బాలీవుడ్ సూపర్స్టార్ షారూక్ ఖాన్ ముంబై బాంద్రాలోని నివాసం ‘మన్నత్’లో సోమవారం (ఆగస్టు 17) సాయంత్రం ఊహించని ఘటన చోటుచేసుకుంది. బంగ్లా ఆవరణలో ఏకంగా రెండు పాములు కనిపించడంతో అక్కడి భద్రతా సిబ్బంది ఒక్కసారిగా అప్రమత్తమయ్యారు. భారీ పాము కనిపించడంతో కొద్దిసేపు మన్నత్లో టెన్షన్ వాతావరణం నెలకొంది.
సిబ్బంది వెంటనే పరిస్థితిని అటవీశాఖ అధికారులకు, స్నేక్ క్యాచర్లకు తెలియజేశారు. సమాచారం అందుకున్న రెస్క్యూ బృందం మన్నత్కు చేరుకుని పాములను గుర్తించే ప్రయత్నం చేసింది. ఈ క్రమంలో దాదాపు 8 అడుగుల పొడవున్న ఒక భారీ పామును గుర్తించి సురక్షితంగా పట్టుకున్నారు. పట్టుకున్న పాము విషపూరితం కాని ‘ధామన్’ జాతికి చెందినదిగా అధికారులు గుర్తించారు. ఈ పామును ఎలాంటి గాయాలు కాకుండా జాగ్రత్తగా రెస్క్యూ చేసిన సిబ్బంది, అనంతరం అటవీశాఖ అధికారులకు అప్పగించారు. అధికారులు దానిని సురక్షితంగా సహజ ఆవాసంలోకి తరలించి అడవిలో వదిలేశారు.
అయితే మన్నత్లో కనిపించిన రెండో పాము మాత్రం రెస్క్యూ టీమ్కు చిక్కలేదు. మొదటి పామును పట్టుకునే సమయంలోనే అది అక్కడి నుంచి తప్పించుకున్నట్లు సమాచారం. దీంతో రెండో పాము ఎక్కడ దాక్కుందో గుర్తించేందుకు సిబ్బంది, రెస్క్యూ బృందం కొంతసేపు మన్నత్ పరిసరాలను క్షుణ్ణంగా పరిశీలించింది. రెండో పాము కోసం రాత్రి వరకు గాలింపు కొనసాగినట్లు తెలుస్తోంది. భారీ పాము కనిపించడంతో భద్రతా సిబ్బంది అప్రమత్తంగా వ్యవహరించారు. పాములకు ఎలాంటి హాని కలగకుండా, అదే సమయంలో నివాసంలో ఉన్నవారికి ఎలాంటి ప్రమాదం జరగకుండా రెస్క్యూ బృందం జాగ్రత్తలు తీసుకుంది.
సాధారణంగా ముంబై వంటి నగర ప్రాంతాల్లోనూ వర్షాకాలంలో పాములు జనావాసాల్లోకి రావడం జరుగుతుంది. ఆహారం, నీరు, ఆశ్రయం కోసం పాములు తోటలు, ఖాళీ ప్రదేశాలు, ఇళ్ల ఆవరణల్లోకి ప్రవేశించే అవకాశం ఉంటుంది. కాగా, మన్నత్ వంటి అత్యంత భద్రత కలిగిన ప్రాంతంలో 8 అడుగుల భారీ పాము ప్రత్యక్షం కావడం ప్రస్తుతం సోషల్ మీడియాలోనూ ఆసక్తికర చర్చకు దారితీసింది. అయితే పట్టుబడిన పాము విషపూరితం కానిదని తేలడంతో అక్కడి సిబ్బంది ఊపిరి పీల్చుకున్నారు. అటవీశాఖ అధికారులు దానిని సురక్షితంగా అడవిలోకి తరలించడంతో మన్నత్లో నెలకొన్న స్నేక్ టెన్షన్కు తాత్కాలికంగా తెరపడింది.
వీడియో ఇక్కడ చూడండి..
మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి..