కావలసిన పదార్థాలు: 1 కప్పు రాత్రంతా నానబెట్టిన కొర్రలు, అర కప్పు పెసరపప్పు, 4 కప్పుల నీళ్లు, రుచికి సరిపడా ఉప్పు, 3 టేబుల్ స్పూన్ల స్వచ్ఛమైన నెయ్యి, 1 టేబుల్ స్పూన్ జీలకర్ర, టీస్పూన్ మిరియాలు, పిడికెడు జీడిపప్పు పలుకులు, 3 నిలువుగా చీల్చిన పచ్చిమిరపకాయలు, 1 ఇంచ్ అల్లం తరుగు, 2 రెమ్మల కరివేపాకు, 2 చిటికెడ్ల ఇంగువ
తయారీ విధానం: బాండీలో అర కప్పు పెసరపప్పు వేసి నూనె లేకుండా లో ఫ్లేమ్‌పై 10 నుండి 15 నిమిషాల పాటు ఎర్రగా, మంచి కమ్మటి వాసన వచ్చే వరకు వేయించాలి. పప్పు వేగాక నీటిలో వేసి శుభ్రంగా కడిగి కుక్కర్‌లో వేసుకోవాలి. కొర్రలను రెండు మూడు గంటలు మాత్రమే నానబెడితే పొంగలి గట్టిగా ఉండి క్రీమీ టెక్స్చర్ రాదు; అందుకే కొర్రలను తప్పనిసరిగా రాత్రంతా నానబెట్టుకోవాలి.
కుక్కర్‌లోని వేయించిన పెసరపప్పుతో పాటు రాత్రంతా నానిన 1 కప్పు కొర్రలను వేయాలి. ఇందులో రుచికి సరిపడా ఉప్పు వేసి, కొర్రలు-పప్పుల మొత్తానికి సరిపోయేలా కచ్చితంగా 4 కప్పుల నీళ్లు పోయాలి. కుక్కర్ మూతపెట్టి మీడియం మంటపై 4 నుండి 5 విజిల్స్ వచ్చే వరకు ఉడికించాలి హై ఫ్లేమ్‌పై పెట్టకూడదు. ఆవిరి పోయాక మూత తీసి చూస్తే కాస్త జారుడుగా అనిపించినా, గరిటెతో మెదిపితే చల్లారే కొద్దీ చక్కటి చిక్కదనం వస్తుంది.
తాలింపు గరిటెలో 3 టేబుల్ స్పూన్ల నెయ్యి వేసి వేడిచేయాలి. నెయ్యి కాగిన తర్వాత 1 టేబుల్ స్పూన్ జీలకర్ర, 1 టీస్పూన్ మిరియాలు, పిడికెడు జీడిపప్పు వేసి మీడియం మంటపై దోరగా వేయించాలి. జీడిపప్పు సగం వేగాక చీల్చిన పచ్చిమిర్చి, సన్నని అల్లం తరుగు, కరివేపాకు, రెండు చిటికెళ్ల ఇంగువ వేసి మంచి సువాసన వచ్చేలా ఎర్రగా వేయించాలి.
ఈ వేడివేడి సువాసనభరిత తాలింపును ఉడికించిన కొర్రల మిశ్రమంలో వేసి బాగా కలుపుకోవాలి. అంతే, నోరూరించే కమ్మనైన ‘కొర్రల కట్టె పొంగలి’ సిద్ధం! ఉదయం బ్రేక్‌ఫాస్ట్‌గా లేదా రాత్రి లైట్ డిన్నర్‌గా కొబ్బరి చట్నీ లేదా సాంబార్‌తో వేడివేడిగా తింటే పొట్ట ఎంతో తేలికగా, హాయిగా ఉంటుంది!