ఉద్యోగం చేసే ప్రతి ఒక్కరికి పీఎఫ్ అనేది ఉంటుంది. ఆపదసమయంలో ఆదుకునే బంగారు నిధిగా దీనిని మనం చెప్పొచ్చు. అయితే పీఎఫ్ ఖాతా ఉన్న ఉద్యోగులందరికీ దానితో పాటు రూ. 7 లక్షల వరకు ఉచిత భీమా సౌకర్యం కూడా లభిస్తుందనే విషయం చాలామందికి తెలియదు. ఉద్యోగి మరణిస్తే వారి కుటుంబానికి ఆర్థిక భద్రత కల్పించేందుకు ఈ సదుపాయం ఎంతో ఉపయోగపడుతుంది. దీని కోసం ఉద్యోగులు అదనంగా ఒక్క రూపాయి కూడా చెల్లించాల్సిన అవసరం లేదు. ఎంప్లాయీస్ ప్రావిడెంట్ ఫండ్ ఆర్గనైజేషన్ అందిస్తున్న ఈ ఉద్యోగుల డిపాజిట్ లింక్డ్ ఇన్సూరెన్స్ పథకం నియమాలు, అర్హతల గురించి తెలుసుకోవడం చాలా ముఖ్యం.
EDLI భీమా పథకం అంటే ఏమిటి?
దేశంలోని వేతన జీవుల కోసం EPFO నిర్వహించే అత్యంత ముఖ్యమైన సామాజిక భద్రతా పథకమే ఈ EPF. సాధారణంగా ఉద్యోగి బేసిక్ శాలరీ నుండి కొంత భాగం పీఎఫ్ ఖాతాకు జమ అవుతుంది. అంతే మొత్తాన్ని సదరు కంపెనీ కూడా జమ చేస్తుంది. అయితే దీనితో పాటే EDLI స్కీమ్ కింద ఉద్యోగులందరికీ ఆటోమేటిక్గా ఇన్సూరెన్స్ వర్తిస్తుంది. కంపెనీలు ఉద్యోగి జీతంలో 0.5 శాతాన్ని ఈ భీమా నిధికి జమ చేస్తాయి.
ఈ ఉచిత భీమా లాభం ఎవరికి అందుతుంది?
ఆటోమేటిక్ యాక్టివేషన్: పీఎఫ్ ఖాతా ఉన్న ప్రతి ఉద్యోగికి ఈ భీమా సౌకర్యం అటోమేటిక్గా వర్తిస్తుంది.
కుటుంబానికి ఆర్థిక సాయం: ఉద్యోగి సర్వీసులో ఉండగా అకాల మరణం చెందితే.. వారి కుటుంబ సభ్యులు లేదా నామినీ ఈ భీమా సొమ్మును క్లెయిమ్ చేసుకోవచ్చు.
కనీస – గరిష్ట పరిమితి: EPFO నిబంధనల ప్రకారం.. ఉద్యోగి మరణిస్తే నామినీకి కనీసం రూ.2.5 లక్షల నుండి గరిష్టంగా రూ.7 లక్షల వరకు భీమా మొత్తం లభిస్తుంది.
భీమా మొత్తాన్ని ఎలా లెక్కిస్తారు?
- EDLI పథకం కింద వచ్చే భీమా డబ్బును ఉద్యోగి చివరి 12 నెలల సగటు జీతం, పీఎఫ్ ఖాతాలో ఉన్న బ్యాలెన్స్ ఆధారంగా లెక్కిస్తారు.
- ఉద్యోగి సగటు నెలవారీ జీతానికి 35 రెట్లు (గరిష్టంగా రూ. 15,000 బేసిక్ శాలరీ పరిమితితో), పీఎఫ్ ఖాతాలోని సగటు బ్యాలెన్స్లో 50 శాతాన్ని కలిపి లెక్కిస్తారు.
- ఈ లెక్కల ప్రకారం నామినీకి గరిష్టంగా రూ. 7 లక్షల వరకు అందుతుంది
EPFO 3.0 సంస్కరణలు: క్లెయిమ్ చేయడం మరింత సులభం
ఉద్యోగులకు ఊరటనిస్తూ EPFO ఇటీవల EPFO 3.0 సంస్కరణలను తీసుకువచ్చింది.
వేగవంతమైన క్లెయిమ్స్: పాత కాలపు కాగితాల ప్రక్రియను తగ్గించి, డిజిటలైజేషన్ను పెంచారు.
20 రోజుల్లోనే డబ్బు: ఉద్యోగి మరణించినప్పుడు నామినీ దరఖాస్తు చేసుకుంటే, సాధారణంగా 20 రోజుల్లోనే ఈ భీమా క్లెయిమ్లను పరిష్కరించి కుటుంబానికి ఆర్థిక సాయం అందేలా చూస్తున్నారు.
సులభమైన ఉపసంహరణ: ఉద్యోగులు రిటైర్మెంట్కు ముందే తమ పీఎఫ్ సొమ్మును సులభంగా ఆన్లైన్ ద్వారా విత్డ్రా చేసుకునే సదుపాయాన్ని కూడా మరింత సరళతరం చేశారు.
పీఎఫ్ అనేది కేవలం రిటైర్మెంట్ తర్వాత దాచుకునే పొదుపు మొత్తం మాత్రమే కాదు, అత్యవసర కాలంలో ఉద్యోగి కుటుంబానికి కొండంత అండగా నిలిచే ఒక గొప్ప భీమా సాధనం. కాబట్టి మీ పీఎఫ్ ఖాతాకు నామినీ పేరును ఖచ్చితంగా అప్డేట్ చేసి ఉంచుకోండి.
FAQ
ప్రశ్న : EDLI ఉచిత భీమా సౌకర్యం పొందడానికి ఉద్యోగి ప్రతి నెలా ఎంత డబ్బు చెల్లించాలి?
జవాబు: దీని కోసం ఉద్యోగి ఒక్క రూపాయి కూడా చెల్లించాల్సిన అవసరం లేదు. ఈ భీమా ప్రీమియం మొత్తాన్ని పూర్తిగా కంపెనీ యాజమాన్యమే భరిస్తుంది.
ప్రశ్న : పీఎఫ్ ఖాతా ఉన్న ప్రతి ఉద్యోగికీ ఈ రూ.7 లక్షల భీమా ఆటోమేటిక్గా వస్తుందా?
జవాబు: అవును.. యాక్టివ్ పీఎఫ్ అకౌంట్ ఉన్న ప్రతి ఉద్యోగికీ ఈ భీమా సౌకర్యం అటోమేటిక్గా వర్తిస్తుంది.
ప్రశ్న : ఒకవేళ ఉద్యోగి మరణిస్తే ఈ భీమా డబ్బు ఎవరికి అందుతుంది?
జవాబు: ఉద్యోగి తన పీఎఫ్ ఖాతాలో ఎవరినైతే నామినీ గా పేర్కొన్నారో వారికి ఈ భీమా సొమ్ము అందుతుంది. ఒకవేళ నామినీ వివరాలు నమోదు చేయకపోతే, ఉద్యోగి యొక్క చట్టబద్ధమైన వారసులకు ఈ మొత్తం చెల్లిస్తారు.