పవర్ స్టార్ పవన్ కల్యాణ్, సౌత్ క్వీన్ త్రిష కృష్ణన్ జంటగా వచ్చిన సినిమా ‘తీన్‌మార్’. బాలీవుడ్‌లో విజయవంతమైన ‘లవ్ ఆజ్ కల్’కు రీమేక్‌గా తెరకెక్కిన ఈ చిత్రానికి జయంత్ సి. పరాన్జీ దర్శకత్వం వహించగా.. త్రివిక్రమ్ శ్రీనివాస్ మాటలు అందించారు. భారీ అంచనాలు, పవన్ క్రేజ్‌తో 2011లో ప్రేక్షకుల ముందుకు వచ్చిన ఈ సినిమా బాక్సాఫీస్ వద్ద ఆశించిన విజయాన్ని అందుకోలేకపోయింది. కథ, నేపథ్యం తెలుగు ప్రేక్షకులకు పూర్తిస్థాయిలో కనెక్ట్ కాలేకపోవడం సినిమాకు ప్రతికూలంగా మారాయి. అయితే తాజాగా ఓ ఇంటర్వ్యూలో దర్శకుడు జయంత్ సి. పరాన్జీ ఈ సినిమా గురించి చేసిన వ్యాఖ్యలు చర్చనీయాంశంగా మారాయి.
షూటింగ్ జరుగుతున్న సమయంలోనే తీన్‌మార్ ఫలితం ఎలా ఉండబోతుందో తనకు అర్థమైందని జయంత్ సి. పరాన్జీ చెప్పుకొచ్చారు. ‘షూటింగ్ చేస్తున్నప్పుడే తీన్‌మార్ సినిమా ఆడదని నాకు తెలుసు. ఎందుకంటే సినిమా ప్రాసెస్‌లో రైటర్ త్రివిక్రమ్‌ను నేను కనీసం ఒక్కసారి కూడా కలవలేదు. ఆయన ఖలేజా సినిమాతో బిజీగా ఉన్నారు. నన్ను మాత్రం చివర్లో దర్శకుడిగా తీసుకున్నారు. అలాగే లవ్ ఆజ్ కల్ కథ బాలీవుడ్ సెన్సిబిలిటీస్, అక్కడి సంస్కృతికి దగ్గరగా ఉంటుంది. అదే కథను తెలుగు నేటివిటీకి అనుగుణంగా తెరపైకి తీసుకురావడం అంత సులభం కాదు’ అని అన్నారు.
‘ఒరిజినల్ చిత్రంలో సైఫ్ అలీ ఖాన్, పవన్ కల్యాణ్ మధ్య ఉన్న స్టార్ ఇమేజ్‌లోనూ తేడా ఉంది. తీన్‌మార్ సినిమా అక్కడి ప్రేక్షకుల సెన్సిబిలిటీస్‌కు సరిపోయింది, అందుకే అక్కడ హిట్ అయింది. పవన్ లాంటి భారీ స్టార్ ఇమేజ్ ఉన్న హీరోతో అలాంటి సబ్జెక్ట్ తీయడం మన ఆడియన్స్‌కు పెద్దగా రుచించలేదు. బెనిఫిట్ షోలు పూర్తయిన తర్వాత కొంతమంది అభిమానులు నా ఇంటి ముందు ఆందోళనకు దిగారు. సినిమాలోని క్లైమాక్స్‌పై తీవ్ర అభ్యంతరం వ్యక్తం చేశారు. సోనూ సూద్‌తో పెళ్లయిన హీరోయిన్ మా హీరో దగ్గరకు ఎలా వస్తుంది? అసలు ఆ క్లైమాక్స్ ఏంటి?’ అంటూ అభిమానులు గొడవ చేశారని జయంత్ సి. పరాన్జీ గుర్తుచేసుకున్నారు.
పవన్ కల్యాణ్, త్రిష వంటి క్రేజీ కాంబినేషన్, త్రివిక్రమ్ మాటలు, ‘లవ్ ఆజ్ కల్’ రీమేక్ అనే అంశాలతో ‘తీన్‌మార్’పై అప్పట్లో భారీ అంచనాలు నెలకొన్నాయి. అయితే విడుదల తర్వాత మాత్రం ఆ అంచనాలను అందుకోలేకపోయింది. ఇప్పుడు ఇన్నేళ్ల తర్వాత దర్శకుడు చేసిన ఈ వ్యాఖ్యలు మరోసారి ‘తీన్‌మార్’ను వార్తల్లోకి తీసుకొచ్చాయి. అయితే మైఖేల్ వేలాయుధం, అర్జున్ పాల్వాయిగా పవన్ చూపించిన వేరియేషన్స్.. త్రిష గ్లామర్, మణిశర్మ సాంగ్స్ సినిమాకు ప్రత్యేకంగా నిలిచాయి. డైలాగ్స్ సరిగ్గా వినిపించకపోవడం కూడా సినిమాకు పెద్ద మైనస్‌ అని అప్పట్లో ఫాన్స్ పేర్కొన్నారు.