Team India History: ఏషియన్ గేమ్స్‌ 2026 పురుషుల క్రికెట్‌లో టీమిండియా చరిత్ర సృష్టించింది. శ్రీలంకతో జరిగిన సెమీఫైనల్లో భారత్ ఏకంగా 124 పరుగుల తేడాతో ఘన విజయం సాధించి.. ఫైనల్‌కు దూసుకెళ్లింది. తొలుత బ్యాటింగ్ చేసిన భారత్ 20 ఓవర్లలో 7 వికెట్ల నష్టానికి 169 పరుగులు చేయగా.. లక్ష్య ఛేదనలో శ్రీలంక భారత బౌలర్ల ధాటికి 9.5 ఓవర్లలో కేవలం 45 పరుగులకే ఆలౌటైంది. ఈ విజయంతో పురుషుల టీ20ల్లో 100 లేదా అంతకంటే ఎక్కువ పరుగుల తేడాతో అత్యధిక విజయాలు సాధించిన జట్టుగా భారత్ తన రికార్డును మరింత మెరుగుపర్చుకుంది.
టీమిండియా ఇప్పటివరకు 11 సార్లు 100కు పైగా పరుగుల తేడాతో విజయాలు సాధించింది. ఈ జాబితాలో కెనడా 10 విజయాలతో రెండో స్థానంలో ఉంది. శ్రీలంకతో మ్యాచ్‌కు ముందు కెనడాతో సమానంగా భారత్ ఉంది. లంకపై విజయంతో టాప్ లేపింది. ఈ జాబితాలో ఆస్ట్రియా 9 విజయాలతో మూడో స్థానంలో ఉంది. టీ20 టోర్నమెంట్‌లో రెండు పూర్తి సభ్య దేశాల మధ్య జరిగిన సెమీఫైనల్ లేదా ఫైనల్లో ఇదే అత్యధిక విజయ మార్జిన్ కావడం మరో విశేషం. భారత్ 124 పరుగుల విజయంతో గత రికార్డును అధిగమించింది. 2026 టీ20 ప్రపంచకప్‌ ఫైనల్లో న్యూజిలాండ్‌పై భారత్ సాధించిన 96 పరుగుల విజయమే ఇంతకుముందు అత్యధిక మార్జిన్‌గా ఉంది.
శ్రీలంకతో జరిగిన సెమీఫైనల్లో భారత బౌలర్లు ఆరంభం నుంచే ఆధిపత్యం ప్రదర్శించారు. భారీ లక్ష్య ఛేదనలో శ్రీలంక బ్యాటర్లు ఏమాత్రం పోటీ ఇవ్వలేకపోయారు. వరుసగా వికెట్లు కోల్పోవడంతో 9.5 ఓవర్లకే ఇన్నింగ్స్ ముగిసింది. చివరకు 45 పరుగులకే ఆలౌట్ కావడంతో.. భారత్ 124 పరుగుల భారీ తేడాతో విజయాన్ని అందుకుంది. ఈ విజయంతో ఆసియా క్రీడల పురుషుల క్రికెట్‌లో భారత్ స్వర్ణ పతక పోరుకు చేరుకుంది. గత ఆసియా క్రీడల్లో సాధించిన స్వర్ణాన్ని నిలబెట్టుకోవాలనే లక్ష్యంతో బరిలోకి దిగిన టీమిండియా.. ఇప్పుడు ఫైనల్లో పసిడి పతకం కోసం తలపడనుంది.