తెలుగు సంప్రదాయంలో ఆషాఢ మాసంలో గోరింటాకు పెట్టుకోవడం ఆరోగ్యం, సౌభాగ్యం, సంప్రదాయానికి ప్రతీకగా పేర్కొంటారు. ముఖ్యంగా వర్షాకాలంలో వచ్చే ఆరోగ్య సమస్యలను తగ్గించడానికి ఇది ఎంతగానో సహాయపడుతుందని చెబుతుంటారు. అంతేకాకుండా.. అధిక ఉష్ణోగ్రతను, వేడిని గోరింటాకు తగ్గిస్తుంది. ఇలా ఆరోగ్య ప్రయోజనాలు, సాంస్కృతిక ఆచారం, ధార్మిక విశ్వాసాల కలయికగా భావిస్తారు. ముఖ్యంగా గోరింటాకు చేతులకు అలంకరణను, శుభ్రతను సూచిస్తుంది. కానీ అది మంచి ఎరుపు రంగులో పండినప్పుడే ఆ అందం పూర్తవుతుంది. తక్కువ సమయంలో, గోరింటాకును 100% గాఢమైన ఎరుపు రంగులో పండించడానికి కొన్ని ప్రభావవంతమైన చిట్కాలు, పద్ధతులు ఈ కథనంలో తెలుసుకోండి..
సరైన ఆకుల ఎంపిక – శుభ్రత:
మొదటగా, లేత, పూర్తిగా తాజాగా ఉన్న గోరింటాకు ఆకులను ఎంచుకోవాలి. ఆకులు ఎంత తాజాగా ఉంటే, వాటి రంగు ఇచ్చే గుణం అంత ఎక్కువగా ఉంటుంది. ఆకులను కాడలు లేకుండా తీసుకోవడం ముఖ్యం, ఎందుకంటే కాడలు ఉంటే పేస్ట్ సరిగ్గా మెత్తగా అవ్వదు, డిజైన్ వేయడం కష్టం అవుతుంది. ఎంపిక చేసిన ఆకులను శుభ్రమైన నీటితో పూర్తిగా కడగాలి. దీనివల్ల ధూళి, మట్టి తొలగిపోతాయి.
ప్రత్యేకమైన పదార్థాలతో మిశ్రమం తయారీ:
శుభ్రం చేసిన గోరింటాకు ఆకులను మిక్సీ జార్లోకి తీసుకోవాలి. ఇప్పుడు, గోరింటాకుకు మంచి రంగును అందించే కీలకమైన పదార్థాలను కలపాలి:
చింతపండు: కొద్దిగా చింతపండును తీసుకుని నీటిలో నానబెట్టాలి. నానబెట్టిన చింతపండు గుజ్జును మిక్సీ జార్లోకి వేయాలి.
వక్కపొడి: తాంబూలంలో వాడే వక్కను తీసుకుని, దానిని పొడిగా చేసి మిక్సీ జార్లోకి కలపాలి.
నిమ్మకాయ: ఒక సగం నిమ్మకాయను తీసుకుని, దాని గింజలు లేకుండా పిండి రసాన్ని కలపాలి లేదా ముక్కను వేయాలి. నిమ్మరసం రంగును స్థిరపరచడంలో సహాయపడుతుంది.
అదనపు పదార్థాలు (ఐచ్ఛికం): కొందరు పెరుగు లేదా కాఫీ పొడిని కూడా కలుపుతారు. ఇవి కూడా రంగును మెరుగుపరచడంలో సహాయపడతాయి. అయితే, పైన చెప్పిన మూడు పదార్థాలు సరిపోతాయి.
మెత్తగా రుబ్బడం:
మిక్సీ జార్లోని పదార్థాలను కొద్దికొద్దిగా నీరు పోస్తూ, వీలైనంత మెత్తగా రుబ్బాలి. ఎక్కువ నీరు ఒకేసారి పోయకూడదు, లేదంటే పేస్ట్ పల్చబడి డిజైన్ వేయడానికి సరిపోదు. పేస్ట్ ఎంత మెత్తగా ఉంటే, అది చర్మంలోకి అంత బాగా ఇంకి, రంగు అంత గాఢంగా పండుతుంది. రుబ్బిన గోరింటాకు పేస్ట్ కొద్దిగా గట్టిగా, కానీ మెత్తగా ఉండాలి.
గోరింటాకు అప్లికేషన్ – సమయం:
గోరింటాకును రుబ్బిన వెంటనే చేతులకు పెట్టుకోవడం ఉత్తమం. ఇలా చేస్తే రంగు అత్యంత ఎర్రగా పండుతుంది. ఒకవేళ వెంటనే పెట్టుకోవడం కుదరకపోతే, ఆకులను మాత్రమే ఫ్రిజ్లో నిల్వ చేయాలి, రుబ్బిన పేస్ట్ను కాదు. రుబ్బిన పేస్ట్ను ఫ్రిజ్లో పెడితే రంగు సరిగ్గా పండదు. మీకు నచ్చిన డిజైన్ను టూత్ పిక్ లేదా కోన్ సహాయంతో వేసుకోవచ్చు. గోరింటాకు బాగా ఎర్రగా పండాలంటే, కనీసం 2 నుండి 3 గంటల పాటు చేతులకు ఉంచుకోవాలి. కనీసం 1.5 గంటలు ఉంచినా కొంత రంగు పండుతుంది. రాత్రి పూట పెట్టుకుని ఉదయాన్నే తీస్తే అత్యంత గాఢమైన రంగు వస్తుంది.
గోరింటాకు తొలగింపు – పోస్ట్-కేర్:
నిర్ణీత సమయం తర్వాత గోరింటాకును జాగ్రత్తగా తొలగించాలి. గోరింటాకు తడిగా ఉన్నప్పుడు చేతులకు ఎక్కడా అంటకుండా జాగ్రత్తపడాలి, లేదంటే ఆ ప్రదేశంలో కూడా మరకలు పడతాయి. గోరింటాకు తీసిన వెంటనే చేతులను అస్సలు కడగకూడదు. తీసిన తర్వాత గోరింటాకు తడి మొత్తం ఆరిపోయే వరకు, సుమారు 15 నిమిషాల పాటు వేచి ఉండాలి. తడి పూర్తిగా ఆరిపోయిన తర్వాత, గోరింటాకు పండిన భాగంపై కొబ్బరి నూనెను అప్లై చేయాలి. కొబ్బరి నూనె గోరింటాకు రంగును మరింత ప్రకాశవంతంగా, గాఢంగా మారుస్తుంది. నూనె చర్మంలోకి పూర్తిగా ఇంకిపోయిన తర్వాత మాత్రమే చేతులను కడగాలి. ఈ చిట్కాలను పాటించడం ద్వారా, మీ గోరింటాకు అద్భుతమైన ఎరుపు రంగులో పండుతుంది. మరుసటి రోజు నాటికి రంగు మరింత మెరుగుపడుతుంది.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..