Akhilesh Yadav: ఉత్తర్ ప్రదేశ్ ఎన్నికలు సమీపిస్తున్న తరుణంలో సమాజ్వాదీ పార్టీ(ఎస్పీ) చీఫ్ అఖిలేష్ యాదవ్ తన పార్టీ నేతలకు కీలక సూచన చేశారు. శనివారం అఖిలేష్తో పాటు పార్టీ జాతీయ ప్రతినిధులు రాజీవ్ రాయ్, రాజ్ కుమార్ భాటీ పార్టీ నేతల సమావేశానికి హాజరయ్యారు. ముందస్తు సన్నాహాలు లేకుండా ఎలాంటి చర్చల్లోకి వెళ్లొద్దని పార్టీ నేతలకు అఖిలేష్ సూచించారు. అవగాహాన లేకుండా మాట్లాడటం మంచిది కాదని అన్నారు.అన్ని విషయాల్లో మాట్లాడటం కన్నా మౌనంగా ఉండటమే ముఖ్యమని, ఎందుకంటే కొన్నిసార్లు మౌనంగా ఉండటం ద్వారా గొప్ప సందేశాన్ని ఇవ్వొచ్చని అన్నారు.
ప్రస్తుతం సోషల్ మీడియా యుగం నడుస్తోందని అఖిలేష్ అన్నారు. మీరు చెప్పే ఏ విషయమైనా క్షణాల్లో వైరల్ అవుతుందని, 10 సెకన్ల రీల్ పార్టీ ప్రతిష్టను నిలబెట్టగలదు, దెబ్బతీయగలదు అని చెప్పారు. ప్రతీ అంశంపై పూర్తి సమాచారం తెలిసిన తర్వాతే ప్రకటనలు చేయాలని, చర్చల్లో పాల్గొనాలని అన్నారు. తమ పార్టీ పీడీఏ గాలి రాష్ట్రమంతా వీస్తోందని, ఈ ఎన్నికలు బీజేపీ వర్సెస్ పీడీఏ(వెనకబడిన, దళిత, అల్ప సంఖ్యాక వర్గాలను సూచిస్తుంది)గా ఉందని అన్నారు. ఈసారి ‘‘ఓట్ బుల్డోజర్’’ను ఉపయోగించి బీజేపీ ప్రభుత్వాన్ని కూలుస్తామని అన్నారు.