మారుతున్న కాలానికి అనుగుణంగా కార్లలో ఇంటర్నెట్ కనెక్టివిటీ పెరుగుతున్నప్పటికీ అదే స్థాయిలో సైబర్ నేరగాళ్ల దాడులు కూడా హెచ్చాయి. ఆటోమేటిక్ సాఫ్ట్వేర్ అప్డేట్ వ్యవస్థలను దుర్వినియోగం చేస్తూ వాహనాల ఇన్ఫోటైన్మెంట్ యూనిట్లపై దాడికి పాల్పడుతున్న సరికొత్త ముప్పు వెలుగుచూసింది. టెక్ ప్రపంచంలో తీవ్ర సంచలనం సృష్టిస్తున్న ఈ మాల్వేర్ ఘటనకు సంబంధించిన సమగ్ర వివరాలను తెలుసుకుందాం.
టెక్నాలజీ పెరుగుతోంది. ఇంట్లో, జేబులో, చివరకు ప్రయాణించే వాహనాల్లో అత్యాధునిక టెక్నాలజీతో కూడిన వస్తువులు ఉండాల్సిందే. కార్లు ఇప్పుడు కేవలం ప్రయాణ సాధనాలుగా మాత్రమే కాకుండా ఎంటర్టైన్మెంట్, నావిగేషన్, కమ్యూనికేషన్ వంటి ఎన్నో స్మార్ట్ ఫీచర్లతో వస్తున్నాయి. అయితే ఈ టెక్నాలజీ పెరుగుతున్న కొద్దీ సైబర్ దాడుల ముప్పు కూడా పెరుగుతోంది.
తాజాగా కార్ల ఇన్ఫోటైన్మెంట్ సిస్టమ్ను లక్ష్యంగా చేసుకున్నట్లు గుర్తించిన ఒక మాల్వేర్పై సైబర్ సెక్యూరిటీ సంస్థ కాస్పర్స్కీ హెచ్చరించింది. కాస్పర్స్కీ థ్రెట్ రీసెర్చ్ టీమ్ ప్రకారం ఆటోమేటిక్ సాఫ్ట్వేర్ అప్డేట్ సామర్థ్యాలను ఉపయోగించుకుని కార్ల ఇన్ఫోటైన్మెంట్ యూనిట్లను లక్ష్యంగా చేసుకున్నట్లు గుర్తించిన తొలి మాల్వేర్ ఇదే. అయితే ఈ దాడి ఒక్క దశలో జరగదు. మాల్వేర్ కారులోకి చేరేందుకు, సిస్టమ్పై ప్రభావం చూపేందుకు పలు దశలు అవసరమవుతాయి. ఒకసారి ఇన్ఫోటైన్మెంట్ సిస్టమ్ ప్రభావితమైతే దాడి చేసేవారు దాన్ని వివిధ రకాలుగా దుర్వినియోగం చేసే అవకాశం ఉంటుంది.
ఈ మాల్వేర్ వల్ల జరిగే ప్రధాన దుర్వినియోగాల్లో ఒకటి యాడ్ ఫ్రాడ్ కాగా కారు యజమానికి తెలియకుండానే ఇన్ఫోటైన్మెంట్ స్క్రీన్పై లేదా నేపథ్యంలో ప్రకటనలు నడపవచ్చు. దీనివల్ల డేటా వినియోగం పెరగడంతో పాటు వినియోగదారుడికి తెలియకుండానే ఇంటర్నెట్ డేటా ఖర్చయ్యే అవకాశం ఉంటుంది. అంతేకాకుండా ఈ మాల్వేర్ కేవలం ప్రకటనలకే పరిమితం కాదు.
ప్రత్యేకమైన గుర్తింపు సమాచారాన్ని సేకరించి పంపడం, ఇతర సాఫ్ట్వేర్ లేదా యాప్లను డౌన్లోడ్ చేసి ఇన్స్టాల్ చేయడం వంటి సామర్థ్యాలు కూడా దీనికి ఉన్నట్లు సమాచారం. డిజిటల్ రంగంలో తమ భద్రతను పటిష్టం చేసుకోవడానికి ఆటోమొబైల్ సంస్థలు నిరంతరం తగిన జాగ్రత్తలు తీసుకోవడం ఎంతో అవసరం.
