మిలాద్-ఉన్-నబి.. ఇస్లామిక్ క్యాలెండర్లోని ఒక ముఖ్యమైన పండుగ. ఇస్లాంలో చివరి ప్రవక్త అయిన ముహమ్మద్ ప్రవక్త జన్మదినాన్ని పురస్కరించుకుని ముస్లింలు ఈ మిలాద్-ఉన్-నబి పండుగను ఘనంగా నిర్వహిస్తారు. ఇస్లామిక్ కేలండర్ ప్రకారం మూడో నెల అయిన ‘రబీ-ఉల్-అవ్వల్’ మాసంలో ఈ వేడుకలను నిర్వహిస్తారు. బుధవారం ఈ పండుగ తెలుగు రాష్ట్రాలతోపాటు.. దేశవ్యాప్తంగా నిర్వహించనున్నారు. అయితే.. ఈ పవిత్రమైన పండుగ నాడు.. అనేక సాంప్రదాయ వంటకాలు తయారుచేస్తారు. వాటిలో రైస్ ఖీర్ (లేదా పాయసం) ఒక ముఖ్యమైన తీపి వంటకం. బియ్యం, పాలు, పంచదార, సుగంధ ద్రవ్యాలతో తయారుచేసే ఈ ఖీర్, దేశవ్యాప్తంగా వివిధ ప్రాంతాలలో విభిన్న పేర్లతో, కొద్దిపాటి మార్పులతో ప్రసిద్ధి చెందింది.
కావలసిన పదార్థాలు
పాలు: 1 లీటర్, బియ్యం, 1/4 కప్పు (శుభ్రంగా కడిగి నానబెట్టాలి), చక్కెర: 1/3 కప్పు (రుచికి సరిపడా), నెయ్యి: 2 టేబుల్ స్పూన్లు, యాలుకల పొడి, డ్రై ఫ్రూట్స్: బాదం, జీడిపప్పు, పిస్తా (తరిగినవి)..
ఖీర్ తయారీ విధానం చాలా సులభం..
ముందుగా బియ్యాన్ని శుభ్రంగా కడిగి నానబెట్టాలి.. ఆ తర్వాత బరకగా రుబ్బుకోవాలి.. తరువాత, పాలను మరిగించాలి.. పాలు మరుగుతున్నప్పుడు, బరకగా రుబ్బుకున్న బియ్యాన్ని వేసి మృదువుగా ఉడికించాలి. బియ్యం పేస్టు ఉండలు కట్టకుండా గరిటెతో తిప్పుతూ ఉండాలి.
ఈ మిశ్రమం మంచిగా చిక్కబడిన తరువాత, పంచదార, యాలకుల పొడి, కావాలంటే కొన్ని కేసర్ రేకులు జోడించి మరింత రుచిని పెంచవచ్చు. నెయ్యిలో వేయించిన జీడిపప్పు, బాదం, కిస్మిస్ వంటి డ్రై ఫ్రూట్స్తో అలంకరిస్తే, ఖీర్ మరింత ఆకర్షణీయంగా, రుచిగా తయారవుతుంది.
బియ్యంతో పాటు వేయించిన డ్రై ఫ్రూట్స్తో చేసిన పాయసం అద్భుతమైన రుచిని అందిస్తుంది. ఈ పాయసం, శరీరానికి బలాన్నిచ్చే మంచి కొవ్వులతో సమృద్ధిగా ఉంటుంది.
ఇంకెందుకు ఆలస్యం మిలాద్-ఉన్-నబి పండుగ సందర్భంగా మీరు కూడా ఈ రుచికరమైన తీపి వంటకాన్ని తయారుచేసి ఆస్వాదించండి..
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..