పాత టీచర్లకు టెట్ నుంచి మినహాయింపు ఇవ్వాలి : ఆర్ యూపీపీ నేతలు

• ప్రభుత్వాన్ని కోరిన ఆర్ యూపీపీ నేతలు  

హైదరాబాద్, వెలుగు: రాష్ట్రంలో 2010 సంవత్సరానికి ముందు నియమితులైన టీచర్లకు టెట్ నుంచి శాశ్వత మినహాయింపు ఇవ్వాలని రికగ్నైజ్డ్ ఉపాధ్యాయ పండిత పరిషత్ తెలంగాణ (ఆర్​యూపీపీ) రాష్ట్ర అధ్యక్షుడు శానమోని నర్సిములు ప్రభుత్వాన్ని కోరారు. తమిళనాడు తరహాలో తెలంగాణ శాసనసభలో ప్రత్యేక తీర్మానం చేసి కేంద్ర ప్రభుత్వానికి పంపాలని విజ్ఞప్తి చేశారు. శుక్రవారం హైదరాబాద్‌‌‌‌‌‌‌‌‌‌‌‌‌‌‌‌లో క్రీడలు, యువజన శాఖ మంత్రి వాకిటి శ్రీహరిని ఆ సంఘం నేతలు కలిసి వినతిపత్రం అందజేశారు. 

ఈ సందర్భంగా నర్సిములు మాట్లాడుతూ రాష్ట్రంలో టెట్ కోసం సిద్ధమవుతున్న సుమారు 21 వేల మంది సీనియర్ టీచర్లకు ఈ నిబంధన తీవ్ర మానసిక ఆందోళన కలిగిస్తోందని ఆవేదన వ్యక్తం చేశారు. టెట్ పేపర్-2లో సబ్జెక్టుతో సంబంధం లేని అంశాలు కాకుండా, టీచర్లు చెప్తున్న సబ్జెక్టుకే అనుగుణంగా పరీక్ష నిర్వహించేలా శాస్త్రీయ మార్పులు చేయాలని, కేటగిరీల వారీగా పాస్ పర్సంటేజీలను పునర్ పరిశీలించాలని కోరారు. అనంతరం మంత్రి స్పందిస్తూ.. ఈ విషయాన్ని వెంటనే సీఎం రేవంత్​రెడ్డి దృష్టికి తీసుకెళ్లి సమస్యను పరిష్కరించేందుకు కృషి చేస్తానని ఆయన హామీ ఇచ్చినట్టు సంఘం నేతలు తెలిపారు.