ప్రముఖ నటి సమంత రుద్రప్రభు తన ప్రెగ్నెన్సీ సమయాన్ని పూర్తిగా ఆస్వాదిస్తున్నారు. తన ఈ మాతృత్వ ప్రయాణంలో ఎదురవుతున్న తీపి అనుభవాలను కాబోయే తల్లులు, అభిమానులతో నిరంతరం పంచుకుంటున్నారు. ఇటీవల ఇన్స్టాగ్రామ్లో నిర్వహించిన ‘ఆస్క్ మీ ఎనీథింగ్’ సెషన్లో పలు ఆసక్తికర విషయాలను వెల్లడించారు. పుట్టబోయే బిడ్డ కోసం అవసరమైన వస్తువులన్నీ కొన్నానని, ప్రస్తుతం వాటిని చూస్తుంటే కాస్త భయంగా ఉందని సమంత తెలిపారు. గర్భధారణ సమయంలో తాను ఇప్పటికే 11 కిలోల బరువు పెరిగినట్లు స్పష్టం చేశారు.ఇటీవల తల్లులుగా మారిన మహిళలు చెబుతున్న రోజువారి బాధ్యతలు వింటుంటే, అది ఫుల్ టైమ్ ఉద్యోగంలా అనిపిస్తుందని అన్నారు. బిడ్డకు పెట్టే పేరు ఎంపిక ఊహించిన దానికంటే చాలా కష్టంగా మారిందని సమంత వెల్లడించారు. సరైన పేరు నిర్ణయించే విషయంలో నెటిజన్ల సహాయం అవసరం అవుతుందని సరదాగా వ్యాఖ్యానించారు. మాతృత్వం అనేది చాలా అందమైన, జీవితాన్ని కొత్తగా మార్చే అనుభవం అని ఆమె అభివర్ణించారు. ప్రతి దశను అవగాహన చేసుకునేందుకు ఒక మాన్యువల్ ఉంటే బాగుండేదని, ఈ ప్రయాణం తనను మరింత శక్తివంతంగా మార్చిందని ఆనందం వ్యక్తం చేశారు.