డోఫాన్ యూనిట్లలో గుర్తింపు
ఈ మాల్వేర్ చైనా తయారీదారు డోఫాన్కు చెందిన ఇన్ఫోటైన్మెంట్ యూనిట్లలో గుర్తించినట్లు కాస్పర్స్కీ తెలిపింది. డోఫాన్ తన సొంత ఆండ్రాయిడ్ ఆధారిత ఆపరేటింగ్ సిస్టమ్, క్లౌడ్ యాప్లను అభివృద్ధి చేస్తోంది. ఇవి ప్రపంచవ్యాప్తంగా సుమారు 3 కోట్ల కార్లలో ఉపయోగిస్తున్నట్లు నివేదిక పేర్కొంది. మాల్వేర్ డోఫాన్కు చెందిన ఓవర్-ది-ఎయిర్ అప్డేట్ మెకానిజం ద్వారా ప్రభావిత సిస్టమ్లకు చేరినట్లు కాస్పర్స్కీ వివరించింది. ఈ ఘటనలో దాడి చేసేవారు డోఫాన్కు సంబంధించిన టీడబ్ల్యూ కోర్ వ్యవస్థను లక్ష్యంగా చేసుకున్నట్లు సమాచారం.
తయారీదారులు సాఫ్ట్వేర్ విశ్లేషణ, అప్డేట్ల కోసం ఉపయోగించే ఈ వ్యవస్థలోకి మాల్వేర్ను చొప్పించగలిగారు. దీంతో అప్డేట్ ప్రక్రియ ద్వారా ప్రభావిత ఇన్ఫోటైన్మెంట్ యూనిట్లకు మాల్వేర్ చేరే అవకాశం ఏర్పడింది. ముఖ్యంగా వినియోగదారులకు తెలియకుండా బ్యాక్గ్రౌండ్లో పనిచేసేలా మాల్వేర్ రూపొందించబడటం ఈ ముప్పును మరింత ఆందోళనకరంగా మారుస్తోంది. ఆధునిక కార్లలోని అనేక ఇన్ఫోటైన్మెంట్ సిస్టమ్లు నిరంతరం ఇంటర్నెట్కు కనెక్ట్ అయి ఉంటాయి. ఆన్లైన్ మ్యాప్స్, మ్యూజిక్, యాప్లు, క్లౌడ్ సర్వీసులు, సాఫ్ట్వేర్ అప్డేట్లు వంటి ఫీచర్ల కోసం ఈ కనెక్టివిటీ అవసరం.
అయితే ఇదే కనెక్టివిటీ సైబర్ నేరగాళ్లకు కొత్త దాడి మార్గాలను కూడా అందిస్తుంది. కారులోని ఇన్ఫోటైన్మెంట్ యూనిట్ హ్యాక్ అయితే కేవలం వినోద వ్యవస్థకే పరిమితం కాకుండా డేటా గోప్యత, సిస్టమ్ భద్రత వంటి అంశాలపై కూడా ప్రభావం పడే అవకాశం ఉంటుంది. రోజువారీ ప్రయాణాలతో పాటు సైబర్ ముప్పులను ఎదుర్కొనేలా వాహనదారులు అప్రమత్తంగా ఉండటం ఎంతో ముఖ్యం.
నివారణ మార్గాలు
కాస్పర్స్కీ ప్రకారం ఈ మాల్వేర్ దాడికి కారణమైన లోపానికి ఇప్పటికే ప్యాచ్ విడుదలైంది. అందువల్ల కార్ల యజమానులు తమ ఇన్ఫోటైన్మెంట్ సిస్టమ్లకు తయారీదారులు అందించే అధికారిక సాఫ్ట్వేర్ అప్డేట్లను నిర్లక్ష్యం చేయకుండా ఇన్స్టాల్ చేసుకోవడం ముఖ్యమని చెప్పవచ్చు. మొత్తంగా కార్లు మరింత స్మార్ట్గా మారుతున్న కొద్దీ వాటి సైబర్ భద్రత కూడా అంతే కీలకంగా మారుతోంది. ఇన్ఫోటైన్మెంట్ సిస్టమ్ను లక్ష్యంగా చేసుకున్న ఈ మాల్వేర్ ఘటన భవిష్యత్తులో కనెక్టెడ్ కార్లకు ఎదురయ్యే సైబర్ ముప్పులపై మరోసారి దృష్టి సారించేలా చేసింది.
మార్కెట్లో విడుదలవుతున్న నూతన వాహనాలకు ఇటువంటి ముప్పుల నుంచి రక్షణ కల్పించే దిశగా ఆటోమొబైల్ దిగ్గజాలు పటిష్టమైన భద్రతా ప్రమాణాలను అమలు చేయాల్సి ఉంది. అధికారిక అప్డేట్లను సకాలంలో స్వీకరించడం ద్వారా సైబర్ దాడుల నుంచి వాహనాన్ని సురక్షితంగా ఉంచుకోవచ్చు. టెక్ ప్రియులు ఎంతగానో ఇష్టపడే కనెక్టెడ్ కార్ల సాంకేతికత మరింత సురక్షితంగా మారడానికి ఈ చర్యలు ఎంతగానో దోహదపడతాయి.