నిజ సంఘటనల ఆధారంగా అనేక సినిమాలు , వెబ్ సిరీస్లు ఉన్నాయి. వాటిలో ఒకటి ఈ 8 ఎపిసోడ్ల వెబ్ సిరీస్. ఈ సిరీస్ ప్రపంచవ్యాప్తంగా ప్రసిద్ధి చెందింది. అంతేకాదు 60 దేశాలలో నంబర్ వన్ స్థానానికి చేరుకుంది. ఆ అమ్మాయి తన తల్లిదండ్రులను చంపిందా? అనే అంశంపైనే ఈ వెబ్ సిరీస్ ఆధారపడి ఉంది. ఈ వెబ్ సిరీస్ సెప్టెంబర్ 17న విడుదలైంది. ఈ క్రైమ్ డ్రామా విడుదలైన కొద్ది రోజుల్లోనే ప్రపంచవ్యాప్తంగా సంచలనం సృష్టించింది.
ఇది విడుదలైన 92 దేశాలలో 60 దేశాలలో నంబర్ వన్ స్థానానికి చేరుకుని, చార్టులలో అగ్రస్థానంలో నిలిచింది. సెప్టెంబర్ 21 నాటి డేటా ప్రకారం, ఈ వెబ్ సిరీస్ 92 దేశాల్లోని నెట్ఫ్లిక్స్ చార్టులలో ట్రెండింగ్లో ఉంది. వీటిలో 60 దేశాలలో ఈ షో మొదటి స్థానంలో ఉంది. వీటిలో యూఎస్, యూకే, ఆస్ట్రేలియా, బ్రెజిల్, కెనడా, ఫ్రాన్స్, జర్మనీ, ఇటలీ ,న్యూజిలాండ్ ఉన్నాయి.
ప్రస్తుతం ఇది ప్రపంచవ్యాప్తంగా నెట్ఫ్లిక్స్లో అత్యధికంగా చూస్తున్న సిరీస్..ఇది లిజ్జీ బోర్డెన్ కేసు ఆధారంగా రూపొందించిన ఒక పరిమిత సిరీస్. 1992 ఆగస్టు 4న, మసాచుసెట్స్లోని ఫాల్ రివర్లో ఆండ్రూ , అబ్బీ బోర్డెన్లు గొడ్డలితో హత్య చేయబడ్డారు. 32 ఏళ్ల లిజ్జీ ప్రధాన అనుమానితురాలిగా మారింది. 1893లో జరిగిన విచారణలో ఆమె నిర్దోషిగా విడుదలైనప్పటికీ, ఈ కేసు మిస్టరీగానే మిగిలిపోయింది.
విక్టోరియన్ కాలం నాటి ఇళ్లలో మహిళలు ఎదుర్కొన్న వేధింపులు, అవమానాలు , బెదిరింపులను ఈ ధారావాహిక చిత్రీకరిస్తుంది. ఈ ధారావాహికలో కల్పిత అంశాలు కూడా ఉన్నాయి. ఈ షోకి ఇయాన్ బ్రెన్నాన్ షోరన్నర్గా వ్యవహరిస్తుండగా, ఎల్లా బెట్టి లిజ్జీ బోర్డెన్ పాత్రను పోషిస్తున్నారు. వారెన్ బెట్టి ,అన్నెట్ బెనింగ్ల కుమార్తె అయిన ఎల్లా, గతంలో ‘ఫ్యూడ్: కాపోట్ వర్సెస్ ది స్వాన్స్’లో నటించారు.
ఇది నెట్ఫ్లిక్స్ ఆంథాలజీ సిరీస్ ‘మాన్స్టర్’ కు చెందిన ఒక వెబ్ సిరీస్. ‘మాన్స్టర్: ది లిజ్జీ బోర్డెన్ స్టోరీ’ అనేది నెట్ఫ్లిక్స్ ‘మాన్స్టర్’ సిరీస్లో నాలుగవ సీజన్. దీనికి ముందు వచ్చిన 3 సీజన్లు ‘మాన్స్టర్ ది జెఫ్రీ డామర్ స్టోరీ’, ‘మాన్స్టర్స్: ది లైల్ అండ్ ఎరిక్ మెనెండెజ్ స్టోరీ’, ‘మాన్స్టర్: ది ఎడ్ గీన్ స్టోరీ’ వరుసగా 2022, 2024, 2025 సంవత్సరాలలో విడుదలయ్యాయి.