ఒకప్పుడు చందమామ అంటే చిన్నపిల్లల కథలకు, కవుల ఊహలకు మాత్రమే పరిమితం. కానీ, ప్రపంచ కుబేరుడు ఎలోన్ మస్క్ దృష్టిలో అది మానవాళి తర్వాతి ‘రియల్ ఎస్టేట్’ వెంచర్! అవును ఇది నిజమే అంటున్నాడు మాస్క్. భూమిని విడిచి ఇతర గ్రహాలపై నివాసం ఏర్పరచుకోవాలనే మస్క్ కల ఇప్పుడు చంద్రుడిపై కాలనీల ఏర్పాటు దిశగా అడుగులు వేస్తోంది. మరి ఈ “స్పేస్ ఎక్స్” (SpaceX) కల సామాన్యులకు అందుబాటులోకి వస్తుందా? లేక ఇది కేవలం సైన్స్ ఫిక్షన్ సినిమాగానే మిగిలిపోతుందా? ఈ ఉత్కంఠభరితమైన అంశం గురించి మనము తెలుసుకుందాం..
మస్క్ ప్లాన్ ఎంత వరకు సాధ్యం?: ఎలోన్ మస్క్ పేరు వింటేనే అసాధ్యాలను సుసాధ్యం చేసే వ్యక్తిగా గుర్తింపు. ఇప్పుడు ఆయన కన్ను చంద్రుడిపై పడింది. భూమికి ఒక ‘బ్యాకప్’ ఉండాలని నమ్మే మస్క్, చంద్రుడిని ఒక లాంచ్ ప్యాడ్లా మార్చి, అక్కడి నుంచి అంగారకుడికి (Mars) చేరుకోవాలని ప్లాన్ చేస్తున్నారు.
స్టార్షిప్ – మస్క్ బ్రహ్మాస్త్రం: మస్క్ కలలకు ప్రధాన ఆధారం ‘స్టార్షిప్’ రాకెట్. ప్రపంచంలోనే అత్యంత శక్తివంతమైన ఈ రాకెట్, వందల టన్నుల సరుకును, పదుల సంఖ్యలో మనుషులను చంద్రుడిపైకి చేరవేయగలదు. ఇది కేవలం వెళ్లి రావడమే కాదు, భూమి మీద విమానంలాగే మళ్లీ మళ్లీ వాడుకోవచ్చు (Reusable). ఇదే మస్క్ ప్లాన్లో అతిపెద్ద ప్లస్ పాయింట్. ఖర్చును తగ్గించి, అంతరిక్ష యానాన్ని సామాన్యుడికి చేరువ చేయడమే ఆయన వ్యూహం.
ఏదురయ్యే సవాళ్లు ఏంటి?: విషపూరిత వాతావరణం: చంద్రుడిపై ఊపిరి పీల్చుకోవడానికి గాలి లేదు, తాగడానికి నీరు లేదు. విపరీతమైన రేడియేషన్ శరీరాన్ని దెబ్బతీస్తుంది.
మౌలిక సదుపాయాలు: అక్కడ ఇళ్లు కట్టాలంటే భూమి నుంచి ఇటుకలు తీసుకెళ్లలేం. చంద్రుడిపై ఉండే మట్టితోనే 3D ప్రింటింగ్ ద్వారా నివాసాలు నిర్మించాల్సి ఉంటుంది. మస్క్ ఎంతగా తగ్గించినా, ఒక్కో ట్రిప్కు అయ్యే ఖర్చు సామాన్యుడి ఊహకు అందదు.
ఎప్పుడు సాధ్యం?: మస్క్ అంచనా ప్రకారం వచ్చే దశాబ్ద కాలంలోనే ఒక మినీ బేస్ క్యాంప్ సిద్ధమవుతుంది. నాసాతో (NASA) ఉన్న ఒప్పందాలు, స్టార్షిప్ ప్రయోగాలు సక్సెస్ అవుతుండటంతో మస్క్ కల వైపు అడుగులు పడుతున్నాయి. భవిష్యత్తులో మనం వీకెండ్ ట్రిప్కు ఊటీకో, సిమ్లాకో వెళ్లినట్లు.. చందమామ పైకి వెళ్లే రోజులు రావొచ్చు!
The post చంద్రుడిపై మనుషుల నివాసం… మస్క్ ప్లాన్ ఎంత వరకు సాధ్యం? appeared first on Manalokam – Latest Telugu News & Updates.