India vs Sri Lanka: జపాన్‌లోని నిస్షిన్ కోరోగి స్పోర్ట్స్ పార్క్ వేదికగా శ్రీలంకతో జరుగుతున్న ఆసియా క్రీడలు 2026 పురుషుల క్రికెట్ రెండో సెమీఫైనల్ మ్యాచ్‌లో భారత జట్టు నిర్ణీత 20 ఓవర్లలో 7 వికెట్ల నష్టానికి 169 పరుగులు సాధించింది. టాస్ గెలిచి బౌలింగ్ తీసుకున్న శ్రీలంక బౌలర్లు ప్రారంభంలో టీమిండియా బ్యాటర్లను తీవ్రంగా ఒత్తిడిలోకి నెట్టారు. కానీ, ఇషాన్ కిషన్ అద్భుతమైన పోరాటపటిమ కనబరిచాడు. కేవలం 46 బంతుల్లోనే 4 ఫోర్లు, 5 సిక్సర్లతో 80 పరుగులతో నాటౌట్ గా నిలిచి, భారత్ గౌరవప్రదమైన స్కోరు సాధించడంలో కీలక పాత్ర పోషించాడు.
భారత్ టాప్ ఆర్డర్ తడబాటు:
ఈ కీలక మ్యాచ్‌లో శ్రీలంక స్పిన్నర్లు వేసిన ఉచ్చులో భారత టాప్ ఆర్డర్ బ్యాటర్లు తలా ఒకేలా పెవిలియన్‌కు చేరారు. ఓపెనర్ అభిషేక్ శర్మ (7), సంజు శాంసన్ (7), శ్రేయస్ అయ్యర్ (13) తక్కువ స్కోరుకే వెనుదిరిగారు. ఈ దశలో క్రీజులోకి వచ్చిన టీనేజ్ సెన్సేషన్ వైభవ్ సూర్యవంశీ కేవలం 21 బంతుల్లోనే 6 ఫోర్లు, 2 సిక్సర్లతో మెరుపు వేగంగా 38 రన్స్ చేసి జట్టు స్కోరును పరుగులు పెట్టించాడు. ఆ తర్వాత వరుస వికెట్లు కోల్పోవడంతో భారత్ కష్టాల్లో పడింది. ఆ సమయంలో ఇషాన్ కిషన్‌కు తోడుగా వాషింగ్టన్ సుందర్ (7* నాటౌట్) చివర్లో కొన్ని మెరుపులు మెరిపించడంతో భారత్ 169 పరుగుల మార్కును అందుకోగలిగింది.
శ్రీలంక బౌలింగ్ ప్రదర్శన:
శ్రీలంక బౌలింగ్‌లో సహాన్ అరాచ్చిగే, తరుణ్ రత్నాయకే చెరో 2 వికెట్లు పడగొట్టగా.. వనుజ సహాన్, లాసిత్ క్రూస్‌పుల్లె, నువానీదు ఫెర్నాండో తలో వికెట్ దక్కించుకున్నారు. లంక స్పిన్నర్లు మధ్య ఓవర్లలో అద్భుతంగా బౌలింగ్ చేసి టీమిండియా బ్యాటర్లను కట్టడి చేశారు. ఈ మ్యాచ్‌లో శ్రీలంక ముందు 170 పరుగుల లక్ష్యం నిలిచింది. మరికొద్ది సేపట్లో లంక ఇన్నింగ్స్ ప్రారంభం కానుండగా, ఫైనల్ బెర్త్ కోసం జరిగే ఈ పోరులో విజయం సాధిస్తారో చూడాల్సి ఉంది.