నటుడు రఘుబాబు, తన నటనా జీవిత ఆరంభం, కష్టకాలంలో ఎదుర్కొన్న పరిస్థితులు, అలాగే తన కుటుంబానికి అండగా నిలిచిన డైరెక్టర్ సత్యారెడ్డి (సత్యారెడ్డి ప్రొడ్యూసర్) గురించి ఓ ఇంటర్వ్యూలో వెల్లడించారు. తన తండ్రి, ప్రముఖ నటుడు గిరిబాబు, సినీ పరిశ్రమలో మంచి పేరు ప్రతిష్టలు సంపాదించినప్పటికీ, ఆర్థికంగా కొన్ని ఇబ్బందులు పడ్డారని రఘుబాబు వివరించారు. ఎన్నో విజయవంతమైన చిత్రాలు తీసిన బ్యానర్లు కూడా ఫ్లాపులను ఎదుర్కొన్నాయని, అదే విధంగా తమ కుటుంబం కూడా ఆర్థికంగా కష్టాల్లో ఉన్నప్పుడు, “తినడానికి తిండి కూడా లేని టైంలో” తమను ఆదుకున్న “దేవుడు” సత్యారెడ్డి గారే అని రఘుబాబు భావోద్వేగంగా తెలిపారు. ఆ పరిస్థితులలో, పెద్ద హీరోలైన కృష్ణ, శోభన్ బాబు, కృష్ణంరాజు వంటి వారి వద్దకు వెళ్లి అవకాశం అడగాలనే ఆలోచన తన తండ్రికి రాలేదని, ఆ స్వభావం ఆయనది కాదని రఘుబాబు పేర్కొన్నారు. పెద్ద హీరోలు అడిగితే చేస్తారనే నమ్మకం ఉన్నా, గిరిబాబు ఎవరినీ అడగలేదని తెలిపారు. ఈ కష్టకాలంలో మళ్లీ కోలుకోవడానికి చిన్న సినిమాలు నిర్మించాలనే ఆశ ఉండేదని, అదే సమయంలో దర్శకుడు వంశీ గారితో పరిచయం ఏర్పడిందని రఘుబాబు గుర్తు చేసుకున్నారు. వంశీ గారి ఆర్ట్, థాట్స్ పట్ల తనకు చాలా ఇష్టమని, బాపు-రమణ గారి దగ్గరకు కూడా వంశీ గారే తీసుకెళ్లారని, వారితో రెండు గంటల పాటు గడిపే అవకాశం లభించిందని తెలిపారు.
నటనలోకి తన ప్రవేశానికి ఆదిగురువు దివంగత డైరెక్టర్ సత్యారెడ్డి గారని రఘుబాబు స్పష్టం చేశారు. సత్యారెడ్డి గారే నన్ను నటుడిని కావడానికి ముఖ్య కారణమని ఆయన చెప్పారు. 1990లో సామ్రాజ్యం సినిమా తీసినప్పుడు, రఘుబాబుకు డబ్బింగ్ సినిమాలలో అనుభవం ఉన్నా, నటుడిగా మారడానికి ఆసక్తి లేదని తెలిపారు. ప్రొడక్షన్ వ్యవహారాలు చూసుకుంటున్న రఘుబాబును, “నీలో నటుడు ఉన్నాడు, నాకోసం చేయి” అంటూ సత్యారెడ్డి పట్టుబట్టారు. ఆంధ్రజ్యోతి పేపర్లో ఆయన ఫోటోతో సగం పేజీ యాడ్ చూసి రఘుబాబు షాక్ అయ్యారు. అయిష్టంగానే ఈ చిత్రంలో నటించినా, ఆయన నటనకు థియేటర్లలో మంచి స్పందన లభించిందని, తన తండ్రి గిరిబాబుకు కూడా తన నటన పట్ల అప్పుడే నమ్మకం ఏర్పడిందని చెప్పారు. గుమ్మడి, కైకాల సత్యనారాయణ, మురళీమోహన్, ప్రభాకర్ రెడ్డి వంటి పెద్దలు కూడా రఘుబాబు నటనను మెచ్చుకొని, ప్రోత్సహించారని ఆయన గుర్తు చేసుకున్నారు.
సామ్రాజ్యం చిత్రం పెద్దగా ఆడకపోయినా, సత్యారెడ్డి గారితో నేరం, ఆపై పూసల కిషోర్ దర్శకత్వంలో సత్యభామ సరదా కృష్ణులు వంటి మరికొన్ని చిత్రాలలో నటించినా అవి కూడా విజయం సాధించలేదు. అప్పుడు సినిమా రంగానికి దూరంగా ఉండాలని నిర్ణయించుకున్న సమయంలో, దర్శకుడు వంశీ గారు పిలిచి లేడీ డిటెక్టివ్, స్నేహ వంటి ఈటీవీ సీరియల్స్లో నటించమని ప్రోత్సహించారు. ఈ సీరియల్స్కు మంచి పేరు వచ్చినప్పటికీ, సినిమాలలో అవకాశాలు రాలేదని తెలిపారు.
ఎక్కువ మంది చదివినవి : Jabardasth : రామోజీ ఫిల్మ్ సిటీలో హోటల్ ఇండస్ట్రీలో నాతో పనిచేశాడు.. ఇప్పుడు క్రేజీ హీరో.. జబర్దస్త్ నటుడు..
ఎక్కువ మంది చదివినవి : Tollywood: అప్పుడు వైజాగ్ కలెక్టర్.. ఇప్పుడు సినిమాల్లో పెద్ద నటుడు.. గవర్నమెంట్ ఉద్యోగం వదిలి సినిమాల్లోకి ఎందుకు వచ్చారంటే..