CM Chandrababu: రాయలసీమ చరిత్రలో 2026 అక్టోబర్ 2వ తేదీ చిరస్థాయిగా నిలిచిపోతుందని సీఎం చంద్రబాబు అన్నారు. కరువు సీమలో రూ.లక్ష కోట్లతో గ్లోబల్ హార్టికల్చర్ హబ్‌కు శ్రీకారం చుట్టడం సంతోషంగా ఉందని తెలిపారు. ఈ ప్రాజెక్టుతో కరువు సీమ కాస్తా సిరుల సీమగా మారుతుందని పేర్కొన్నారు. రాయలసీమను ప్రపంచస్థాయి ఉద్యానవన కేంద్రంగా తీర్చిదిద్దే లక్ష్యంతో ప్రభుత్వం ముందుకు వెళ్తోందన్నారు. ఈ ప్రాజెక్టులో ప్రభుత్వ, ప్రైవేట్ పెట్టుబడులు కలిపి సుమారు రూ.లక్ష కోట్ల సమీకరణకు ప్రణాళిక రూపొందించినట్లు అధికారిక వివరాలు చెబుతున్నాయి. అన్నదాతలకు ప్రయోజనం చేకూర్చేందుకు రిలయన్స్ ఇండస్ట్రీస్ ముందుకొచ్చిందని చంద్రబాబు తెలిపారు. కరువు నేలను గ్లోబల్ ఫ్రూట్ బౌల్‌గా తీర్చిదిద్దుతామని చెప్పారు. అదనంగా 6 లక్షల హెక్టార్లలో ఉద్యాన పంటల సాగును విస్తరించే లక్ష్యంతో ప్రణాళికలు రూపొందించామని పేర్కొన్నారు. రాయలసీమలో మామిడి, అరటి, టమాటా, దానిమ్మ, ఇతర పండ్లు, కూరగాయలు, పూల సాగుకు విస్తృత అవకాశాలు ఉన్నాయని అన్నారు. సాగునీరు అందిస్తే సీమ రైతులు బంగారం పండిస్తారని చంద్రబాబు వ్యాఖ్యానించారు.
ప్రకృతి సేద్యంలో ఆంధ్రప్రదేశ్ దేశంలోనే మొదటి స్థానంలో ఉందని చంద్రబాబు అన్నారు. రాయలసీమ రైతులకు అనేక రకాల పంటలు పండించే సత్తా ఉందని, పండ్లు, కూరగాయలు, పూలు పండించే ప్రత్యేక సామర్థ్యం ఈ ప్రాంతానికి ఉందని పేర్కొన్నారు. ఉద్యాన పంటల సాగుతో పాటు ప్రాసెసింగ్, కోల్డ్‌చైన్, మార్కెటింగ్, ఎగుమతులను అనుసంధానం చేసి రైతులకు మరిన్ని ఆదాయ అవకాశాలు కల్పించాల్సిన అవసరం ఉందన్నారు. రాయలసీమ అభివృద్ధికి సాగునీరు కీలకమని సీఎం స్పష్టం చేశారు. రూ.35 వేల కోట్లతో 36 ప్రాజెక్టులను పూర్తి చేసి మూడేళ్లలో జాతికి అంకితం చేస్తామని తెలిపారు. చాలామంది తనను ‘వాటర్ మ్యాన్’ అని పిలుస్తారని, తప్పకుండా రాయలసీమను కరువు సీమ కాదని నిరూపిస్తానని అన్నారు. గ్లోబల్ హార్టికల్చర్ హబ్ ప్రణాళికలో సాగునీటికి భారీగా నిధులు కేటాయించడంతో పాటు కొత్త ఆయకట్టు కల్పన, ప్రస్తుత ఆయకట్టు స్థిరీకరణ, సూక్ష్మ సాగునీటి విధానాల విస్తరణకు చర్యలు చేపడుతున్నట్లు ప్రభుత్వం వెల్లడించింది.
పట్టిసీమ ప్రాజెక్టు నిర్మాణాన్ని వైసీపీ అడ్డుకుందని చంద్రబాబు ఆరోపించారు. పట్టిసీమ లేకపోతే రాయలసీమ పరిస్థితి ఎలా ఉండేదో ఆలోచించాలని అన్నారు. నీటిని సీమకు తీసుకురావడంలో సాగునీటి ప్రాజెక్టుల ప్రాధాన్యతను వివరించారు. పోలవరం ప్రాజెక్టుకు కేంద్ర ప్రభుత్వం సహకరిస్తోందని, కేంద్రం సహకారంతో పనులు వేగంగా కొనసాగుతున్నాయని చెప్పారు. పోలవరం పూర్తి చేసి ప్రధాని నరేంద్ర మోదీ చేతుల మీదుగా జాతికి అంకితం చేస్తామని చంద్రబాబు తెలిపారు. కేంద్రం సహకారంతో రాయలసీమను గ్లోబల్ హబ్‌గా మార్చే దిశగా అడుగులు వేస్తున్నామని చంద్రబాబు అన్నారు. ఈ సందర్భంగా అనంత్ అంబానీని ఉద్దేశించి ఇక నుంచి ఆయనను ‘తెలుగు బిడ్డ’, ‘మనందరి ముద్దుబిడ్డ’గా భావిస్తున్నామని వ్యాఖ్యానించారు. రాయలసీమ హార్టికల్చర్ హబ్‌తో రైతులు, గ్రామీణ ప్రాంతాలు, పెట్టుబడులు, ప్రాసెసింగ్, ఎగుమతులకు కొత్త అవకాశాలు ఏర్పడతాయని తెలిపారు. రాయలసీమను కేవలం కరువు ప్రాంతంగా కాకుండా దేశానికి ఉద్యాన ఉత్పత్తుల కేంద్రంగా, ప్రపంచ మార్కెట్‌కు అనుసంధానమైన ‘ఫ్రూట్ బౌల్’గా తీర్చిదిద్దడమే లక్ష్యమని చంద్రబాబు స్పష్టం చేశారు. సాగునీరు, ఉద్యాన పంటలు, రహదారులు, ప్రాసెసింగ్, మార్కెటింగ్, ఎగుమతులను సమగ్రంగా అభివృద్ధి చేసి సీమ రైతుల జీవితాల్లో మార్పు తీసుకురావాలని ప్రభుత్వం లక్ష్యంగా పెట్టుకున్నట్లు తెలిపారు సీఎం చంద్రబాబు నాయుడు..