దేశ వ్యాప్తంగా ఆయా రాష్ట్రాల్లో అక్టోబర్ 6న జరిగిన ఉప ఎన్నికల ఫలితాలు శుక్రవారం విడుదలయ్యాయి. పశ్చిమ బెంగాల్, తమిళనాడు, పుదుచ్చేరి, అస్సాం రాష్ట్రాల్లో జరిగిన ఆరు ఉప ఎన్నికల ఓట్ల లెక్కింపు ఉదయం నుంచి కొనసాగుతోంది. తమిళనాడులోని సీఎం విజయ్ పార్టీ టీవీకే దూకుడు ప్రదర్శించింది. మధురాంతకం, ధరాపురంలో టీవీకే పార్టీ విజయం సాధించింది. మదురాంతకంలో టీవీకే చెందిన కె.మరగతం కుమారవేల్ గెలుపొందారు. డీఎంకేకు చెందిన ఐ పరంధామెన్ ఓటమి పాలయ్యారు. ఇక ధరాపురం టీవీకే చెందిన సత్యబామ విజయం సాధించగా… డీఎంకేకు చెందిన సుగన్య ఎస్ ఓటమి పాలయ్యారు.
భారత ఎన్నికల సంఘం గణాంకాల ప్రకారం… పుదుచ్చేరిలోని తట్టన్‌చావడి అసెంబ్లీ ఉప ఎన్నికలో ఆల్ ఇండియా ఎన్‌ఆర్ కాంగ్రెస్ (ఏఐఎన్‌ఆర్‌సీ) అభ్యర్థి అశోక్ ఆనంద్ 8,482 ఓట్ల తేడాతో గెలుపొందారు. పుదుచ్చేరి ముఖ్యమంత్రి, ఏఐఎన్‌ఆర్‌సీ అధినేత ఎన్. రంగస్వామి అసెంబ్లీ ఎన్నికల్లో తాను గెలిచిన రెండు నియోజకవర్గాల్లో ఒకటైన మంగళాన్ని నిలుపుకొని.. తట్టంచవాడి స్థానాన్ని వదులుకోవడంతో తట్టంచవాడి సీటు ఖాళీ అయ్యింది. ఇక అస్సాంలోని నాగావ్ లోక్‌సభ నియోజకవర్గంలో బీజేపీకి చెందిన దేవశిష్ శర్మ 81,238 ఓట్ల ఆధిక్యంతో ముందంజలో ఉన్నారు. ఇక పశ్చిమ బెంగాల్‌లో నందిగ్రామ్, రెజీనగర్‌లో బీజేపీ ఆధిక్యంలో దూసుకెళ్తోంది.