కేసీఆర్ కు వేలకోట్ల ఆస్తులు ఎక్కడి నుంచి వచ్చాయి..?: మంత్రి వివేక్ వెంకటస్వామి

• 2004 ఎన్నికల ముందు సొంత భూమి కూడా లేదు
•  ఇప్పుడు 450 ఎకరాల భూములెలా వచ్చాయి? 
• బీఆర్ఎస్ ఎలక్టోరల్ బాండ్లపై సీబీఐ ఎంక్వైరీ చేయాలి
• జైపూర్​లో ఎస్సీ హాస్టల్ నిర్మాణానికి భూమిపూజ

కోల్​బెల్ట్/జైపూర్, వెలుగు: తెలంగాణ ఉద్యమ సమయంలో ఆస్తులేమీలేవన్న కేసీఆర్ కు.. అధికారంలో ఉన్న పదేండ్లలో వేల కోట్లు ఎలా వచ్చాయని రాష్ట్ర కార్మిక, గనుల శాఖ మంత్రి వివేక్​ వెంకటస్వామి ప్రశ్నించారు. 2004 ఎన్నికల అఫిడవిట్​లో తనకు ఒక్క ఎకరం భూమి కూడా లేదని కేసీఆర్​ పేర్కొన్నారని.. మరి ఇప్పుడు రూ. వేల కోట్ల విలువైన 450 ఎకరాల భూములు ఎక్కడి నుంచి వచ్చాయో సమాధానం చెప్పాలన్నారు. 

గురువారం మంచిర్యాల జిల్లా మందమర్రి, జైపూర్​లో మంత్రి పర్యటించారు. ఊరుమందమర్రి, 23వ వార్డులో స్థానికుల సమస్యలు అడిగి తెలుసుకున్నారు. జైపూర్​లో రూ.1.81 కోట్ల సీఎస్ఆర్​ నిధులతో నిర్మించనున్న ఎస్సీ బాలుర హాస్టల్​ భవనం పనులకు మంచిర్యాల కలెక్టర్​ కుమార్ దీపక్, డీసీపీ భాస్కర్​​తో కలిసి భూమిపూజ చేశారు. అనంతరం మంత్రి మాట్లాడుతూ, కొట్లాడి తెచ్చుకున్న తెలంగాణను కేసీఆర్​ కుటుంబం దోచుకుందని, బలిదానాలతో వచ్చిన తెలంగాణలో ఫామ్​ హౌస్​ సంస్కృతి తీసుకొచ్చారని ధ్వజమెత్తారు. 

తెలంగాణ ఉద్యమానికి ముందు కేసీఆర్​ కుటుంబానికి ఎలాంటి ఆస్తులు, బిజినెస్​లు, ఆమ్దానీ వచ్చే పనులు లేవన్నారు. సీఎంగా, మంత్రిగా తీసుకున్న జీతాలతో 450 ఎకరాల భూములు వచ్చాయా? అని నిలదీశారు. కాళేశ్వరం ప్రాజెక్టు రీడిజైనింగ్​లో కమీషన్లు, ఓఆర్​ఆర్​ ప్రాజెక్టు, ఎలక్టోరల్​ బాండ్ల పేరుతో వేల కోట్ల ప్రజల సొమ్మును దొచుకున్నారని.. బ్లాక్​ మొయిల్, కుంభకోణాలు చేసి సంపాదించారని విమర్శించారు. బీఆర్​ఎస్​ ఎలక్టోరల్​ బాండ్లపై సీబీఐ ఎంక్వైయిరీ చేయాలని డిమాండ్​ చేశారు. 

కేసీఆర్​ భూములపై జరుగుతున్న విచారణ నుంచి ప్రజల దృష్టి మళ్లించేందుకే బీఆర్ఎస్​ లీడర్ల జైపూర్​పవర్ ప్లాంట్ విజిట్​పేర డ్రామా స్టార్ట్​ చేశారన్నారు. గత ప్రభుత్వంలో సింగరేణి నిధులను సిద్దిపేట, సిరిసిల్లకు తరలించారని, స్థానిక నిధులను దోచుకెళ్లి ఇప్పుడు ఏ మొహం పెట్టుకుని ధర్నాలు చేస్తున్నారని బాల్క సుమన్​పై మంత్రి ఫైర్​ అయ్యారు. 

దేశవ్యాప్తంగా ఎల్​నినో ప్రభావం ఉందని, ఆ విషయం గమనించకుండా విద్యుత్​ కొరతపై చిల్లర రాజకీయాలు చేయడం విడ్డూరంగా ఉందన్నారు. ఆదిలాబాద్​ రిమ్స్​లో ప్రమాదం జరిగి చిన్నారులు మృతిచెందిన ఘటన చాలా బాధకరమన్నారు. భవిష్యత్తులో ఇలాంటి ఘటనలు జరగకుండా అన్ని ప్రభుత్వ ఆస్పత్రుల్లో పకడ్బందీ చర్యలు తీసుకుంటున్నట్టు మంత్రి చెప్పారు.