WhatsApp AI Scam Alert: మెసేజింగ్ యాప్ వాట్సాప్ వినియోగదారుల భద్రత కోసం మరో కీలక ఫీచర్ను పరీక్షిస్తోంది. పెరుగుతున్న ఆన్లైన్ మోసాలను దృష్టిలో పెట్టుకుని AI ఆధారిత స్కామ్ అలర్ట్ ఫీచర్ను అందుబాటులోకి తీసుకురావడానికి వాట్సాప్ ప్రయోగాలు చేస్తోంది. అనుమానాస్పదంగా కనిపించే సంభాషణలను గుర్తించి.. అవసరమైతే వినియోగదారుడిని చాట్లోనే హెచ్చరించడం ఈ ఫీచర్ ప్రధాన ఉద్దేశం. ప్రస్తుతం పరిమిత సంఖ్యలో బీటా వినియోగదారులపై దీనిని పరీక్షిస్తున్నట్లు సమాచారం.
చాట్లోనే స్కామ్ అలర్ట్!
కొత్త ఫీచర్ ద్వారా వాట్సాప్ పరికరంలోనే మెసేజ్లను విశ్లేషించి.. ఆ సంభాషణలో మోసపూరిత లక్షణాలు ఉన్నాయా లేదా అనే విషయాన్ని గుర్తించేందుకు ప్రయత్నిస్తుంది. ఒక చాట్ అనుమానాస్పదంగా ఉన్నట్లు సిస్టమ్ గుర్తిస్తే.. వినియోగదారుడికి అదే చాట్లో హెచ్చరిక కనిపించవచ్చు. ముఖ్యంగా ఈ హెచ్చరిక వినియోగదారుడికి మాత్రమే కనిపిస్తుంది. అవతలి వ్యక్తికి తాను స్కామ్గా గుర్తించబడ్డాడనే సమాచారం ఆటోమేటిక్గా వెళ్లదు. హెచ్చరిక వచ్చిన తర్వాత యూజర్కు కొన్ని ఆప్షన్స్ ఉంటాయి. అనుమానాస్పద కాంటాక్ట్ను బ్లాక్ చేయడం, చాట్ను రిపోర్ట్ చేయడం లేదా సంభాషణను కొనసాగించడం వంటివి ఎంచుకోవచ్చు.
పొరపాటు అలర్ట్ వస్తే?
సాధారణ సంభాషణను పొరపాటున స్కామ్గా గుర్తించిన సందర్భంలోనూ వినియోగదారులకు నియంత్రణ ఉండేలా ఫీచర్ను రూపొందిస్తున్నారు. అలాంటి చాట్ను విశ్వసనీయమైనదిగా గుర్తించే అవకాశం ఉంటుంది. దీంతో ఆ సంభాషణకు సంబంధించిన హెచ్చరిక తొలగిపోవడంతో పాటు.. అదే చాట్ను మళ్లీ అనుమానాస్పదంగా హైలైట్ చేయకుండా సిస్టమ్కు సూచన ఇవ్వవచ్చు. అవసరమైతే వినియోగదారులు తమకు ఇటీవల వచ్చిన ఐదు మెసేజ్లను వాట్సాప్తో పంచుకునే ఆప్షన్ కూడా ఉండవచ్చు. ఇది పూర్తిగా ఐచ్ఛికమే. స్కామ్లను గుర్తించే వ్యవస్థ పనితీరును మెరుగుపరచడంలో ఈ సమాచారం ఉపయోగపడే అవకాశం ఉంది.
గోప్యతకు పెద్దపీట..
ఈ ఫీచర్లో అత్యంత కీలకమైన అంశం గోప్యత. స్కామ్ గుర్తింపు ప్రక్రియ ఆన్-డివైస్ మెషిన్ లెర్నింగ్ ఆధారంగా పనిచేసేలా రూపొందిస్తున్నారు. అంటే అనుమానాస్పద చాట్ను గుర్తించేందుకు అవసరమైన విశ్లేషణ పరికరంలోనే జరుగుతుంది. మెసేజ్ కంటెంట్ను ధృవీకరణ కోసం ఆటోమేటిక్గా వాట్సాప్ లేదా మెటాకు పంపించే విధానం ఉండదని సమాచారం. అలాగే ఒక చాట్ను అనుమానాస్పదంగా గుర్తించినంత మాత్రాన అది ఆటోమేటిక్గా వాట్సాప్, మెటా లేదా ఇతర సంస్థలకు రిపోర్ట్ కాదు. వినియోగదారుడే రిపోర్ట్ చేయాలా, బ్లాక్ చేయాలా, లేక చాట్ను కొనసాగించాలా అనేది నిర్ణయించుకోవచ్చు.
ప్రస్తుతం ఈ ఫీచర్ ప్రయోగాత్మక దశలోనే ఉంది. పరిమిత సంఖ్యలో బీటా యూజర్లకు మాత్రమే అందుబాటులోకి వచ్చిన ఈ AI స్కామ్ అలర్ట్ను భవిష్యత్తులో మరింత విస్తృతంగా అందుబాటులోకి తీసుకురావాలా అనే దానిపై వాట్సాప్ పరీక్షలు కొనసాగిస్తోంది. ఆన్లైన్ మోసాలు పెరుగుతున్న సమయంలో ఈ ఫీచర్ సాధారణ వినియోగదారులకు అదనపు భద్రత కల్పించే అవకాశం ఉంది.
మరిన్ని సైన్స్ అండ్ టెక్నాలజీ వార్తల కోసం ఇక్కడ క్లిక్ చేయండి..