ప్రస్తుతం బట్టలు ఉతకడానికి అనేక ఇళ్లలో వాషింగ్ మెషీన్ ఒక ముఖ్యమైన భాగంగా మారింది. చాలా మంది దీనిని ప్రతిరోజూ ఉపయోగిస్తుంటారు కానీ, మెషీన్ను లోపలి నుండి శుభ్రం చేయడం మాత్రం పూర్తిగా మరిచిపోతుంటారు. ప్రతిరోజూ నీరు, డిటర్జెంట్ లోపలికి వెళ్లి వస్తుంటాయి కాబట్టి అది దానంతట అదే క్లీన్ అవుతుందని భావిస్తే పొరపాటే. వాస్తవానికి డిటర్జెంట్ అవశేషాలు, ఫ్యాబ్రిక్ సాఫ్ట్నర్ జిడ్డు , బట్టల నుండి వచ్చే మురికి క్రమంగా మెషీన్ డ్రమ్, రబ్బర్ గాస్కెట్ , పైపులలో గట్టిగా పేరుకుపోతాయి. కాలక్రమేణా ఇది బ్యాక్టీరియా, బూజుకు దారితీసి బట్టలు ఉతికినా వింత దుర్వాసన రావడానికి కారణమవుతుంది. ఈ సమస్యకు చెక్ పెట్టి, మెషీన్ పనితీరును పెంచేందుకు ఇంట్లోనే లభించే వెనిగర్, బేకింగ్ సోడాతో కూడిన ఒక సులభమైన చిట్కా ఇక్కడ ఉంది.
వెనిగర్, బేకింగ్ సోడాతో డీప్ క్లీనింగ్ చేసే విధానం
మొదటి దశ (వెనిగర్ వాష్): మొదటగా వాషింగ్ మెషీన్ లోపల బట్టలు ఏవీ లేకుండా పూర్తిగా ఖాళీ చేయాలి. ఇప్పుడు మెషీన్ ప్రధాన డ్రమ్లో సుమారు రెండు కప్పుల తెల్ల వెనిగర్ను నేరుగా పోయాలి. ఆపై మెషీన్ను అత్యధిక వేడి నీటి (హాట్ వాటర్ సైకిల్) ఆప్షన్లో పెట్టి ఒక రౌండ్ పూర్తిగా నడపాలి. తెల్ల వెనిగర్లోని యాసిడ్ గుణాలు డ్రమ్కు పట్టిన సబ్బు మరకలను, మురికిని, దుర్వాసనను సమర్థవంతంగా విచ్ఛిన్నం చేస్తాయి.
రెండవ దశ (బేకింగ్ సోడా వాష్): మొదటి సైకిల్ పూర్తయిన తర్వాత, డ్రమ్లో అర కప్పు బేకింగ్ సోడాను చల్లాలి. తిరిగి మళ్లీ వేడి నీటి ఆప్షన్తో మెషీన్ను మరోమారు రన్ చేయాలి. బేకింగ్ సోడా డ్రమ్ లోపల దాగి ఉన్న మొండి మురికిని, బ్యాక్టీరియాను పూర్తిగా తొలగించి డ్రమ్ తిరిగి కొత్తదానిలా మెరిసేలా చేస్తుంది.
ఇతర భాగాల శుభ్రత: కేవలం డ్రమ్ను మాత్రమే కాకుండా మెషీన్ డిటర్జెంట్ ట్రే, రబ్బర్ గాస్కెట్ (డోర్ వద్ద ఉండే రబ్బర్ రింగ్) ప్రదేశాలను కూడా శుభ్రం చేయడం ముఖ్యం. ఎందుకంటే ఇక్కడే బూజు ఎక్కువగా చేరుతుంది. ఒక పాత టూత్బ్రష్ లేదా మెత్తటి గుడ్డను వెనిగర్లో నానబెట్టి ఈ భాగాలను తుడవడం వల్ల అక్కడ దాగి ఉన్న మురికి సులభంగా వదిలిపోతుంది.
ఎంత కాలానికి ఒకసారి శుభ్రం చేయాలి?
మీరు వాషింగ్ మెషీన్ను ప్రతిరోజూ క్రమం తప్పకుండా వాడుతున్నట్లయితే, కనీసం నెలకు ఒకసారైనా ఈ పద్ధతిలో లోతుగా శుభ్రపరచడం ఎంతో ప్రయోజనకరం. ఇలా చేయడం వల్ల మెషీన్ అంతర్గత భాగాలు పాడవకుండా వాటి ఆయుష్షు పెరుగుతుంది. శుభ్రమైన వాషింగ్ మెషీన్ బట్టలను మరింత సమర్థవంతంగా ఉతకడమే కాకుండా, బట్టలు ఎల్లప్పుడూ మంచి సువాసనతో, కొత్తవాటిలా తాజాగా ఉండేలా చేస్తుంది. కాబట్టి నెలకు ఒక్కసారైనా ఈ హోం మేడ్ చిట్కాను పాటించి మీ వాషింగ్ మెషీన్ను సురక్షితంగా ఉంచుకోండి.