టాలీవుడ్ లో అవకాశాల పేరుతో ఆశ చూపి, మహిళలను లొంగదీసుకునే క్యాస్టింగ్ కౌచ్ భూతం మరోసారి కలకలం రేపింది. సినిమాల్లో మంచి చాన్స్ ఇప్పిస్తానంటూ ఓ క్యాస్టింగ్ ఆర్టిస్ట్.. సినీ నటిని లైంగికంగా వేధించిన ఘటన హైదరాబాద్లోని బంజారాహిల్స్ పోలీస్ స్టేషన్ పరిధిలో ఆలస్యంగా వెలుగులోకి వచ్చింది.
పోలీసుల కథనం ప్రకారం.. ప్రసాద్ అనే క్యాస్టింగ్ ఆర్టిస్ట్, ఓ సినిమా లో హీరోయిన్ ఫ్రెండ్ క్యారెక్టర్ ఇప్పిస్తానని బాధితురాలిని నమ్మించాడు. అయితే, షూటింగ్ పూర్తయినప్పటికీ ఆమెకు రావాల్సిన రెమ్యునరేషన్ లేదా డబ్బులను ఇవ్వకుండా ప్రసాద్ కాలయాపన చేస్తూ వచ్చాడు. ఈ క్రమంలోనే, ఓ ప్రముఖ నిర్మాత కార్యాలయానికి రావాలంటూ సదరు నటికి ప్రసాద్ ఫోన్ చేసి పిలిపించాడు.
నిర్మాత ఆఫీస్ దగ్గరకు వెళ్లిన నటిని.. బలవంతంగా తన కార్లోకి ఎక్కించుకున్నాడు క్యాస్టింగ్ ఆర్టిస్ట్ ప్రసాద్. ఆ తర్వాత కారులోనే ఆమెతో అసభ్యంగా ప్రవర్తించడమే కాకుండా, సినిమాల్లో ఇంకా పెద్ద అవకాశాలు ఇప్పిస్తానంటూ లైంగికంగా వేధించాడు. ప్రసాద్ వేధింపులను తట్టుకోలేకపోయిన బాధితురాలు.. చివరకు బంజారాహిల్స్ పోలీసులను ఆశ్రయించింది. ఫిర్యాదు చేయడంతో పోలీసులు కేసు నమోదు చేసి, దర్యాప్తును ముమ్మరం చేశారు.