Vijayawada Crime: బెజవాడలో దారుణ ఘటన చోటుచేసుకుంది. పెళ్లికి నిరాకరించడంతో పాటు ప్రియురాలు కూడా తనను దూరం పెట్టడంతో ఆగ్రహానికి గురైన ఓ యువకుడు కత్తితో ఆమెపై దాడి చేశాడు. ఈ ఘటనలో ప్రియురాలు తీవ్రంగా గాయపడి ప్రాణాపాయ స్థితిలో ఉన్నట్లు సమాచారం. వివరాల ప్రకారం.. విజయవాడకు చెందిన చిన్నా, ఓ యువతి కొంతకాలంగా ప్రేమలో ఉన్నట్లు తెలుస్తోంది. అయితే చిన్నాతో ఆ యువతికి వివాహం చేయడానికి ఆమె కుటుంబ సభ్యులు నిరాకరించినట్లు సమాచారం. మరోవైపు సదరు యువతి కూడా చిన్నాను దూరం పెట్టడంతో అతడు కొంతకాలంగా ఆగ్రహంతో ఉన్నట్లు తెలుస్తోంది.
ఈ క్రమంలో శుక్రవారం ప్రియురాలి ఇంటికి వెళ్లిన చిన్నా.. తన వెంట తీసుకెళ్లిన కత్తితో ఆమెపై దాడి చేశాడు.. ఈ దాడిలో యువతి గొంతుకు తీవ్ర గాయాలయ్యాయి. రక్తపు మడుగులో పడిపోయిన ఆమెను కుటుంబ సభ్యులు, స్థానికులు వెంటనే ఆస్పత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు సమాచారం. ఇక, యువతిపై దాడి చేసిన అనంతరం భవనం పై నుంచి దూకి ఆత్మహత్యాయత్నానికి పాల్పడ్డాడు. తీవ్ర గాయాలతో ఉన్న చిన్నాను ఆస్పత్రికి తరలించగా చికిత్స పొందుతూ మృతి చెందాడు.. ఈ ఘటనతో విజయవాడలో తీవ్ర కలకలం రేగింది. మృతుడిని చిన్నాగా గుర్తించారు.. ఘటనపై పోలీసులు దర్యాప్తు చేపట్టి పూర్తి వివరాలు సేకరిస్తున్నారు.