ములుగు జిల్లా జగ్గన్నపేట గ్రామంలో వీధికుక్కల బెడదకు గ్రామస్తులు వినూత్నంగా స్పందించారు. కుక్కలను చంపకుండా, వాటి సంచారాన్ని నియంత్రించేందుకు మెడకు ‘తుంటలు’ కట్టి వదిలారు. ఈ పద్ధతి వల్ల కుక్కల వేగం తగ్గి, దాడులు తగ్గాయని అంటున్నారు. అయితే, ఇది జంతు సంక్షేమానికి హానికరమా, శాశ్వత పరిష్కారమా అనే చర్చ జరుగుతోంది. ఈ విధానం స్థానికంగా ఆసక్తిని రేపుతోంది.
ములుగు: వీధికుక్కల బెడదతో ఇబ్బందులు పడుతున్న ఓ గ్రామ ప్రజలు వినూత్నంగా ఆలోచించారు. కుక్కలను చంపకుండా వాటి సంచారాన్ని నియంత్రించేందుకు వాటి మెడలో తుంటలు కట్టి గ్రామంలో వదిలారు. ఈ ఘటన ములుగు జిల్లా ములుగు మండలం జగ్గన్నపేట గ్రామంలో చోటుచేసుకుంది. ప్రస్తుతం ఈ విధానం స్థానికంగా చర్చనీయాంశంగా మారింది.
గ్రామీణ ప్రాంతాలతో పాటు పట్టణాల్లోనూ వీధికుక్కల సమస్య తీవ్రంగా ఉంటోంది. రోడ్లపై వెళ్లే ద్విచక్ర వాహనదారులను కుక్కలు వెంబడించడం, చిన్నారులు, వృద్ధులపై దాడులకు పాల్పడటం వంటి ఘటనలు తరచూ ఆందోళన కలిగిస్తున్నాయి. కుక్కకాటుకు గురైన వారు చికిత్స కోసం ఆస్పత్రులను ఆశ్రయించాల్సి వస్తోంది. మరోవైపు వీధికుక్కలను చంపడం చట్టపరంగా నేరం కావడంతో వాటి నియంత్రణ అధికారులకు సవాలుగా మారుతోంది.
ఈ నేపథ్యంలో జగ్గన్నపేట గ్రామంలో కొందరు స్థానికులు కుక్కలను పట్టుకుని వాటి మెడకు తుంటలు కట్టారు. సాధారణంగా పశువులను నియంత్రించేందుకు ఉపయోగించే తుంటలను కుక్కలకు కట్టినట్లు స్థానికులు చెబుతున్నారు. దీంతో కుక్కలు వేగంగా పరుగెత్తడం, వాహనదారులను వెంబడించడం, గ్రామంలోని వివిధ ప్రాంతాలకు స్వేచ్ఛగా తిరగడం కొంతవరకు తగ్గిందని వారు భావిస్తున్నారు.
అయితే కుక్కల మెడకు తుంటలు కట్టడం వాటికి గాయాలు లేదా ఇతర ఇబ్బందులు కలిగించే అవకాశం ఉందనే అంశం కూడా చర్చకు వస్తోంది. వీధికుక్కల నియంత్రణకు శాస్త్రీయ, చట్టబద్ధమైన పద్ధతులను అధికారులు అమలు చేయాల్సిన అవసరం ఉందని జంతు సంరక్షణ నిపుణులు సూచిస్తున్నారు. కుక్కల బెడదను నియంత్రించడంతో పాటు ప్రజల భద్రత, జంతువుల సంక్షేమం రెండింటినీ దృష్టిలో పెట్టుకుని చర్యలు తీసుకోవాల్సి ఉంటుంది. మరోవైపు, జగ్గన్నపేటలో కనిపించిన ఈ విధానం ప్రస్తుతం చుట్టుపక్కల గ్రామాల ప్రజల దృష్టిని ఆకర్షిస్తోంది. అయితే ఇది శాశ్వత పరిష్కారమా, లేక తాత్కాలిక నియంత్రణ చర్య మాత్రమేనా అన్నది చర్చనీయాంశంగా మారింది.
మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..