బాత్రూమ్లో రోజూ వాడే ప్లాస్టిక్ బకెట్లు, మగ్గులపై నీటిలోని ఉప్పు శాతంతో పాటు సబ్బు నురుగు పేరుకుపోయి తెల్లటి, పసుపు రంగు మరకలు ఏర్పడతాయి. ఖరీదైన రసాయనాలు వాడకుండా ఇంట్లోనే లభించే సహజ సిద్ధమైన వస్తువులతో బకెట్ను సరికొత్తగా మెరిపించవచ్చు.
బేకింగ్ సోడా అండ్ వెనిగర్: ప్లాస్టిక్పై పేరుకుపోయిన మొండి మరకలను వదిలించడంలో బేకింగ్ సోడా అద్భుతంగా పనిచేస్తుంది. గోరువెచ్చని నీటిలో బేకింగ్ సోడా కలిపి పేస్ట్లా చేసి మరకలపై రాయాలి. బాగా గట్టిపడిన చారలు ఉంటే కొద్దిగా తెల్ల వెనిగర్ చిలకరించి, పాత బ్రష్తో రుద్ది కడిగితే బకెట్ మెరిసిపోతుంది.
నిమ్మకాయ – ఉప్పు: నిమ్మకాయలోని సిట్రిక్ యాసిడ్ పసుపు మరకలను సులభంగా తొలగిస్తుంది. సగం కోసిన నిమ్మచెక్కపై కల్లుప్పు చల్లి బకెట్ లోపల, బయట మెల్లగా రుద్దాలి. పది నిమిషాల తర్వాత కడిగేస్తే దుర్గంధం పోయి బకెట్ శుభ్రపడుతుంది.
టూత్పేస్ట్: చిన్నపాటి మరకలకు తెల్లటి టూత్పేస్ట్ను రాసి స్క్రబ్బర్తో రుద్దడం వల్ల ప్లాస్టిక్ మెరుపు తిరిగి వస్తుంది.
చేయకూడని పొరపాట్లు..
బ్లీచింగ్ పౌడర్ వాడకం: తీవ్రమైన బూజు ఉంటేనే బ్లీచ్ వాడాలి. బ్లీచింగ్ వాడేటప్పుడు చేతులకు గ్లౌజులు వేసుకోవాలి. ముఖ్యంగా బ్లీచ్ను వెనిగర్ లేదా నిమ్మరసంతో కలపకూడదు. ఇది ప్రమాదకరమైన విష వాయువులను విడుదల చేస్తుంది. ఇనుప పీచులు వాడితే ప్లాస్టిక్పై గీతలు పడి, భవిష్యత్తులో మురికి మరింత ఎక్కువగా పేరుకుపోతుంది. ఎల్లప్పుడూ మెత్తటి స్పాంజ్ లేదా పాత టూత్బ్రష్ మాత్రమే వాడాలి.
మెయింటెనెన్స్ టిప్స్..
స్నానం పూర్తయిన వెంటనే బకెట్లో మిగిలిన సబ్బు నీటిని పారబోసి, మంచి నీటితో కడిగి తలకిందులుగా పెట్టాలి. వారానికి ఒకసారి తేలికపాటి సబ్బుతో కడిగితే బకెట్పై మురికి పొరలు పేరుకోకుండా ఎక్కువ కాలం కొత్తదానిలా ఉంటుంది.