Pakistani Cricketers Indian Wives: భారత్ – పాకిస్థాన్ క్రికెట్ మ్యాచ్ అంటేనే తీవ్ర ఉత్కంఠ. ఇరు దేశాల మధ్య రాజకీయ పరిస్థితులు ఎలా ఉన్నా.. క్రికెట్ మైదానం వెలుపల కొన్ని బంధాలు మాత్రం సరిహద్దులను దాటాయి. ముఖ్యంగా పాకిస్థాన్ క్రికెటర్లకు భారతీయ మహిళలతో ఏర్పడిన వివాహ బంధాలు గత కొన్ని దశాబ్దాల్లో ఆసక్తికరంగా నిలిచాయి. మాజీ పాక్ కెప్టెన్ షోయబ్ మాలిక్, భారత టెన్నిస్ స్టార్ సానియా మీర్జా వివాహం ప్రపంచవ్యాప్తంగా చర్చనీయాంశమైన విషయం తెలిసిందే. అయితే వీరిద్దరే కాదు.. వివిధ తరాలకు చెందిన మరికొందరు పాకిస్థాన్ క్రికెటర్లు కూడా భారతీయ మహిళలను వివాహం చేసుకున్నారు. వారి కథలు ఒక్కొక్కరిదీ ప్రత్యేకమే.
జహీర్ అబ్బాస్ – రీటా లూత్రా..
పాకిస్థాన్ దిగ్గజ బ్యాటర్ జహీర్ అబ్బాస్ను అభిమానులు ‘ఏషియన్ బ్రాడ్మన్’గా పిలిచేవారు. అద్భుతమైన బ్యాటింగ్తో పాటు భారీగా పరుగులు సాధించిన ఆయన 1988లో భారతీయురాలు రీటా లూత్రాను వివాహం చేసుకున్నారు.
బ్రిటన్లో పరిచయం..
1980లలో ఇద్దరికీ బ్రిటన్లో పరిచయం ఏర్పడింది. అప్పట్లో జహీర్ అబ్బాస్ గ్లాస్టర్షైర్ తరఫున కౌంటీ క్రికెట్ ఆడుతున్నారు. రీటా లూత్రా అక్కడ ఇంటీరియర్ డిజైన్ చదువుతున్నారు.
ఎక్కువమంది చదివినది: రాసిపెట్టుకోండి.. అలాంటోడు దొరకడం టీమిండియా అదృష్టం.. వదిలేశారో..!
వివాహం అనంతరం రీటా ఇస్లాం మతాన్ని స్వీకరించి ‘సమీనా అబ్బాస్’గా పేరు మార్చుకున్నారు. ఈ దంపతులు కరాచీలో స్థిరపడ్డారు. సమీనా అక్కడ ఇంటీరియర్ డిజైన్ రంగంలో వృత్తిని కొనసాగించారు.
మొహ్సిన్ ఖాన్ – రీనా రాయ్..
1980లలో పాక్ ఓపెనర్ మొహ్సిన్ ఖాన్, బాలీవుడ్ నటి రీనా రాయ్ వివాహం అప్పట్లో సంచలనం సృష్టించింది. క్రికెట్, సినిమా రంగాలకు చెందిన ప్రముఖుల బంధంగా ఇది విస్తృతంగా చర్చకు వచ్చింది.
1983లో క్రికెట్ కెరీర్ మంచి దశలో ఉన్న సమయంలో మొహ్సిన్ ఖాన్ రీనా రాయ్ను పెళ్లి చేసుకున్నారు. అనంతరం ఆయన కొంతకాలం క్రికెట్కు విరామం ఇచ్చి హిందీ సినిమాల్లో నటుడిగా మారారు.
చివరకు విడాకులు..
ఈ దంపతులకు ఓ కుమార్తె జన్మించింది. ఆమెకు తొలుత జన్నత్ అని పేరు పెట్టారు. తర్వాత సనమ్గా మార్చారు. అయితే, ఈ వివాహ బంధం ఎక్కువకాలం కొనసాగలేదు. 1990లలో ఇద్దరూ విడిపోయారు. అనంతరం రీనా రాయ్ తన కుమార్తెతో ముంబయికి తిరిగి వచ్చారు. అయినప్పటికీ వీరి ప్రేమకథ క్రీడా, సినీ రంగాల్లో ఇప్పటికీ గుర్తుండిపోయే ఘటనగా నిలిచింది.
హసన్ అలీ – సమియా అర్జూ..
ఇటీవలి కాలంలో పాకిస్థాన్ క్రికెటర్, భారతీయురాలి వివాహం మరోసారి వార్తల్లో నిలిచింది. పాక్ ఫాస్ట్ బౌలర్ హసన్ అలీ 2019 ఆగస్టులో హరియాణాకు చెందిన సమియా అర్జూను వివాహం చేసుకున్నారు.
దుబాయ్లో జరిగిన ఘన వేడుకలో వీరి వివాహం జరిగింది. సమియా అర్జూ హరియాణాలోని మేవాత్ ప్రాంతానికి చెందినవారు. ఆమె దుబాయ్లో ఎమిరేట్స్ ఎయిర్లైన్స్లో స్ట్రక్చరల్ ఇంజినీర్గా పనిచేశారు.
ఎలా పరిచయమయ్యారు..?
దుబాయ్లో ఉన్న సమయంలోనే హసన్ అలీ, సమియా అర్జూకు పరిచయం ఏర్పడింది. పరస్పర స్నేహితుల ద్వారా వీరు ఒకరికొకరు దగ్గరయ్యారు. వీరి వివాహానికి భారత్, పాకిస్థాన్కు చెందిన మీడియా సంస్థలు విస్తృత ప్రచారం కల్పించాయి. క్రీడా రంగానికి చెందిన వ్యక్తి, మరో దేశానికి చెందిన ప్రొఫెషనల్ మధ్య ఏర్పడిన ఆధునిక వివాహ బంధంగా ఇది ప్రత్యేకంగా నిలిచింది.
సరిహద్దులు దాటిన బంధాలు..
భారత్-పాకిస్థాన్ క్రికెట్ పోరుకు మైదానంలో ఎంతటి తీవ్రత ఉంటుందో ప్రత్యేకంగా చెప్పాల్సిన అవసరం లేదు. అయితే ఈ ఆటకు సంబంధించిన కొన్ని వ్యక్తిగత బంధాలు మాత్రం ఇరు దేశాల మధ్య ఉన్న సరిహద్దులను దాటి ఏర్పడ్డాయి.
మరిన్ని క్రీడా వార్తల కోసం ఇక్కడ క్లిక్ చేయండి..