వల్లా కావడం లేదు. ‘యూరి’తో మొదలైన ఆయన సక్సెస్ జైత్రయాత్ర, ఇటీవల వచ్చిన ‘ఛావా’ వరకు నిర్విరామంగా కొనసాగుతోంది. సినిమా సినిమాకూ జోనర్ మార్చేస్తూ మినిమమ్ గ్యారెంటీ స్టార్‌గా మారిన ఈ టాలెంటెడ్ హీరో, ఇప్పుడు ఏకంగా పురాణాల బాట పట్టబోతున్నారు. అయితే ఇక్కడే ఒక ప్రాజెక్ట్ మూలనపడటం, మరో భారీ మైథాలజీ ప్రాజెక్ట్ పట్టాలెక్కడం సినీ వర్గాల్లో తీవ్ర చర్చనీయాంశంగా మారింది. విక్కీకి కెరీర్ బెస్ట్ హిట్ ఇచ్చిన డైరెక్టర్ ఆదిత్య ధర్‌తో కలిసి చేయాల్సిన అత్యంత ప్రతిష్టాత్మక చిత్రం ‘ది ఇమ్మోర్టల్ అశ్వత్థామ’. భారీ బడ్జెట్ కారణంతో కొన్నాళ్లు హోల్డ్‌లో పడిన ఈ కథ, పలువురు టాలీవుడ్ స్టార్ హీరోల చుట్టూ చక్కర్లు కొట్టి చివరకు మళ్లీ విక్కీ చేతులకే వచ్చిందన్న ప్రచారం సాగింది. కానీ విక్కీ ఉన్నపళంగా వరుస ప్రాజెక్టులతో బిజీ అయిపోవడంతో ఈ డ్రీమ్ ప్రాజెక్ట్ దాదాపు షెడ్‌కు వెళ్లినట్లే కనిపిస్తోంది. మరోవైపు దర్శకుడు ఆదిత్య ధర్ సైతం రణ్‌వీర్ సింగ్‌తో వేరే ప్రాజెక్ట్‌ను లైన్‌లో పెట్టే పనుల్లో పడటంతో ఈ కాంబో ఇప్పట్లో సెట్ అయ్యే అవకాశాలు కనిపించడం లేదు.
‘అశ్వత్థామ’ పక్కకు వెళ్లినప్పటికీ, మైథాలజీ జోనర్‌ను విక్కీ వదిలిపెట్టడం లేదు. ‘స్త్రీ 2’ ఫేమ్ డైరెక్టర్ అమర్ కౌశిక్ దర్శకత్వంలో అనౌన్స్ అయిన బిగ్గెస్ట్ ప్రాజెక్ట్ ‘మహావతార్’ను సెట్స్‌పైకి తీసుకెళ్లడానికి రంగం సిద్ధమైంది. చిరంజీవి పరశురాముడి జీవితం ఆధారంగా తెరకెక్కనున్న ఈ సినిమాను మ్యాడాక్ ఫిల్మ్స్ నిర్మిస్తోంది. వచ్చే ఏడాది (2027) జనవరి నుంచే ఈ క్రేజీ ప్రాజెక్ట్ రెగ్యులర్ షూటింగ్ ప్రారంభం కానుందని మేకర్స్ స్పష్టం చేశారు. ప్రస్తుతం సంజయ్ లీలా భన్సాలీ తెరకెక్కిస్తున్న ‘లవ్ అండ్ వార్’ చిత్రంలో రణ్‌బీర్ కపూర్, ఆలియా భట్‌లతో కలిసి నటిస్తున్న విక్కీ, ఆ రొమాంటిక్ వార్ డ్రామా పూర్తయిన వెంటనే పరశురాముడిగా గండ్రగొడ్డలి పట్టుకుని రంగంలోకి దిగనున్నారట. ఈ పౌరాణిక పోరాటం బాక్సాఫీస్ వద్ద ఎన్ని సంచలనాలు సృష్టిస్తుందో చూడాలి.