భారతదేశంలో పాముకాటు ఒక తీవ్రమైన ప్రజారోగ్య సమస్యగా మారింది. ప్రతి ఏటా వేల మంది పాముకాటుకు గురై మరణిస్తున్నారు. ముఖ్యంగా పొలాల్లో పనిచేసే రైతులు, ఇంటి ఆరుబయట నిద్రించేవారు ఈ ప్రమాదానికి ఎక్కువగా గురవుతున్నారు. మన దేశంలో కనిపించే అత్యంత విషపూరితమైన పాములలో నాగుపాము (కోబ్రా), కట్లపాము (కామన్ క్రెయిట్) ప్రముఖమైనవి.. ఈ రెండూ ప్రాణాంతకమైనవే అయినప్పటికీ, వీటి విష ప్రభావం, కాటు లక్షణాల మధ్య కొన్ని కీలకమైన తేడాలు ఉన్నాయి. వీటిని తెలుసుకోవడం.. అవగాహనతో ఉండటం అత్యవసరం..
నాగుపాము (కోబ్రా) విష ప్రభావం
నాగుపాము విషం ప్రధానంగా నాడీ వ్యవస్థ (న్యూరోటాక్సిక్)పై తీవ్ర ప్రభావం చూపుతుంది. కాటు పడిన కొద్దిసేపటికే బాధితుడికి కనురెప్పలు వాలిపోవడం, దృష్టి మసకబారడం, మాట్లాడటం లేదా మింగడం కష్టంగా మారడం వంటి లక్షణాలు కనిపించవచ్చు. విష ప్రభావం పెరిగే కొద్దీ కండరాలు బలహీనపడతాయి, శ్వాస తీసుకోవడంలో తీవ్ర ఇబ్బంది ఏర్పడి ప్రాణాపాయం సంభవించవచ్చు. నాగుపాము కాటు పడిన ప్రదేశంలో సాధారణంగా నొప్పి, వాపు వంటి స్థానిక లక్షణాలు కూడా కనిపిస్తాయి. అయితే, ప్రతి కాటులో ఒకే విధమైన విషం శరీరంలోకి చేరదు.
కట్లపాము (కామన్ క్రెయిట్) ఎందుకు అత్యంత ప్రమాదకరం?
కట్లపాము భారతదేశంలో అత్యంత ప్రమాదకరమైన విషపాములలో ఒకటి. దీని విషం కూడా ప్రధానంగా నాడీ వ్యవస్థపై తీవ్ర ప్రభావం చూపుతుంది. కట్లపాము కాటుకు సంబంధించి అత్యంత కీలకమైన అంశం ఏమిటంటే, ఇది కొన్ని సందర్భాల్లో మొదట్లో పెద్దగా నొప్పి లేకుండా ఉండవచ్చు. దీని వల్ల బాధితులు తమను పాము కరిచిందని గుర్తించకపోవడం లేదా కాటు తీవ్రతను తక్కువ అంచనా వేయడం జరుగుతుంది. ఇది చికిత్సకు ఆలస్యం కావడానికి దారితీస్తుంది, తద్వారా ప్రమాదాన్ని మరింత పెంచుతుంది. విష ప్రభావం పెరిగే కొద్దీ కండరాల బలహీనత, కనురెప్పలు వాలిపోవడం, మాట్లాడటం కష్టంగా మారడం, శరీర కదలికలు తగ్గిపోవడం, చివరికి శ్వాస తీసుకోవడంలో తీవ్ర ఇబ్బంది వంటి పరిస్థితులు ఏర్పడతాయి. సరైన సమయంలో చికిత్స అందకపోతే పరిస్థితి ప్రాణాంతకంగా మారే అవకాశం ఉంది.
ఏది ఎక్కువ డేంజర్?
నాగుపాము, కట్లపాము రెండూ అత్యంత ప్రమాదకరమైన విషసర్పాలే. కట్లపాము విషం అత్యంత శక్తివంతమైన న్యూరోటాక్సిక్ విషాలలో ఒకటిగా పరిగణించబడుతుంది. అయితే, ఒక వ్యక్తికి పాముకాటు వల్ల ఎంత ప్రమాదం ఉంటుందనేది కేవలం విషం శక్తిపైనే ఆధారపడదు. పాము కరిచినప్పుడు శరీరంలోకి ఎంత విషం చేరింది, కాటు ఎక్కడ పడింది, బాధితుడి వయసు, ఆరోగ్య పరిస్థితి, ఆసుపత్రికి ఎంత త్వరగా చేరుకున్నారు వంటి అనేక అంశాలు కీలక పాత్ర పోషిస్తాయి. కట్లపాము కాటు మొదట్లో నొప్పి లేకుండా ఉండటం వల్ల చికిత్స ఆలస్యం అవుతుంది కాబట్టి, దానిని మరింత ప్రమాదకరమైనదిగా భావిస్తారు.
పాముకాటుకు గురైతే ఏం చేయాలి?
పాము కాటుకు గురైన వెంటనే భయపడకుండా బాధితుడిని వీలైనంత ప్రశాంతంగా ఉంచాలి. కదలికలను తగ్గించి, వెంటనే సమీపంలోని ఆసుపత్రికి తరలించాలి. పాము ఏ జాతిదో నిర్ధారించేందుకు దాన్ని పట్టుకోవడానికి లేదా చంపడానికి ప్రయత్నించకూడదు. కాటు పడిన చోట గట్టిగా తాడు కట్టడం, గాయం కోయడం, విషాన్ని నోటితో పీల్చడం, మూలికలు లేదా ఇంటి మందులు ఉపయోగించడం వంటి చర్యలు అస్సలు చేయకూడదు. ఇవి ఉపయోగపడకపోగా పరిస్థితిని మరింత ప్రమాదకరంగా మార్చే అవకాశం ఉంది. సరైన వైద్య చికిత్స, అవసరమైతే యాంటీవీనం (Antivenom) ఇవ్వడం ద్వారా ప్రాణాలను కాపాడవచ్చు.
నాగుపాము, కట్లపాము రెండూ అత్యంత ప్రమాదకరమైన విషపాములే కాబట్టి, ఏ విషపాము కాటు అయినా అత్యవసర పరిస్థితిగా భావించి వెంటనే ఆసుపత్రికి చేరుకోవడమే అత్యంత ముఖ్యం. మూఢనమ్మకాలు లేదా నిరాధారమైన చికిత్సల కంటే ఆధునిక వైద్యంపైనే ఆధారపడాలి.. ఈ విషయంలో అప్రమత్తత.. అవగాహన రెండూ అవసరమే..
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..