ఫెస్టివల్ సీజన్ను దృష్టిలో ఉంచుకుని ఎయిర్ ఇండియా ఎక్స్ప్రెస్ విద్యార్థుల కోసం ఒక ప్రత్యేకమైన ఆఫర్ను ప్రకటించింది. ఈ ఆఫర్ కింద విద్యార్థులు దేశీయ విమాన టికెట్ ధరలపై 10 శాతం డిస్కౌంట్తో పాటు, అదనపు లగేజ్ సదుపాయం మరియు తక్కువ ధరకు డేట్ మార్చుకునే వెసులుబాటును పొందవచ్చు. ఈ ఆఫర్ అక్టోబర్ 20, 2026 వరకు ఎయిర్ ఇండియా ఎక్స్ప్రెస్ అధికారిక బుకింగ్ ఛానెళ్ల ద్వారా అందుబాటులో ఉంటుంది.
ఈ ప్రత్యేక ఆఫర్ కింద విద్యార్థులకు దేశీయ వాల్యూ ఫేర్లపై 10 శాతం తగ్గింపు లభిస్తుంది. సాధారణంగా ఉండే 15 కిలోల లగేజ్ కు బదులుగా విద్యార్థులు ఏకంగా 25 కిలోల వరకు లగేజ్ను ఉచితంగా తీసుకెళ్లవచ్చు. అంటే ఇందులో అదనంగా 10 కిలోల లగేజ్ వెసులుబాటు లభిస్తుంది. అంతేకాకుండా.. ఎయిర్ ఇండియా ఎక్స్ప్రెస్ వెబ్సైట్ లేదా మొబైల్ యాప్ ద్వారా నేరుగా టికెట్లు బుక్ చేసుకునే విద్యార్థులు కేవలం రూ. 99 చెల్లించి తమ ప్రయాణ తేదీని మార్చుకోవచ్చు. ఎయిర్ ఇండియా ఎక్స్ప్రెస్ వెబ్సైట్ లేదా యాప్ ద్వారా డొమెస్టిక్ లేదా ఇంటర్నేషనల్ ఫ్లైట్స్ బుక్ చేసుకునే కస్టమర్లు ‘VIBES’ కోడ్ను ఉపయోగించి అదనంగా మరో 5 శాతం డిస్కౌంట్ పొందవచ్చని ఎయిర్ లైన్స్ తెలిపింది. అయితే ఇందుకు కొన్ని నియమ నిబంధనలు వర్తిస్తాయి.
ఈ విద్యార్థి ఆఫర్ను పొందడానికి విద్యార్థులు కనీసం 12 సంవత్సరాల వయస్సు కలిగి ఉండాలి. ప్రయాణ సమయంలో గుర్తింపు పొందిన విద్యా సంస్థ జారీ చేసిన సరైన స్టూడెంట్ ఫోటో ఐడీ కార్డ్ను విధిగా కలిగి ఉండాలి. ఈ ఐడీ కార్డ్పై విద్యార్థి పేరు , పుట్టిన తేదీ స్పష్టంగా ఉండాలి. ఎయిర్పోర్టులో చెక్-ఇన్ చేసే సమయంలో ఈ ఐడీ కార్డ్ను చూపించాల్సి ఉంటుంది.
విద్యార్థుల ఆఫర్తో పాటు.. అర్హత కలిగిన వీసా డెబిట్ లేదా క్రెడిట్ కార్డులను ఉపయోగించి చేసే దేశీయ, అంతర్జాతీయ విమాన బుకింగ్లపై రూ. 600 వరకు తగ్గింపును కూడా ఎయిర్లైన్స్ అందిస్తోంది. కస్టమర్లు ఈ ఆఫర్ కోసం ‘VISAFLY’ కోడ్ను ఉపయోగించవచ్చు. ఈ ఆఫర్ అక్టోబర్ 9, 2026 వరకు చెల్లుబాటులో ఉంటుంది. ప్రస్తుతం ఎయిర్ ఇండియా ఎక్స్ప్రెస్ ప్రతిరోజూ 500కి పైగా విమానాలను నడుపుతూ, 48 దేశీయ , 16 అంతర్జాతీయ గమ్యస్థానాలను కలుపుతోంది. ఈ ఎయిర్లైన్స్ విమాన కాఫ్ట్లో 100కి పైగా బోయింగ్ 737, ఎయిర్బస్ A320 విమానాలు ఉన్నాయి. విద్యార్థులకు ప్రయాణ ఖర్చులు తగ్గించేందుకు ఈ ప్రత్యేక ఆఫర్ ఎంతగానో ఉపయోగపడుతుంది.