విజయనగరం జిల్లా మెరకముడిదాం మండలం బుధరాయవలస గ్రామంలో తీవ్ర విషాదం చోటుచేసుకుంది. కోనేటిలో స్నానం చేసేందుకు వెళ్లి ముగ్గురు విద్యార్థులు ప్రాణాలు కోల్పోయారు. వివరాల్లోకి వెళ్తే.. బుధరాయవలస గ్రామానికి చెందిన ఏడుగురు విద్యార్థులు స్నానం చేసేందుకని కోనేటి వద్దకు వెళ్లారు. వారిలో ఒకరు స్నానం చేసేందుకు నీటిలోకి దిగాడు. అయితే లోతు ఎక్కువగా ఉండటంతో అదుపుతప్పి నీటిలో మునిగిపోయాడు. అతడిని గమనించిన మరో ఇద్దరు విద్యార్థులు వెంటనే కాపాడేందుకు కోనేటిలోకి దిగారు. అయితే ఊహించని విధంగా ముగ్గురూ నీటిలో చిక్కుకుపోయారు. కొద్దిసేపటికి ఊపిరాడక పోవడంతో భయంతో కేకలు వేశారు.
ఇదంతా చూస్తున్న అక్కడే ఉన్న మిగతా విద్యార్థులు వెంటనే ఈ విషయాన్ని గ్రామస్తుల దృష్టికి తీసుకెళ్లారు. సమాచారం అందుకున్న గ్రామస్తులు హుటాహుటిన కోనేటి వద్దకు చేరుకుని నీట మునిగికి విద్యార్థుల కోసం గాలింపు చర్యలు చేపట్టారు. అయితే అప్పటికే వారు మృతి చెందారు. మృతులను చందు, వెంకటేష్, హేమచందర్రావుగా గుర్తించారు. ఇక సమాచారంతో అక్కడికి చేరుకున్న పోలీసులు మృతదేహాలను స్వాధీనం చేసుకొని పోస్ట్మార్టం నిమిత్తం హాస్పిటల్కు తరలించారు.
రోజురోజు స్కూల్ నుంచి వచ్చి సరదా సరదాగా ఆడుతూ సందడి చేసే చిన్నారులు ఇలా కోనేటిలో ప్రమాదవశాత్తు చనిపోవడం గ్రామంలో విషాదచాయలు అలుముకున్నాయి. చిన్నారులు చెరువు, కోనేరు వంటి నీటి వనరుల వద్దకు వెళ్లే సమయంలో తల్లిదండ్రులు, పెద్దలు ప్రత్యేక జాగ్రత్తలు తీసుకోవాల్సిన అవసరం ఉందని పోలీసులు చెబుతున్నారు. జరిగిన ఘటన పై పోలీసులు కేసు నమోదు చేసి దర్యాప్తు చేస్తున్నారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.